من الحمار ؟

حمار في غابة الحيوانات

كان يا ما كان في قديم الزمـان .. وحتى في هذا الزمان ........ كان هناك غابة فيها حمار وأسد وثعلب ونمر وقرد .. اكيد غابة حيوانات وش تعتقدون عاد فيها .... المهم

الأسد - ( ملك الغابة) كان طاقة الجوع ورايحن في خرايطها وكان معه الثعلب ( رئيس الوزراء ) اللي ما يفارقه في حله وترحاله ( حلوه ..صح ) .

قال الأسد : يا ثعلب رح شف لي اكل تراي ما افطرت اليوم المعزبه خامدتا لا قهوتني الله يصلحها و لا سوتلي فطور يالله عجل علينا لأخليك كوفته انت وجبهتك !!

قال الثعلب: كوفته ؟؟ لا لا ، مادام الحمار موجود ابجرجرة لك على خشته لو تبي تسويبه مقلقل خذ راحتك .

قال الأسد : طيب يالله عجل علينا .

راح الثعلب في زيارة مكوكية إلى كوكب الحمير ... واول ما دخل حوشهم ( قصدي كوكبهم ) جاء رئيسهم لم الثعلب وقال هلا والله برئيس الوزراء .. توها ما ينور الحوش.. معليش العيال لاهين بالمذاكره هاليومين علشان الامتحانات والا ذبحتلك واحد منهم على الغداء .. قال الثعلب : لا لا .. لا تكلف انا ابيك بكلمة راس بيني وبينك ..... صرف هالحمير وخلنا نقعد انا وياك . فهموها الحمير ( ما شاء الله عليهم ..يفهمونها وهي طايره ) ايه يحلفون

قال الثعلب : انتبه ترى الأسد هاليومين يدور له على ولي عهد يمسك الغابة بعده واعتقد ما فيه اصلح منك تعال معي للملك علشان تعطيه من هالرخيص كودك تجوز له .

قال الحمار: هل كيف أنت متأكد يا ثعلب؟ ( بدت تطلع الفصحى )

قال الثعلب:اكيد .. وش دعوى 

وصار الحمار يفكر بالمنصب الجديد وبدأ يخطط بينه وبين نفسه وش هو ناوي يسوي اذا صار ملك

طبعا وصل الحمار عند الأسد وقبل ما يتكلم هجم عليه الأسد وضربه على رأسه وقطع آذانه ، وطق الفركه وأنحــاش الحمـار وهو يقول على مين العبوها على غيري

وهكذا (( فشلت خطة السلام الأولى!! ))

قال الأسد: يا ثعلب هات لي "الحمار" وإلا والله لأخليك شرايح على خبز توست

قال الثعلب : قال لا يا طويل العمر .. ما يحتاج شرايح ولا توست ، ابجيبه لك بس الله يسلمك اذا جبته لك عطه الساخن وقلبه مرتن وحدة .

قال الأسد : اقول عجل علينا وبلا خرابيط ورعان .لا ارحم الله هالخشة

راح الثعلب للحمار مرتن ثانيه وقال للحمار : صحيح انك حمار ولا تفهم وشلون تترك مجلس ملك الغابة وتضيع على نفسك هذا المنصب، صحيح انك ما تستاهل الخير ، خلك في في حوشك هذا انفع لك اجل وجهك وجه ملك .

قال الحمار : العب غيرها يا ثعلب تضحك على مين ؟ وتقول انه يبي يخليني ولي عهد وهو ناوي ياكلني .

قال الثعلب : يا حمار، انت خبل ومستعجل ، ولا عند صبر وفاهم غلط

قال الحمار : طيب وراه قام وخبزني مع هامتي وقطع اذاني . يا اخوي أي فاهم غلط ؟

قال الثعلب : أنت غشيم يا حمار، والا وشلون بكره تبي تركب التاج على راسك واذانك هذي طولها . هو ناوي يشيل اذانك علشان يركب التاج على راسك ، ما قلت انك خبل وفيك قل صح .

قال الحمار : هه أع أع أع صدقت يا ثعلب ايوالله اني خبل ومافكرت بهالسالفه وهالأسد الطيب شكيت فيه ( اعوذ بالله من الشيطان) وسوس في راسي !!

رجع الحمار مع الثعلب إلى عرين الأسد مرتن ثانيه.

قال الحمار : أع أع أع يا أسد أنا آسف فهمتك غلط بس العذر والسموحه

قال الأسد : بسيطة ماحصل الا الخير.

قام الأسد من مكانه وقرب من يم الحمارو ضربه مرتن ثانيه مع مقفاه وقطع ذيل الحمار، وارتاع الحمار وعض شليله وانحاش

ارتفع ضغط الاسد وخربها و قال : انت تبي تجيب هاالحمار وإلا ؟؟؟؟؟؟؟؟؟

قال الثعلب: لاتكمل يا ملك الغابة ، ابشر بسعدك .

((( وهكذا تكون قد فشلت محاولة السلام الثانية )))

رجع الثعلب للحمار(كلاك ثالث مرة ) وقال : انت وش قصتك يا حمار ؟.

قال الحمار: أنت نصاب وترقص بي ، قطع اذني ومشيناها وهالحين يقطع ذيلي بالله عليك وش عندة ناوي يركب تاج على .......... ( مشفرة ) والا وش قصدة بعد ؟

قال الثعلب : يا حمار شغل عقلك،

قال الحمار : طيب لا تقول حمار علشان اشغل عقلي

قال الثعلب : قل لي بالله عليك وشلون تبي تجلس على كرسي الملك "العرش" وذيلك من تحتك

قال الحمار : ,والله مــاجت هذي على بالي .. ايو الله وشلون ابجلس وذيلي تحتي ..!!

قال الثعلب : علشان كذا قال الاسد لازم نقطعه قال الحمار : ايو الله انك صادق يا ثعلب، لو سمحت ياثعلب ودني له خلني اعتذر منه لا يسير ماخذن في خاطره .

قال الثعلب : بس ترا هذي اخر نوبه . ماعاد فيها خيطي بيطي

قال الحمار : ما عليك اتكل على الله ثم علي . ومالك الا اللي تامر به

راح الثعلب والحمار معه إلى الأسد مرة ثالثة.

قال الحمار: أنا آسف يا أسد، ومستعد لكل اللي تطلبه مني انت تامر وحنا نطامر .

قال الأسد : لا تهتم هذه مجرد اختلافات في وجهات النظر. ومشي حالك

قال الأسد وهجم على الحمار من رقبته والحمار يصيح "وين ابحط التاج ، وين ابحط التاج ... الخ وفي هذه اللحظات الحمار يطلق أنفاسه الأخيرة ويودعكم ( الله يحلله ويبيحه ).

قال الأسد : يا ثعلب خذ اسلخ الحمار

قال الثعلب : ابشر يا ملك ، بس تبيه مفطح والا ثلاجه

قال الأسد : لا خله مفطح وجب لي التسبدة والريه والمخ .

جاب الثعلب المطلوب بس كـــــان ناقص المـــــخ

قال الأسد : يا ثعلب وين المخ؟

قال الثعلب : يا ملك الغابة والله مالقينا مخ !!

قال الأسد : تسيف تسذا ؟

قال الثعلب : مــا قـال لــي لو كان الحمار له مخ ما رجع بعد ما قطعت أذانه وذيله .

قال الأسد : صدقت يا ثعلب فأنت خير صديق .

(( وهكذا نجحت خطة السلام الثالثة )).

الممثلون

الأسد : اليهود

الثعلب : أمريكا

الحمار: سأترك لكم اختياره فهم كثيرون ولا نستطيع أن نحدد شخصا واحدا

مع تحيات حميان وسباحين ايام زمان

توني ادري ان كاتبنا في بوابه الساخر حميان لديه ميول سياسيه

فعلا تصوير ... رائع وسرد منمق <<<

صورت الحقيقه في طبق ساخر جعلته اكثـــــــــــر حماسا وضحكا

بصراحه ابـــــــــدعت في سرد حقيقه عالمنا .. باسلوب رائع..

كما عهدناك ياحميان ... الابداع والتجديد اختصاصك

~~~~ فاصـــــــــــل اعلا نـــــي ~~~~

يالله ياكريــــــــــــــم ... تخفس بهاليهود والامريكان في سااااااااااااافل ارض

يالله انك تحط حيلهم بينهم .... يالله انك تسلط عليهم من لايرحمــــــــــهم..

ياجعــــــــي اشوف فيهم ماسوووه في عبادك المسلمين..

يالله انك تقلعهم عنا .. وتشتت جمعتهم وتخلي كل واحدن منهم في شنق ..

يارب ياكريم انك دمرهم تدميييييييييييييييييييير

~~~~~~~ عدنــــــــــــــــا ~~~~~~~

الف الف شكر يامشرفنا ... حميان .. ممهما وصفنا سباحينك لن نعطيها حقها ..

تحياااتي للجميع

وفي انتظار سبحونات جديدات

اختكم وسكرتيرت الساخر فتاة بنت سوق السبت

والله أنهم حمير

وهم كل فترة يجتمعون يختارون حمار يسلمونه للأسد

والظاهر أن هالحمير مقطعه ذيولهم مابقى الا المفطح

مشكوووور على هالسالفة ولو أنها تروع وبتودينا لجوانتمانا نصير مشرفين فيذاك

مبدع ... مهبول ... سياسي ... بتورطني ... إلخ

موضوع في الصميم ويحتاج إلى التفكير