الدب ـبـة

مقدمة :

والله هذي البلشة احس ان المقدمة اهم شي وانا والله ماهنا زود مقدمات ..

مع اني من كبر هالكرشة الماثلة امامكم يسموني مقدمة ابن خلدون .

عاد ذا الكرشة تقل بلكونة وقاعدن فيها مصرية وعيالها ومعهم سندوشات ملفوفتن بورق قرنار (يعني جرايد)

عشان كذا خذوا السالفة .. وافصلو الخط عشاني بعت اسهمي بالاتصالات السعودية ..

بالمدرسة :::::[/ALIGN]

من يوم تطلع ريحة مخيسة في الفصل يقول العريف : إستاد استاد أقوم أشمهم . ويدور يشم كل الاولاد من ورا واللي فيه ريحه يسكر العريف خشمه ويتقرف ويأشر على الولد وهو ساكت والولد ياغافل لك الله ، ويطلعه الاستاد برا الفصل . انا طبعا بدون شم طوالي يطلعوني برا لاني مجرم حتى تثبت البراءة . كنت مثل صدام يوم تقول له امريكا (يانفتشك ثم نضربك والا نضربك ثم نفتشك) واذكر مرة طلعت الريحة بالفصل وانا غايب اتصل علي الاستاذ وكلمني وهو لابسن كمامات الحرب : مية مرة اقول لك يادب لاتتعشي بيض مسلوق خيستنا . المهم ذكرني بكرة اضربك اذا حضرت المدرسة .

كل حفلة مدرسية لازم اشارك بمسرحية المصارعة الحرة وانا انهزم من بزرن يدخل من بين رجولي اذا طحت ، ماهمني اولاد المدرسة بزراين ويضحكون ، لكن قاهرني المدير قاعد بالصف الاول ويكركر وهو شايفن الحركة مية مرة ومن صغر كرشته عاد اللي تقل ((طاولة مكتب عقاري متنفخة من كثر الشاي اللي يتكبكب فوقها )) .

الاستاد يقول لي : (اراك ترتدي فروة صنعتها باضراسك) وانا مستانس مافهمت شي احسبه يمدحني بقصيدة شعر ، حتى مرة قلت له من زود الوناسة :: اعطوه الف دولار قهقهقهقه (ضحكة الاعراب) فما كان من الاستاد الا ان كفخني بالطباشير اللي كانت بيده .

واحد بزر وانا بخامس ابتدائي مايعرف يعبر يقول لي مرة ((ياخي احس انك كثير ؟؟؟)) عاد انا اناظر فيه وتمنيت اني مدرس تعبير كان اشلخ جبهته بالدفتر …وبصراحة تاكدت اني كثير يوم ان سواق التكسي الاصفر نزلني من السيارة عشان يركب بدالي ثلاثة بنغالية ؟؟؟ ومانسيت ذاك الولد اللي يقول لي ياخي انت تشبه حرف D اذا كنت واقف سرا عند المقصف .

قررت اني اسوي رجيم عشان شي قاهرني ودي اشوف سر بطني اللي عمري ماشفته !!!! وعشان اذا صرت نحيف اصير مانيب دب ((احلف بالله)) ، وعشان اصير حرف I اذا مسكت سرا بالمقصف وعشان ما اكتب فيني بالاقلاع مرتن ثانية . (كني كثرت العشانات هنا) اجل عشاكم معنا ذا الليل …. اقول (يازينك ساكت وانت باصم لك على جمرة خبيثة)……

[ALIGN=CENTER]بالمستشفي :::

رجلي كانت تعورني وحسيت انها مكسورة قال الدكتور ديفيد الامريكي بالتخصصي : مافيك شي (وبدون مايكشف علي حتى الامريكان حاقدين على الدببه ) قلت : شف رجلي متورمه . فصخ نظارته وقال د .ديفد : نعنبو ابليسك كلك انت على بعضك وارم يعني مالقيت الا مواطي رجليك ماتبيها تتورم ؟؟؟ د. ديفيد . شكله جاي من منفوحة امريكا ..

في المســـجد ::

رايح اصلي وانا واقف مستقيم بالصف بالمسجد واحد من بعيد ياشر علي بطني ويقول ارجع شوي استو مع الصف ورجعت شوي وقال : ارجع شوي (ويناظر الكرشة) ياخي متقدم على الصف ورجعت شوي لين صارت كرشتي ويدي مستقيمة تن مع الصف سكت ذاك الملقوف عشاني تساويت معه في الصف ،، لكن طلع علي واحدن ملقوف من الصف اللي وراي يدفني ويقول (وراك رجعت على صفنا الله يجزاك خير ؟؟؟؟؟)

في الشـــارع ::

كنت واقفن بالشارع وجنبي اصدقائي (عاد مهومب جنبي بعيدين شوي عشان اذا بغيت التفت ماينصدم احد منهم ويطيح على جبهته) واذا بليموزين قادمن من المطار وتنفتح دريشة الباب اللي وراء وفيها وحدة تاشر جهتنا انا والشباب . طبعا كل الشباب طيران للسيارة أي نعم أي خدمة (يذكروني بسوق العمال بالبطحاء وكل واحد منهم سباك وكهربائي وطبيب بنفس الوقت) ؟؟؟ طبعا انا مستحيل افكر انها بتناديني قالت لهم كلهم : لا ابي خويكم الثاني اللي ناصح شوية (((يازين ذا العيارة بعد عمري هي والله )) وقتها حسيت اني ازددت خجلا وتقدمت نحوها وجلا وقلبي مفعم بالسعادة والغبطة قائلا : هاه وش تبين ؟؟؟ ((ياشين هالكلمة …((

قالت لي وانا احس ان هوا مكيف السيارة يصرقع بخدودي ويطلع معاه ريحة عطر باريسي ::: ابيك تدلني علي البيت حقكم مو قريب من هنا ؟؟

هي قالت بيتكم والا ماقلت وانا اللي امشي قدامها مثل الغزالة اللي فاركتن من اسد متربصن بها وهو حصران مرة ، المهم وصلت البيت وتكيت صدري (أي صدر ياناس تقل ثنين بزارين متعلقين فيه وهم مبوبزين ) المهم تكيت بزاريني قصدي صدري على دريشة اللموزين قائلا لها : هذا هو بيتنا ؟ ولمحت عيناها اللي تقل حبتين زيتون اسود حطتها الشغالة وسط صحن جبنة بيضا.

وبعد ماوريتها بيتنا التفتت عن بيتنا واشرت على ثاني باب بعد بيتنا وقالت : اجل ذاك بيت ابو اسعد .

قلت لها مستغرب : ايوه هذاك بيت ابو اسعد اللي ورا بيتنا .

قالت مبتسمة : مشكور احنا جايين من جدة وابو اسعد قال لنا وصف بيته كدا بالزبط انه تاني باب بعد بيت سمين شارع النهضة وسواق المطار عارف مكانك هنا طبعا ؟

المهم راحت بيت ابو اسعد _ اللي يبي له من يلعن خامسه _ (خامسه باء ولا جيم : اقول انطم ). وانا التفت على اصدقائي ومدري وش اقول لهم : الناس تقول ثاني شارع بعد الفيصلية بعد المطعم بعد البنشر اما ثاني باب بعد بيت الدب !!!

اقول :: سيبوني اعيط (ابكي) ، ياناس فيني عياطن يكفي له ديرتن ماعمرها عيطت .

الفوائد :

1- اذا كنت سمين وجيت تصلي مع جماعة خلك الامام والا وقف جمب جدارين لانك مستحيل تستقيم مع الصف

2- الين صرت منتب سمين اسكن جمب بيت واحدن سمين عشان توصف بيتك لاهل جدة وانت مرتاح

3- اذا عرفتو بيت ابو اسعد العنو خامسه نيابة عني وماجاكم عليَ ؟؟؟؟؟

منقول.سراب

قسم بالله حالتك حاله

ماعاد هي كرشه شكلك اذا جيت تركض او تتدربى كلها سوا

وابو سعد إظاهر اني بعلمه صدق

بس اللي مثلك والله ما فيه امل ينحف

لاني والله العظيم اذكر واحد مسويله جدول للرجيم

ومافيه الا اكل من هالخضار فطور وغداء وعشاء

وبعد اسبوع الله لا يهينه زاد خمسه كيلووو خخخخخخ

عقبها حرّم يسوي رجيم وتأقلم مع وضعه الحالي

يعني بالمختصر ياحبي

لازم تتأقلم مع وضعك الحالي

وآسف على الإطاله

سلملم

ههههههههههههههههههههههههههه

الله يرجك يا؟؟؟ اصبر ابنسخ اسمك!! يااا GOLDEN-EYE..

والله انك منتهي؟؟

بس تصدق جازلي مررررررررررة موقفك في المستشفى مع ديفد وموقفك في المسجد والفوائد؟؟

نقل رااااااااااااااااااااااايق شكرآ لك....................

ههههه ..انتم ما سمعتوا عن افلام ترعب الدببه ...فلم الميزان هذا مرعب جداً وفلم متى اجد سريّ وهذي الشركات تتنافس تبي تسوي افلام ..خخخخخخخ .يامال الثانكس والله

الله يرجك يا GOLDEN-EYE

على موضوعك المنسم

عفواً (( المبنشر ))

لاتقصر معنا نبغى مثل هاذي الوضيع دائماً