¨°o.O (مشروع ابو صوير ) O.o°"

~~&~~مشـــروع فتاة سوق السبت لرعايه عجيزات حرمــه وشيابها ~~&~~

((( حقوق التنفيذ واداره المشروع وصاحبه الامتياز شركه الراشديه المحتكره للقرقاص)))

ليس لدينا اغلـــى من عجيزات وشياب حرمه ... هم بركتنا هم عمدان حرمه اللي واقفه عليها

بصراحه هم شاغلين تفكيري ومضيقين صدري موب انا بس كل من عنده عجيز ولاشايب ..

المشروع هذا راح يستفيد منه الجميع وبالاخص العجيزات اللي ودهن يسسعن ويسيرن على رفيقاتهن

اللي مايقون يطلعن من دورهن .. الله يعظم اجرهن ..

وقبل ماقول المشرع بقولك بدايه التفكير في المشروع واسباب التفكير فيه..

** ** **

كنا هذاك اليوم طالعين نكشت في هالربيع الزين والمكان بالتحديد في (طراق زبده)..

تدرون عاد حريم وانواع الدرم من نربظ لين نقحص وانحن نزرط اول شي قهوه عاد من يخلصن قهوه

جببوا الغدى همين سواليف شوي ولايروحن يجنن قرقاص وبقرا همين يصلن العصر وبعدهـــــــا

عاد مسيره كامله كلها اكل قهوه وشاهي والحلى والمالح ( نعنبو بليسهم رايحن للبر مجاعه )

همين تظلم العين ضفوا القش ومشينـــــــــــا

^

^

^

بالله ذي طلعـــــــــه بر امحق

المهم اثناء ما حريمنا عقب الغدى راحن يجنن ويطلتزن (يطلقن ) رجيلاتهن من القعده

جلسنا نحنوا العوانس ( اللي يقالك ماعرسن )على قولتهم نهذر ونخطط ايه عاد بسم الله علينا لاحش ولا تقطيع جلود

كل حتسينا مشاريع وعقارات ..

كنا نتذكر .. شلون عجيزات حرمه يعانن خاصه اذا بغن يسعسع العصريه

الضعيفه تطلع من يذن العصر ولا تاصل الا المغرب( من العليا لسويدي ) كل من ركيباتها ولا

رجيلاتهم مايمديها حتى تسولف ولاتشرب فنجان قهوه..

هذا غير انواع البثاره اللي يتمتع بها بعض من مبزرتنا .. اما كوره يلعبون بها تجيكم مدرعمه

لضعيفه ولاهاه لازختها مع رويسها ولا مع ظهرها.

ولاعاد وقت الاعياد الصواريخ والشروخه تدهر.. تقولون حرب على العجز

وحده الله يذكرها بالخير تقول طلعت بسير على ناس ودخلت عليهم من دون عباااااه

مجموعه جذاعين .. يشبون صاروخ طار بالغلط وهي ماره الضعيفه وشب في عباتها

ماقدرت تطفيها .. فصختها ودقتها رجليه ...

وايضا من قصص العجيزات الضعيفات في الوطن العربي قصه ادرجتها اختنا مسلهمه في مسيل الكلبي في

موضوعها (( حرمه والكهرب ))

وهي قصه ام طلق اللي كانت رايحه لمستوصف حرمه تبي تقيس السكر وطفى الكهرب على حرمه وضيعت

الضعيفه

وماردها الا حدود ام الشــــــــــري .. (( الله يرجك يامسلهمه ياني مانسيت هالسالفه علتزتن في مخي ))

والكثير والكثير من القصص التي لاتحصى... الله يكون في عونهن بس..

طبعا .. من هذه القصص استنبطنا فكره المشروع

وقعدنا نفكر في مشروع يخدم عجيزات ... وعلى طول نتق في بالنـــــــــا شعيب ابو صوير .. يعني ربي معطينا شعيب

صغنون وش زينه.. ليه مايتم الاستفاده منه

وفكرنا في اننا نقلب مدينه حرمـــــــــه الى فينيسيا <<<< تسبيره بس مهب علينا قدهــا

طبعا ابو صوير يحد مدينه حرمه من الشمال .. فقلنا ليش مانخلي ابو صوير يكون دار مــــــــا دار على حرمه وونطلع منه فروع عباره

عن سواقي.. تمر في كل شوارع ..

بتسالون ليش هالسواقي ؟

اقولك ..

اولا راح نضع مركز كبير ورئيسي يكون مكانه بالضبط عند اماره حرمه وقدام النادي .. طبعا لاسباب كثيره وهو انه يكون تحت نظر

اولياء الامر.. الله يحفظهم.

هذا المركز راح يزود بقوارب صغيره ( الجندول لغير الناطقين بالعربيه )..وايضا راح يزود

بزحليقه ومضخ كبير..

الزحليقه عشان تساعد على دفع القارب بسرعه وايضا المضخ يدعم هذه السرعه..

وقت السيول مشاء الله ماراح نحتاج لتزويد الشعيب بالمياه .. لاننا عارفين اول ما ترش عندنا

يسيل ابو صوير ..

لكن ممكن نحتاج الى وايتات مويه وذلك فقط اثناء فتره الصيف ( والله الخساير )

قيمه هذه الخدمه راح تكون رمزيه وتكون ايضا عن طريق الاشتراك السنوي او الشهري ..

طبعا هذه الخدمه راح تسهل الكثير لعجيزاتنا وذلك انه بمجرد خروجها من بيتها اول قارب يمر من

عندهم تقمز فيه..

ويدور بها لين توصل البيت اللي تبيه همين تضرب فرامل ... وتدحدر .. لاراح تحتري ولدها يوديها

ولا متى يحمي السياره ولاتنطق عند

الناس لين يجيها متى ما قضت مسيارها اقرب جندول تركب فيه .

ولافيه بهذله مشي شوارع ولاتعب وتطقيق كور .. يعني راحه جسميه ونفسيه ..

حتى هذي الخدمه ممكن ايضا يسفيدون منها راعين البقلات لتوصيل اسرع للمنازل وبعد بيسفيدون منها

الاسر ايام الدراسه لاتوصيل مدارس ولاشي

يركبهم في القارب لين يوصلون المدرسه .. يعني ماعاد نحتاج توبيسات .. و ماعاد فيه روحه مبكرين

ولا اللي ماقضت لابسه ومرها

التوبيس .. تعقد تغربل وتلبس بسرعه وتروح للمدرسه كشتها هذا لونها وحوسه متى ماقضت وافطرت

راحت الدنيا من سعه.

ايضا من الهواجيس اللي طرت على بالي .. هو تحويل سوق السبت من مقره الرئيسي المعروف امام

مستوصف حرمه وجعله سوق متحرك .. وذلك ايضا عن طريق هذه الخدمه .. كل سياره من السيارات تحط

عفشها في قويرب من هالقويربات ومن يذن الظهر وهو يدور في هالسواقي .. وكل من بغى يشتري منه

يوقفه ويشتري .. واسهل للحريم بعد تلبس عبيتها وتنتص عند بابها لين يجي راعي البضاعه اللي

تبغها وتوقفه او تطلع واحد من عيالها يحتريه عند بويبها .

حتى حقين السيارات يرتاحون نفسهم من متى يجي مبكر ويحجز مكان خلاص معاد فيه حجز ولاهواش .

والكثير من الخدمات الاخرى .

مقتطـــفات:

1- المشروع فيه خدمه كبيره وخساير عظيمه.

2- الله يعين اللي عندهم بزران كل يوم طافحين من المياه . ماقضبوهم وقت السيول فيقضبونهم

والمويه كل يوم عند بابهم .

3- من عيوبه .. خوفك تجي وحده من هالعجز اللي الشوف عندها شجر .. وتقعد في هالقارب تدور

ماتدري وين الله حاطها فيه. والله البحله .

4-المشروع فيه استثمار لفلوسك وذلك عن طريق الاسهم . لكل شخص لايزيد عن عشر اسهم ( شركه

الاتصالات على غفله )

5- المشروع عباره عن خدمه وملاهي في نفس الوقت ( شلال ملاهي الروضه والخيمه .. قسمن بالله فله

عز الله اللي نزلوا مبزرتنا )

6- يمكن في المستقبل القريب ان نمد هذه السواقي حتى تصل الى مزارع حرمه وايضا حرمه القديمه

وممكن بعد نوصلها للمجمعه .

7- اخيرا تخيلوا شكل حرمه وهي مثل فينيسيا ظلماء ومافيه الا انوار القوارب <<< الله على الرومانسيه

راح تكون من اكبر مدن سدير السياحيه ويمكن تغطي على الرياض بعد .

واخيرا

ترى هالمشروع خنبوقه من خنابيق مخي ... يعني براءه الاختراع راح تكون لي<<< ضفي بس امحق براءه

اعذرونا ان قصرنا واستروا ماوجهتوا من هالدميجه

الله يسلم هالدميجه على هالخطه لو دروا عنتس اهل السياحة يبون يخطفونتس

اقووول انتبهي لا يصرقووون الفكرة

واكتبي عليها الحقوق محفوظه لا يتسرب الخبر

:

:

كل هذا وانا ما قريتها زين

اصبري علي اقراها وانقدها نقد ( مهوب كاش )

ترفع للاهميه

الاخ مشرف الرياضيه مرتاح

الف شكر لمرورك ومابعد شفتا شي والكورنيش والبحر في القريب العاجل

بس ادعمونــــــــــا

تحياتي

الاخ المميز فيد غانـــــــم

الله يجزاك الف خير ماتقصر وان قصر شي نبي نزهم لكم هماه

ويمكن نحتاج بير ارتوازي اذا ماعليكم كلافه تتطقون لنا واحد ( ماننعطى وجه )

الف شكر لمرورك وتعليقك

مشرفنا المبجل / حميان بيتش

<<<<< شافت رويحتها بنت بن خيخي

اجل تهقى الدعوه فيها خطف .. ومدامها خطف فيها فديه .. الحين مالقينا فلوس المشروع فنلقى فلوس للفديه

شكلي بصرف نظر

الف شكر لمرورك ودعمك وترفيعك

دميجتي والله قوطي صلصه فاضي

الله يخليلنا شيابنا يارب

تسلم لدعمك ومرورك

البصيره

سلمت جعلك ذخرن لحرمه وشيابها

الف شكر لمرورك

دلوعتنا دعـــــــــاله بني حرمه كلها فيتس

<<< سبه ومدحه مدري وشلون قلتبها بس امون

الله يغربل عدوتس يانتس مانتيب عاقله.. على حتياتس

الف شكر على مرورك وحرصك يالغاليه الله يحفظتس

وش هالدميجة ؟

هل تصدق أن هالفكرة من دميجة بنت من حرمة لالالا نصدق

ودتس بعد نمد مثعاب من كل بيت ونخليه يصب في هالوادي واذا غسلتوا السطوح تنزل الموية مع هالمثعب للموية

بصراحة فكرة رهيبة وخصوصا الاستفادة من السيول بدل ما تشربها الارض وبس

داااااااائما مبدعة خصوصا اذا شقص شعرتس ولا سبحتي .. تطير الجدايل وتستقبل موجات الابداع الكهرومغناطيسية

وخروا أبطلع احجز لي قارب

منتصه عند النصله..

ايه الحين تخيلين بس باتسر بيصير صدز .

وابد كافخي للي تبين مهب للخياط بس.

وترانا صدز مانحب نحش هه هه تقولين نسولف ( علينـــــــا هالحركات .. يافتاة )

اشكرك على مروروك وردك الذي عطري صفحتي

اختك فتاة سوق السبت

محيســــــــن << قاطه

لاعرض ولاطول

بس لاتكثر .. من الفقع تراه يجيب المر

تحياتوا والف شكر لمرورك

القروي

أمحـــــــــــــــــــــق دميجه.. والله ابد تقل تنكه كليجا .. فاضيه

ياخوي وش فيكم على بني حرمه .. ليه مقليلين منهم ... وقسم بالله ان بنيات حرمه يسوون بنات العالم كلهم الا انــــــا <<< ياشيخه يقالك منيب حرماويه..

بس والله انك ذهين فكره المثعاب شـــــــي شكلنا بنضيفهم في التجديد الجاي للمشروع.

تدرون عاد انا مخطاطاتي كثير وهالايام اهوجس افتح مطار في حرمه <<< ياشين اللي يشرب شاهي اخضر الصبح

<<<<< والله ماحس دمجتي الا هالموجات الممغنطه اللي تقول عنها شكلي بوقف البـث المباشر وبنخليه تسجيل

اشكرك على مرورك وتعليقك على الموضوع يا مديرنـــــــا

اخيتكم المشرفه : فتاة سوق السبت

وانا اقول وش هالريحه الزينه في الموضوع .. اتاريتس معطرته بردك يالغاليـــــــــــــــــــه

<<<< ماعاد تقدلها بلايزها من كبر راســـــــها

ياحبيلتس الكوفيره في الطريق .. همانا حجزنا .. هذيك الشقيرا اللي جازت لمعاليكم وهماه تراها في الطريق عجلوا علينا بالدفعه الاولى

وبعد قراءتي لردك بعد ماقريتي الموضوع جوابي كاالتالي : <<<<< (((( من الديوان الحرماوي ))))

بنات حرمه اليانعات الله يصلحهن ويكبرهن ويوفتزهن قررنا لهن الاتي ..

اولا تخصيص قارب لكل فتاة

وفيه باخره حديديه مجنده حفاظالهن جايتن مكرمه من وزاره التعليم هذي للي عاد ماتبي القارب

طبعا هذا تعويضا لهن عن ايام المعناه في التبيسات والمطامر في هالتبيس كنهن حبوب كيرم اذا جوا عند المطبات

((( اما الحركه في المدرسات شــــــي ))))

الله يرجتس ويصلحتس ويخليتس لهذا المنتدى ذخر يامسلهمه

وقسمن بالله ان ردك يسوى موضوع كامل.

تحياتي لتس يالغاليه

<<<< تول الله يذكر ايام البجلــــــــــي بالخير لاشفناه ولاشفنا نورتس

فتاة سوق السبت

ياجعلي مــــــــــاذوق يوم هاللي فوقي.. قولوا اميــــــــــــــــــــن

<<<< طارت بوهتها اثرتس يامسلهمه قشرى جعلهن مايسوقن ابد هالحريم

اخاف اتهاوش انا وياتس يوم والقاتس منسمه كفرات الشاص حقي وانا وراي كشتـــــــــه

هههههههههههههههههههههههههههههههههههههههههههههههههههه

لاتذكرينــــــــــي بالبوجلـــــــــــي

ماعليه نعوض السنه الجايه هههههههههههههههههااااي

<<<<< تنتظـــــــــــــر يوم السبت بفارغ الصبر ((( يمديكم على اللغه العربيــــــــــــــه )))

ياله نشوفتس على خـــــــــــــــار