حميان بيتش قام بنشر July 14, 2003 ارسل تقرير Share قام بنشر July 14, 2003 السلام عليكم ورحمة الله وبركاته حميان و أول يوم من الدراسة الفصل الأول :- مقبلات ( حمبص و زلطه ) :- 1. المشهد الأول : الوالدة وحريم الجيران : من صباح الله خير ..متجمعين عجز الجيران عند الوالدة و إزعاج هالعجز يوحيه اللي في اخر الحارة .. وانا كنت ادقدق ( بكورة الصبة) في الحوش ( حوش بيوت مال اول ... اللي في وسط البيت وعادتاً ما يكون ترابي ) و مير امزع هالكورة ولاها داخلتن في حجرة الحريم وما ردها الا جبهة وحدة من الحظور ( ام القروي ) .. ودار الحديث التالي : ام القروي : عمن يعميك ( ادغام بغنه ) جعلك للماحي خرعتنا جعلك لابوجعل ..( تقاطعها الوالده) : وراتس متسلطة على الولد تراه ما يدري الله يسامحتس يا ام القروي .. ام القروي : وجعن يوجعتس ( برضه ادغام بغنة ) أنتي وإياه الوالدة : تعوذي من ابليس .. هذا حميان اللي كلمتس عنه توصين ولدتس القروي عليه في المدرسه كوده يناظره ويفزع معه ولا هوب صيده يطقتس .. بس أمر الله . (( القروي طبعاً خبرة ثنعشر سنة في المدرسة الابتدائية ويقال : خبرته في سادسة (ج) ثلاث سنوات وسادسه ( ب) سنتين .. والباقي عليكم الحساب )) ام القروي ..( بعد ما هدت اعصابها ) .. ابشري والله يا ام صالح بس مثل ما وصيتس الفسحه عليكم وبالطحينية . الوالدة : ابشري . 2. المشهد الثاني البنات في الطايه : رقيت لم الطايه ولقيت البنات مع بنات الجيران كــاسرين لـهم جــصــه من الجدار و خاطين بها على الأرض خطة ( لعبة الخطة للبنات ) وعلى هوشتهم مع بعض رحت عند الخطه وقمت العب وامسح في هالخطه .. جو البنات يمي وصايحوا علي الله يعميك مسحت خطتنا وبدوا ينشدون : (( الولد مع البنات غزته الشوكة ومات ... قالت امه ليه ليه ..قال ابوه: ....... عــلــيه )) . و أنا طقتني العبرة .. وحسيت اني اهنت !! . وقفت معي اختي وقالت اسكتوا لا احد يكلم حميان .. هذا حميان يبي يدخل المدرسه الشهر الجاي وانتم قاعدين تتطنزون عليه .. البنات : ماشاء الله تعال ياحميان ووتجغفني وحده منهن .. وهي تقول والله ماضنتي هالكشره يبي يفلح في المدرسه .. الله يعين الاستاد عليك . من المشهدين السابقين تلاحظون انهم مركزين على دخولي المدرسة .. وهذا اللي ذابحني كلما جاء طاري في كل مكان قالوا انه يبي يدخل المدرسة .. وأنا تروعت وما ادري وش اللي يبي يصير إذا دخلت ... المهم ابريحكم من كثر البربره و ننتقل للفصل الثاني . الفصل الثاني ( ويا روح ما بعدك روح ) :- في هذا الفصل ابعطيكم قصة ( الوحـدة الـصـحية ) وهذي سالفتها :- وانا راقد وفي عز النوم .. جــــانا الوالد : حـــــمــيـــان ... ياحميان قم قامت عصبك واهتزت ركبك ..الخ ( ماحفظتها ) .. انهج علينا خلنا نروح للصـحية لا يصكون . المهم .. طلعنا انا والوالد وانحن نمشي في السكة مرت من جنبنا سيارة الفــلــيت وعيال الحارة وراها مطاردات .. وفي ظل تواجد كمية هائلة من الضباب .. مما ادى الى انعدام الرؤية في الحارة ... وهذا اللي شجعني للأنضمام لشلة المطاردين .. ووراهم .. وراهم المسكين الوالد .. فقدني .. وصار يتلفت ويدورني ورجع للبيت وقلب البيت مرتن في الطاية ومرة في المطبخ وحجرة الارزاق وبيت الدرجه ..( ولكن دون جدوى ) ,, وبعد ساعات .. دخلت البيت مــفلوووق ومقطعي مليان دم .. والوالد في استقبالي وكمل الناقص بطراقات يحبها قلبكم ... وخويكم شديد ما يهزه الريح لا ونانات ولا دمووع .. ( ايه هين ) الوالدة يوم شافت ابوي يصطرني سحبتني .. وقالت : ياللي ما تخاف الله تشوف الولد يقطر دم وانت بعد تطقه .. تعال يا حميان وتلمني وهي تطبطب على ظهري وتقول مسكين ياحميان وفي هذة اللحظات طقتني العبرة واشتغل الونان والدموع اربع اربع ... الوالدة ما قصرت الله يجزاها خير وســوت الاسعافات الاوليه للفلقه ( حطت اربع قروش على الفلقه و حزمتها بخرقة ) .. وبعد يومين فكو الخرقة وتهاوشنا انا واخواني على الاربع قروش .. صرخ اخوي الكبير صالح صرخة يسمعها اللي في اقصى الحارة قــــائلاً :- أحليبيه و كل واحد منا يقول انا اللي حاله قبلك وجت الوالدة سلمها الله وحلت المشكله وعطوني الاربع قروش ورحت للتكان وشريت بها كراش ( ميراندا).. ومن عند التكان جاني ابوي وقال يالله مشينا للصحيه نعضـبك ..(العضـابه : التطعيم ) وانا من قالها ابوي وتطقني ام الركب واطيح مكاني .. والوالد ماعنده وقت شالني على كتفه تقل قطمة رز .. ومانزلني الا عند الدختور .. اللي ماشاء الله عليه متولم بالابره ..من كبرها ما تدري وين اولها من تاليها ... المهم ولا اخفيكم سلمنا امرنا لله و رفعنا الثوب ونزلنا صروال السباحه ولقيناها يم الدختور ومع اول نغزة اشتغل الونان (( وياروح ما بعدك روح )) ولا ردني الا بيتنا والوالدة تستقبلني باحر التعازي لهذة المأساة (( لا عادها الله من دراسة )) الوالدة كالعادة يوم شافتني اصيح ولا اقدر اقعد على قاعتي ... وهي تشرطلي قريض وحلاو حلقوم .. وتوصي اخوي يجيب من ام الجيران عسكريم باغات ( بالتوت ) . ------ هذي نهاية الفصل الثـــاني ..... والفصل الثالث الظاهر نبي ننزله بعد اسبوع ... لان السالفه الظاهر طولت ... وماودنا تملون .. وعلشان ما يزعل علينا القروي انتظروا في الفصل الثالث : 1- اول يوم من الدراسة . 2- القروي وسيكل الاربع وعشرين . 3- سالفة المقصف . 4- استاد ابوكلبشه . وشيء ما مانيب قايله لكم لا هالحين ولا بعدين رابط هذا التعليق شارك More sharing options...
مغترب الشرقية حبيب حرمة قام بنشر July 15, 2003 ارسل تقرير Share قام بنشر July 15, 2003 خيال واسع وقمة السرد المقنع الذي ليشق له غبار في ليلة باردة في فصل الصيف الذي لا يأول جهداً في سلخ أجساد الانسان من مرتفعت الحيات ادري رتبها وتعرف وش السالفة..... برافو ... حميانوووووووووووو رابط هذا التعليق شارك More sharing options...
سيارةالفليت..1.. قام بنشر July 17, 2003 ارسل تقرير Share قام بنشر July 17, 2003 موضوع راااااااااائع حميان بس مب كنك جايب طارينا الحين وشوله تراكضون وراسيارة الفليت؟؟ مالكم حاجه؟؟ (عادشف من يحكي) يعطيك العافيه على هيك موضوع.. رابط هذا التعليق شارك More sharing options...
دلوعة حرمة قام بنشر July 18, 2003 ارسل تقرير Share قام بنشر July 18, 2003 ياحليلك ياحميان اثرك دعلة من يومك صغير تشكر على الموضوع الشيق رابط هذا التعليق شارك More sharing options...
جود قام بنشر July 18, 2003 ارسل تقرير Share قام بنشر July 18, 2003 اتهههههههههبل ......مرررره حلوه تسلم يدك الي الكتبت لكن .... تسنك نسيت البنات وهن في الطايه يفرشن الفرش من المغرب.............ومعهن الدربيل وشوله رابط هذا التعليق شارك More sharing options...
هواوي قام بنشر July 18, 2003 ارسل تقرير Share قام بنشر July 18, 2003 السلام عليكم رائع كالعاده اخ حميان وحنا على احر من الجمر ننتظر الفصل الثالث رابط هذا التعليق شارك More sharing options...
حميان بيتش قام بنشر July 19, 2003 الكاتب ارسل تقرير Share قام بنشر July 19, 2003 السلام عليكم ورحمة الله وبركاته هــــــ ــــــلا بــــــشلـــــة الأنـــــــس اشكر جميع الزوووووووار ... اللي ما عليهم تعقيبات و تدقيق الاخــــوان والاخـــوات : مغترب الشرقية حبيب حرمة.... تسلم يالغالي .. بس رتبناها وطلغت فشوش سيارةالفليت..1...... شــوووكرن .... الله لا يخلينا من هالريحه فاقدينها من زمان .. دلوعة حرمة ....العـــفووو ... دعـــــله ... والى هالحين الله يكفيكم الشر جـــــود ... الله يسلمك ... يفرشون البساط وفوقه الفرش... ويرشون جدران الطــاية .... همــين ... يسوون اجتماع ( مغلق ) و يلعبون ( حدارج بدارج ) هــواوي .... الله يعطيك العافيه ...ده بس من زوئك وتـــــحيــــــاتـــي للجــمــيـــع خصوصاً اللي غايبين رابط هذا التعليق شارك More sharing options...
العليمي قام بنشر July 21, 2003 ارسل تقرير Share قام بنشر July 21, 2003 بصراحه قمه من الخيال اقول اخوي حميان نبي زياده من الابداع ومعليش ان اخونا واخواتنا في المنتدى بس يتفرجون ولا يشجعون ليش ,,,,,ليش لو تروح وتشارك مره وحده في اى منتدى تشوف الناس يطيرون بك والقهر انت شكلك من اهل حرمه ((( والدليل الاسم الى مايعرفه الا واحد من اصول حرمه مهو من اهلها بس ))) وانا اطالب من المشرفين يحاولون يشوفون حل وسريع قبل الانتقال .... ولا ويش رايك رابط هذا التعليق شارك More sharing options...
هواوي قام بنشر July 24, 2003 ارسل تقرير Share قام بنشر July 24, 2003 حميان بعذرك ما فلحت في الدراسة كله علشان العضابه مسكين ..معقد ... بس يالله عجل علينا بالجزء الثاني خلنا نشوف قصتك في المدرسه حميان في كل مكان ....... خيال لاصار ولا كان هاه وش رايك ... لا اوصيك على مواضيعي رابط هذا التعليق شارك More sharing options...
حميان بيتش قام بنشر July 31, 2003 الكاتب ارسل تقرير Share قام بنشر July 31, 2003 السلام عليكم اخواني هواووووي: ابشرك معي شهادة خامسه ومبروزها بذهبي .. لا يهمونك العذال العليمي : يا اخوي اعذرهم ما جابو معهم اعلام وطبول وش تبيهم يشجعونك به تشكرووون على المرووور والشرطه تحياتي رابط هذا التعليق شارك More sharing options...
كنج السهيلات قام بنشر August 3, 2003 ارسل تقرير Share قام بنشر August 3, 2003 وهي تشرطلي قريض وحلاو حلقوم .. وتوصي اخوي يجيب من ام الجيران عسكريم باغات ( بالتوت ) . يووووووووووووه وين جبت هالمفردات منه الله يقطع ابليسك هههههههههههههههههههه ياعنك انك مهوي ومنتب صاحي يامشرفنا ياحبينيلك رابط هذا التعليق شارك More sharing options...
فتاة سوق السبت قام بنشر August 3, 2003 ارسل تقرير Share قام بنشر August 3, 2003 حميااااااااااااااااااااااااان ابداااع بلااااااا حدووووووووووووود تصويرك في المواقف جدااا ممتع ويهبل اثرنا موب لحالنا مهبل كل اللي هنااا نص لفه واولهم انت حميااان <<< ترها تمدح تحياتي لك رابط هذا التعليق شارك More sharing options...
المستشار العام قام بنشر August 5, 2003 ارسل تقرير Share قام بنشر August 5, 2003 الأدب الساخر من أصعب وأجمل أنواع الأدب ، وحميان بيتش موهبة برزت من خلال هذا المنتدى وفي نظري ان حميان لو حاول الدخول في مجال الكتابة الكوميدية والدرامية سواء للتلفزيون أو للاذاعة فاننا شنشاهد كاتبا فذا سيتسابق على شراء نصوصة الكوميدية الكثير من الممثلين 00 انا لا ابالغ فالساحة اكبر دليل على ما اقول والا فما رأيكم ؟ رابط هذا التعليق شارك More sharing options...
حميان بيتش قام بنشر August 24, 2003 الكاتب ارسل تقرير Share قام بنشر August 24, 2003 السلام عليكم الاخت _ فتاة سوق السبت شكراً على التعقيب .. وبالنسبه للمهبل واجد بس لا تدققين الله يرحم زمان اول .. ما شفتي شي الاخ _ المستشار العام اقول شكلك توك جاي من مصر .. ومتأثر ... شكراً على هذا التشجيع .. ومدري وش اقول لان كشرتي تعفطت وغطى الغمص عيوني ولا اقدر اقول الا كثر الله خيرك حياكم الله القابله عندنا رابط هذا التعليق شارك More sharing options...
Recommended Posts
من فضلك سجل دخول لتتمكن من التعليق
ستتمكن من اضافه تعليقات بعد التسجيل
سجل دخولك الان