قصة كل شاب سعودي

معيض رجال سنايدي ..مثقف وجامعي وجنتل مان ...اخس يا الجنتل مان الزبده انه شاب في 29 متخرج من الجامعه وعلى باب الله ..الزبده انه يعجبكم ..المهم كل يوم الصباح يقوم من النوم ويصلي ويعين من الله خير ويفطر ويروح يشغل الموتر حقه 2003 مطلعه وكاله بحكم انه شغال بمنصب حلو بشركه كبيره وراتبه ممتاز ...طبعا قبل لا يطلع امه الله يخليها له كل يوم تنق عليه بنفس الموال :

ام معيض : يا وليدي منت ناوي تتزوج وتجيب لي اولاد ارتز فيهم قدام خالاتك والجيران وافرح فيك وفيهم ؟؟

معيض : يا يمه تكفين فكيني من السالفه هذي ...ترا يجيني حموضه من سالفه الزواج والعيال وبشلتهم ما يكفيك بلشتك فيني تبيني ابلش انا كمان بعيال ومسؤليه ؟؟

ام معيض : طس بس يا سمرمدي ورح عند اخوياك اخر الليل ولا ترجع ..هذي حالتك كل يوم من الدوام للبيت تتغدى وتروح تسوي نفسك رجل اعمال عند اخوياك ومكاتب العقار والاسهم وتجمع بالفلوس على قله سنع ..اقدر اعرف وش تسوي بالفلوس هذي ؟؟ يعني خلاص عمل وصارلك شغال من اول من تخرجت وراتب حلو وكمان فاتح لك مع اخوياك بزنس ومتيسره لك ..وراك ما تتزوج ؟؟؟؟

طبعا معيض يسمع السؤال هذا يوميا و يطنش الجواب ..مع انه الجواب يعرفه وكل يوم يفكر فيه !!! ( يا ترى وش الجواب ؟؟ )

معيض يطلع من البيت ويروح للدوام وطبعا الطريق هذا للدوام احلى شئ في يوم معيض ..لانه الطريق اصلا ممتع بالنسبه له ..طول الطريق شجر والاشياء هذي اللى يسمونها منحوتات تجميليه وشغلات زي كذه ..واخد بالك حضرتك ؟

يوصل معيض للدوام ويدخل المكتب المكيف في الدوام ويقابله رئيسه بوجه باسم ويقوله :

رئيس معيض : هلا هلا والله بالوجه الصبوحي ...وش عندك جاي بدري اليوم اكثر من العاده ؟؟

معيض : ابدا طال عمرك بس عندي كذه شغله من امس ودي اخلصها علشان نرفع راسك قدام الادراه فوق طال عمرك .

رئيس معيض : بارك الله فيك يا ولدي ..ايه هذا الشباب السعودي اللي يهمه اتقان عمله ومهب زي خويك في المكتب اللي ما يجي الا بعد الدوام بربع ساعه وعيونه منفخه من السهر بالشاليهات والبنات و........(مشفر )......وووووووو !!! ولا وصلت فيه انه يقولي تعال اعرفك على ربعي ونلعب بلوت هناك ..الله يهديه بس والله خايف عليه يجي يوم اضطر اني ارفع تقرير عليه ويخسر عمله !!

معيض : ايه والله انشاءلله يهتدي بس .

رئيس معيض : الا يا معيض ما ودك تتزوج يا ولدي ؟؟ ترا على خبري فيك ماشاءالله عليك ولد مهتم بعمله ولك اعمال ثانيه بره الدوام وحالك تمام وراتبك ممتاز ولك مستقبل باهر معنا انشاءالله ..غريبه انه زيك ما تزوج الى الان !!!

معيض : والله طال عمرك انشاءالله اذا بنت الحلال جت ما نقول لا ..بس خلها هي تجي اول ...(تصريفه كل يوم ) !!!!

الساعه 12 :

معيض يطلع ويمر خويه مجدع ويروحون لم الراشد يتغدون

معيض : يا خوي اخلص علينا ترانا كلها سندويشات اللي بناكلها مهب مفطح ..خلنا نلحق نرجع على الدوام بسرعه يا خوي !!

مجدع : يا خوي وش اسوي طيب هماك ما تشوف البنات واقفين قدامنا والشباب مدهيرن عندهم انواع الترزز يبون يرقمون وهم يسوون نفسهم يبون يطلبون ؟؟؟؟

معيض : يخي والله حوسه مع المراهقين ذولا ما همهم الا البنات وناسين انه الديره تبيهم ومنزله وظايف بكل مكان والشركات تطلبهم وتحاول انه تقلل من الاجانب وبس محيوسين لانه مافي شباب يبون يشتغلون والله القهر بس ..النعمه لعندهم ولا يبونها ويرفسونها !!!!

مجدع : على قولتك يا شيخ خلها على الله بس ..هذا الدلع والتربيه الفاشله ..صارو الشباب من زود النعمه بس يبطرون وما همهم الا البنات والترقيم والنت والشات ونك فلانه مخاويه فلان وعلانة تعرف فلان وعلان !! يخي قرف بكل مكان وغير الهواش على النت والشات كانه من جد الناس تتهاوش على شئ له القيمه ولا فعلا عايشين حقيقه وناسين انه بس شاااااااات وكله يروح لما تفصل الخط |#| !!

معيض : على قولك ...يلا بس خلنا نمشي وناخذ اي شئ من اي مكان وارجعك دوامك وارجع انا ولا تنسى نتقابل الليله بس علشان نشوف سالفه المشروع الجديد اللى اقترحه خوينا شليخان .

الشباب كل واحد يروح دوامه ويجلس يخلص كل شئ من الاشغال ومعيض وهو على المكتب تجيه لحظات بس يناظر بخويه اللي بالمكتب ويناظره وهو يقرا الجرايد وكل شوي يمسك الجوال ويقعد يبربر فيه بصوت واطي وبعدها يضحك ويقول : الله يرجكييييييي هاهاهاهاهاهاها طيب طيب الخميس اتفاهم معك لما اشوفك هاهخاهاهاهاهاخخخخخخخ

معيض يتأمل المنظر هذا ومع انه يشوفه كل يوم بس يستغرب ولا يقول شئ !!

يطلع معيض من الدوام بعد ما يمر على رئيسه ويعطيه كل الاوراق اللي خلصها علشان يقدمها لمجلس الادراه زي ما وعده ..ومن كثر ما رئيسه فرحان فيه يقول له بينه وبين معيض ترا قاعد اكتب التقارير عن الموظفين وحاطك براسي يا معيض ويلا رح وخلك كذه دايم

معيض يطلع من الدوام ويروح البيت يتغدى وامه تسمعه نفس الموال وطبعا الجواب معيض ما يقوله لها ( وش الجواب هذا اللي حايسنا فيه ولا يبي يقوله الغثيث ذا ؟؟؟؟؟؟ )

معيض بعد صلاه المغرب يركب موتره ويطس لمكتب شليخان ويلقى هناك مجدع جالس منتظره مع بقيه الربع وشله الانس : شليخان , مجدع , شويلح , عليان , فريحان و زيدان .

يجلسون يسولفون الى صلاه العشا وبعدها يروحون يصلون وبعد الصلاه كل واحد يروح بيته ما عدا شليخان ومجدع وفريحان وطبعا بطل الفلم معيض .

شليخان يفتح السالفه ويقول :

شليخان : يا شباب ترا فيه مشروع جديد ودنا ندخل فيه كلنا الاربعه وكل واحد يدخل باللي يقدر عليه ونتفاهم على الطريقه والاداره وكل شئ ..والمشروع هو بكل اختصار ناخذ لنا قرض من صندوق التمويل العقاري التابع للحكومه ونفتح مصنع لصناع القفازات الطبيه|D| اللي يستعملها كل دكتور في الديره واستعمال مره وحدة ويرميها وعلى حسب الدراسه اللي سويتها عرفت انه الدوله تستوردها من الخارج ومافي اي مصنع محلي او حتى خليجي يسويها ...هذا الموضوع بكل اختصار ...وش رايكم فيه ؟؟

معيض : هممممممممممممم يا ولد والله فكره ..طيب فكرت كم بيكلفنا المشروع هذا ؟؟

شليخان : احنا نتفق اللحين ونراجع الجهات المختصه ونشوف وش يبون وكل شئ ونسوي دراسه جدوى عند احدى المكاتب المختصه التابعه للشركات الكبيره ووقتها نقدر نعطي رقم صحيح وبناء عليه نشوف وش نسوي .

مجدع : طيب ما تخاف لو عرضنا الموضوع على احد المكاتب هذي علشان الدراسه انه يحطون علينا رقم كبير وخيالي اكبر من حجمنا مره علشان نهون وياخذها المكتب ويعطها لمعزبه علشان هو يسوي المشروع ؟؟ ترا التجار الكبار ذولا حيتان وينخاف منهم !!

يرد المره هذي فريحان : لا يا خوي وش دعوى ؟؟ الحكومه ترا حاطه تنظيمات واي سرقه من النوع هذا على طول يجازى التاجر ويرجع الحق لراعيه وما احد يقدر يسوي حركه زي كذه ابدا وبعدين السوق مفتوح لكل وفيه تشجيع كبير للشباب انهم يبدون يكونون نفسهم ويفتحون المصانع والمجالات التجاريه علشان يكبر الاقتصاد ويتكون لنا كلمه وسط السوق العالمي وينحسب لنا اكبر حساب واننا مهب راعين نفط وبس !!!

معيض : والله فكره حلوة وانا اذكر مره انه على النت اني شفت بحث لاحدى المصانع انه التكلفه بتكون متوسطه والتكلفه تقريبا بتكون $$$ .

شليخان : حلو حلو يعني لو نسوي الدراسه هذي وبينا احنا الاربعه نجيب 40% من قيمه المشروع ونقدم على الصندوق العقاري كلها شهر ويطلع لنا التمويل الباقي للمشروع ..اجل نقدر نقول يا شباب على بركه الله نبدا وندهر .

الشباب يجلسون للساعه 11 تقريبا يتكلمون ويحسبون كل شئ على انه كل واحد منهم يكون مختص بشئ يسويه في المرحله الاولي من مراجعه الدوائر الحكوميه وكل شئ .

تمر الايام..... وبعد سنه من الجلسه هذي :

معيض اللحين ترقى في عمله على حسب ما وعده رئيسه وخويه راعي الجوالات انطرد من العمل وصار يسربت بالشاليهات اخر الليل والنهار راقد ولا بالراشد ولا على النت يرقم !!

الشله الاربعه بدو بمرحله بناء المصنع بعد ما تم كل شئ والمصنع المفروض انه يفتتح خلال سنتين ويبدا الانتاج على نطاق محلي وخليجي خاصه انه معظم دول الخليج عرفت عن موضوع المصنع وتم عمل طلبيات كبيره جدا بدرجه تكفي لتشغيل المصنع ليل ونهار لكم سنه قدام .... الشباب احتفلوا بالنجاح الكبير اللي صار في استراحه مجدع .

مجدع : والله يا شباب بصراحه شئ خيالي هذا ..لسه المصنع ما افتتح والطلبات وصلت الى الان الى اكثر من راس المال والتكلفه كلها

فريحان يعلق ويقول : يخي الحمدالله والشكر بس كل هذا بتوفيق الله ومن ثم اجتهادنا وتسهيلات المقدمه لنا الشباب .... الحمدالله الحمدالله يا رب على النعمه واللهم يزيد ويبارك .

بعد الحفله كل واحد يرجع بيته والكل الدنيا ما تشيله من السعاده ...بس معيض باله مشغله بموضوع مهم بالعمل ...على حسب القوانين المعروضه بالشركه اللي هو فيها انه بعض الاعمال تتم عبر شركات مقاوله تقدم العماله المدربه لهم وشركته هي تقوم بتمويل المشروع هذا علشان يتم تشجيع الشركات المحليه ... معيض كان ماخذ الاوراق علشان يراجعها بالبيت ويجلس يسهر عليها يقراها ويقرى العروض المتقدمه له ...هذا عرض من شركه زفت سوفت بكل بجاحه تقدم له بكلمات مبهمه عموله له اذا تم الموافقه على شركته ..معيض يقرا الفاكس هذا وهو مستغرب مره |‍‍‌‌‌‌+‍‍ ويفكر للدرجه هذي وصلت البجاحه بشركه كبيره زي زفت سوفت انه يقدمون له رشوه علشان ياخذون العقد وياكلون المشروع ويحرمون بقيه الشركات ؟؟؟؟؟؟:99:

الفاكس طبعا وصل لمكانه الطبيعي وهو الزباله وانتم بكرامه

معيض يكمل قرايه العروض من الشركات ويقرر على شركه هلص نت ويحط راسه ويرقد ويجلس يحلم احلام كل ليله

معيض يقوم من النوم ويطلع للدوام ويكلم مندوب شركه هلص نت علشان يكملون الاوراق ويبدا المشروع ....طبعا على فكره معيض اللحين عمره 30 وامه لا تزال كل صباح تعطيه كل يوم نفس الموال ..والجواب الزلع هذا الى الان يدور براس معيض وما يبي يقوله وفي كل وقت يفكر فيه بس يطرد التفكير فيه مع مشاغل اليوميه .

تمر الايام ويبدا مشروع الشركه وتبدى شركه هلص نت بتقديم اوراق العماله للمعيض علشان يوافق عليها ويشوف مين الافضل علشان يبدى عمله بالشركه وتسليمه المهام العمل ...معيض يلاحظ انه فيه بنات بين المتقدمين ..يفكر معيض ويقول خلاص الدنيا صارت كذه ودخول البنات في مجال العمل شئ طبيعي ومهم لهم بس كان متخوف من شئ واحد ...اللحين البنت اذا تزوجت بتكمل دوامها ولا لا وزوها بيسمح لها تجي وما يسوي لها مشاكل بالعمل ووقت دوامها وشغلات زي كذه ....

معيض يا حليله يحمل هم الكل وما يبي يضر احد ودايما يفكر ببكره ويهمه انه العمل يمشي صح ولا يبي اي شئ يأثر على سير العمل ...المهم معيض وهو يكمل قرايه الاوراق لاحظ شئ ثاني ...انه المتقدمين اكثرهم بنات بنسبه 99% والباقي اسامي اولاد بس الاسم العائلي الاخير واحد !!!

معيض يكلم المندوب ويقوله عن الملاحظة هذي الغريبه ويقوله وش السالفه يبو الشباب ؟؟؟؟؟؟

المندوب : ههههههههه واخد بالك حضرتك اصله دولا يا باشا اولاد عموم صاحب الشركه ههههههههههه

معيض : هممممم طيب يعني ما في احد تقدم لكم غيرهم ؟؟

المندوب : هههههههه واخد بالك حضرتك اصله المتقدمين كتر الرز بس دولا اللي الشركه تشوف انهم مؤهلين عشان يمثلون شكرتنا يا باشا خخخخخخخ

معيض وهو بدت تقفل معاه : اممممممممممممم ايييييييه طيب ...طيب سؤال ثاني وراهم البنات المتقدمات نسبتهم كبيره بالشكل هذا ؟؟؟

المندوب : خخخخخخخخخ واخد بالك حضرتك اصله يا معلم احم احم ...قصدي يا باشا ..البنات دلوقت صارو عندهم مؤهلات كبيره ومهمه جدا لخلق جو لطيف بالعمل وحضرتك اكيد فاهمني هع هع هع هع

معيض : هاه ؟؟؟ شلون ؟؟ ما فهمت عليك وش تقول انت يخي ؟؟؟؟

المندوب : خخخخخخخخ واخد بالك حضرتك اصله البنات يعني جنس لطيف وحرام عليهم يجلسو ببيتهم بعد الدراسه بدون ما ياخدو فرصتهم بالعمل ...واوه كل حاقه بثوابه يا بااااشاااااا .

معيض وهو بدا راسه يدور وحاس انه فيه شئ مهب طبيعي بالسالفه %% ابدا : طيب بس ما تشوف انه هذا حرام انه بنت تاخذ راتب كبير زي كذه اللى احنا نعرضه والشباب اللي هم مطالبين بفتح بيوت ما ياخذون نفس الفرصه ؟؟؟؟؟

المندوب : هههههههههههههههههههههههههههههههه

هههههههههههههههههههههههههههههههه

هههههههههههههههههههههههههههههههه

هههههههههههههههههههههههههههههههه

هههههههههههههههههههههههههه الله يرج ابليس سعادتك يا باااشااااا

اهو انت شايف الباب مفتوح وكل الشركات بتعرض وظايفها على الكل والشباب مش عاوزين والعروض كتيره اكتر من الطلب والباب مفتوح للكل .

معيض يفكر بكلام المندوب ومع انه حاس انه فيه شئ غلط بالسالفه لكن ابدا مهب قادر يعرف وشو الشئ هذا بس يوقع الاوراق ويتم المشروع ويصير مكان العمل كانه سوق نسائي مع البنات اللي فيه وكل وحدة اثبتت انه مؤهلاتها للعمل كبيره جدااااااااااااااااااااااااااااا للعمل !! ( كل واحد وعاد ونيته بالفهم !!! )

معيض يرجع البيت ويتغدى وبعدين يطلع يروح يخلص شغله مع شركائه في المصنع ويرجع يرقد ويقوم ثاني يوم الخميس اجازه وينزل يفطر مع امه وتبدا هي نفس الموال

ام معيض : اقولك انت يا تبن تراك زودتها يا الهيس اربد والله منيب امك ولا انت ولدي اذا ما تقول لي ليه ما تتزوج وانت اللحين صار عمرك 30 وبدا الشيب براسك ياالاصلع الله يشيب روحك يا الهيس يا معيض .

معيض : ............

ام معيض : وراك ما تتكلم ؟؟؟؟ انا عارفه انه فيه جواب على كل موضوع الزواج هذا وما تبي تقوله لي !!!!! ليه طيب ؟؟؟؟؟؟ منيب امك يا جلعك الماحي ؟؟؟؟؟؟؟؟

وتاخذه ببكس اموي حنون علشان يرد عليها |#|

معيض : ..............................

ام معيض : شوف تراني حلفت والله لو ما ترد علي وتقولي ليه ترا هذي اخر مره اكلمك وباموت وانا غاضبه عليك

معيض : .............

ام معيض تقوم وهي تصيح والدموع اربع اربع ومعيض يشوفها وساكت ولما تطلع من الغرفه يناظر الشباك ويناظر الحديقه وتنزل من عينه دمعه يروح مع باله ويفكر

افكار معيض :

اهههههههههه يا دنيا وش اقولتس يا يمه ؟؟ اقولك الحقيقه ؟

اقولك ان كل هذا اللي احنا عايشينه حلم ؟؟

اقولتس يا يمه انه عمري 30 وما عندي وظيفه ؟؟

اقولتس يا يمه انه هذا بس خيال اكتبه على النت ؟؟

اقولتس يا يمه انه السعودي بديرته مواطن درجه ثانيه والعمل للدرجه الاولي (الاجانب) ؟؟

اقولتس يا يمه انه الواحد كان يحمد ربه على الحج بحياته واللحين الواحد يحمد ربه اذا جاه رئيس يخاف الله باللي تحته ويعطي الحق لراعيه ولا هب هيس اربد راعي سهرات وبنات وماشي على كلام امرأ القيس : اليوم خمر ونساء وغدا امر .... وانه اللي يسهره ويسوي له كل شئ هو اللي يرتفع ؟

اقولتس يا يمه انه سيارتي صارلها تعدت العمر الافتراضي لها ب8 سنوات ؟؟؟

اقولتس يا يمه انه كل صباح اطلع ويبغالي نص النهار علشان اوصل للمكان اللي ابيه من الحفر والمطبات والتحويلات ؟؟

اقولتس يا يمه انه كل خوياني شغالين سكرتيه بالمجمعات على رواتب 1500 ريال ؟؟؟

اقولتس يا يمه انه الديره ما صارت تمشي الا برشاوي وعمولات وواسطات ؟؟؟

اقولتس يا يمه عن الانحلال اللي صاير وعن البنات اللي يشغلوهم ويعطونهم رواتب كبيره مره لا شئ الا علشانهم بنات و البنت تحمد ربها على رزقها بس ما تعرف عن نظرات الذيابه اللي مشغلينها انهم ناوين يحللون الفلوس هذي الا من رحم ربي وخافه ؟؟؟؟

اقولتس يا يمه عن التجار الكبار وسرقتهم ليل ونهار لنا وانه اللى تحت يجلس تحت ؟؟؟

اقولتس يا يمه انه علشان اخذ قرض ابني مستقبلي فيه لازم اخذ عمري وعمر 3 من احفاد احفادي على ما يطلع لي القرض ؟؟؟؟

اقولتس يا يمه اني سعودي وكل فخري اني سعودي واني فوق كل الناس لاني سعودي ؟؟؟

اقولتس يا يمه ...اقولتس واقولتس واقولتس واقولتس .....وش تبيني اقولتس يا يمه علشان تفهميني ؟؟

معيض يفكر بكل هذا ويمسح الدمعه ويقوم لامه ويحب راسها ويقولها اسف يا يمه وروحي دوري لي على وحدة اتزوجها وافرحك بعيال عيالي انشاءالله وانتي موجوده يا يمه .

معيض يطلع يشغل سيارته موديل 2003 ويطلع يروح يجتمع مع ربعه ويطلعون يروحون يشرفون على المصنع الجديد .

النهايه ..... اذا كانت هذي هذي النهايه فعلا !!!!

.

.

.

.

هذي اول كتابه لي واول محاوله لي في المنتديات ...انشاءالله تعجبكم وانشاءالله ما اكون خليت فوق عيونكم نظاره سوده زي ما هي على عيوني اللحين ...واحب بس اقول لكم يا شباب لا يأس مع الحياه ولا حياه مع اليأس والدنيا كذه صعبه ومالكم الا انكم تكملون المشوار حتى لو مره ومرتين والف مره تحبطون وتفشلون ..المهم بتقولو الحمدالله على كل حال وتستعينون فيه وتقومو تكملو المشوار وتشوفو وش نهايتها القصه هذي

(قصة اعجبتني ههههه)

(منقول)

تسلم والله ابقراها وارد يبيها مخمخة هالقصص

انا قصتي احطها دايم توليت << ( حلاقة منول ) واشخص فيها << واحد فاهم الموضوع غلط قبل لايقراه يحسب القصة هي قصة الشعر هههههههه

ابرجع لك يالحبيب لاتروح عاد

أختيار جدا رائع..

هادف وممتع في آن واحد ..

بس احلى شي ..

الله يرج ابليس سعادتك ياباشااا

تحياااتي ...

قصه جدا ممتعه و مفيده في نفس الوقت .........

( مع ان راسي انقلب و انا اقراها لكن خشيت جو معها )

اختيار موقف يا سيف الجزيره........

يعطيك العافيه

مسـاءك ورد فـــيراني

أنــا ماقريت الموضوع كله تعبت صراحه,,,

بس مبين من الردود ماشـاءالله انه موضوع رائع

,,,وبأقرب فرصه راح يكون موضوعك في جعبه أهتمامي وبأطلع عليه,,,

وأمتعنا بمواضيعك المتميــزه

وشكرا

أختــك

فعلآ اختيار موفق وبداية قوية...

بس ماتلاحظ انك طبيت في السياسة شوي؟؟

<<<<<<<<<<<< تراه خوااااااااااااااااف!!!

لا من جد القصة هادفة وممتعة يعطيك الف عافية.............

تسلمون كل ابوكم ,,,

ياقروي اذا بغيت تقراها جب معك عصيده وعصير خل هههههه ترى يبيلها يومين

تسلمين اختي المسلهمه على الاطراء الجميل

وانشالله الجايات بتكون من تأليفي

سلاامة راسك الفيراني مره ثانيه بنزل فيلم اصرف خخخخخ

تسلمين عرس القناديل ,, والجايات افضل انشالله

كتكوت ماعليك السياسه كلها بجيبي ههههه ( ما يعقل ولد رئيس المباحث )

الله يعافيك بصراحه بردودكم هذي تخلوني اتحمس وابدا اقولكم قصصي ايام اول هههههه الله يعينكم عليها

والى لقاء قريب انشالله

اخوكم سيف الجزيره

تسلمون كل ابوكم ,,,

ياقروي اذا بغيت تقراها جب معك عصيده وعصير خل هههههه ترى يبيلها يومين

تسلمين اختي المسلهمه على الاطراء الجميل

وانشالله الجايات بتكون من تأليفي

سلاامة راسك الفيراني مره ثانيه بنزل فيلم اصرف خخخخخ

تسلمين عرس القناديل ,, والجايات افضل انشالله

كتكوت ماعليك السياسه كلها بجيبي ههههه ( ما يعقل ولد رئيس المباحث )

الله يعافيك بصراحه بردودكم هذي تخلوني اتحمس وابدا اقولكم قصصي ايام اول هههههه الله يعينكم عليها

والى لقاء قريب انشالله

اخوكم سيف الجزيره

وش فيني تحمست ؟؟

سوري ياجماعة غلط مطبعي :|