الفلم الرومنسي ( احبـــــك يـاتمــســـــــاح )

السلام عليكم

مساء الشاهي والشابوره

نعرض لكم هذا الفلم الخطير وهو بعنوان احبك ياتمساح

خلونا نعتبره سينما

شروط الدخول :

1 - غير مسموح بالدخول لمن تقل اعمارهم عن 18 سنه لان هذا الفيلم يحتوي على لقطات مخيفه للغايه ( البطل بيفصخ فنيلته العلاق ) لذا نرجو عدم اصطحاب بزارينكم .. هماه

2 - إدارة السينما غير مسؤولة عن قواكم العقليه بعد نهاية الفيلم وذلك لأحتوائه على مشاهد من الصعب على الانسان البشري الآدمي العادي تحملها ( البطل يبلع لسانه ويحاول يطلعه بنفسه )

3 - يمنع منعا باتا دخول المزايين والمماليح وذلك خوفا من ان تحت شعورهم مع بداية الفيلم

- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -

فيلم احبك أيها التمسااااح

فيلم من بطولة : الممثل الشهير ومحطم قلوب العذارى واللي يقدر يصفق سبعة ببقس واحد وتدعسه الدبابه ولا شي عنده اقاله تدغدغووه ويقدر يطيح الطياره بنبيطه .. النجم : عبــــااادي كــــبده

فنانة الجماهير : مـــزنه المنتفــــشه

إخراج : باسكن روبنز

- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -ـ

حقااائق

حقق هذا الفيلم اعلى ايرادات لعام 2004 م في شباك التذاكر وهومرشح لجائزة اوسكار للسلام والروابي بعد واعتبر بحق قنبلة الموسم ، عيبووه الوحيد كل ما عرضناووه لازم يصير بووه ضحايا يحوول من الجمهور عشان تسذا ادارة السينما تخلي مسئوليتها عن اي اضرار تلحق بالمشاهد العزيز سواء كانت هذه الاضرار عقليه او جسديه .... هماه

- - - - - - - - - - - - - - - -

الى الفــــيلــــم

= = = = = = = = = = = = = = = = = = = = = = = = = = = =

يبدا الفيلم والبطل يمشي بالشارع ويشوف لووه ذيتس البنت اللي تقطع الشارع ولا انتبهت لراعي القلابي اللي مسرع الله يهلتسووه ، حس البطل انووه لازم ينقذه ، مير يقمز ذيك القمزه ويرفس القلابي مع الرفرف اليمين ويقلب القلابي ( عااادي كل شي جايز ... فيلم مصري ) المشكله القلابي يوم قلب زحف وضف معووه سبعة اوادم وخمس سيارات ، اتجه البطل عبادي كبده للبنت وشافه تلقط عودان الكراث اللي طاحن منه بالارض مير بكل حنان الدنيا يقوم عبادي كبده يلقط معه العودان ( واااااتسبديه على الحنان ياناس .. وه بس ) بعد ما زرف لووه كم عود بمخباتووه حق الطريق ، وسأله : انتي وش اسمتس يالمزيونه ؟؟ ترد عليه وتقول : اسمي مزنه وينادونن ام خديدات ويدلعونن الدبيه ، ومير تلتفت لووه البنت وتقوله : ياااحبيلك ( كلمه مأثوره عند القصمنجيات ) مشكووور وما قصرت ياخلفهم انك انقذتن من الموت ، انا لازم ارد لك جميلك اطلب اللي تبي ؟؟ قاله عبادي كبده : ودي انا وياتس ناخذ فره بالدائري ببريده بكشخبتس عند العيال انتي وراتس شي ؟ قالت : لا ياااحبيلك ، قال : اجل جيبي معتس الكراث نمزمز عليه بالطريق ، ينتقل المشهد داخل سيارة عبادي كبده وهو مشغل المسجل على اغنية : فلت شعرها وانتثر كنه الليل ( حقت عزازي ) ، مير يسفط عبادي كبده عند البقاله بيشري تتن ابو بس ، يوم طلع من البقاله مير يشوف مزنه تصارخ وشايلينه اثنين ( عيال التسلب <<< والله ياهو تحمس قوه ) بيخطفونه وهو اللي يصرخ : مزننننننننننننننننننننننه لاااااااااااااااااااااااااااا ، مير يلقط الكراث اللي طاح من ايد مزنه يوم يشيلونه همن بيلحقهم ، بس كانت فيه هيلوكبتر تحتريهم ، طارت الهيلوكبتر وبه مزنه المنتفشه بس عبادي طلع ذهين وسجل رقم لوحة الهيلوكبتر بورقه على القلم ، قعد عبادي ياكل من كراث مزنه ويفكر شلون ينقذه ؟؟ وفجأه وهو قاعد يزرط بهالكريريثات غص عبادي بعود كراث وقعد يتدربى على الارض ويصقع راسه بالجدار يبيه كوده تطلع بس ماااش عيت تطلع ، يوم خربه عبادي كبده ودخل ايدووه بسط اثمووه وقام وسحب الكــوره

( عود الكراث صار كوره من كثر ما تدربى على الارض ) كوره مدوره صغيره زي اللي تجي بأول درابزين الدرج ويجي عبادي كبده يتعبث به ولا يوم انقسمت الكوره نصين لقى به ورقه صغيره ( اثره مغبيتن ورقه بين عودان الكراث ) ومير يستفرب وشي ذي وناظره الى مكتوبن به : طريقه عمل طورطة الفول مع محشي الفلافل . يوم سمع عبادي كبده صوت الهيلوكبتر وهي راجعه مره ثانيه وهو اللي يقوم ويفصخ ثوبه الكاروهات ويبقي الفنيله العلاااااق ( آآآآآآآآآآآخ بف بف طربمبموووووووووووو طععععععععععععع طع .. هذي اصوات سبعة متفرجين ما احتملوا المنظر وطاحو من فوق مع اننا منبهينهم واغشي عليهم ) ويفصخ بنطلونه الشاموا ( مع انووه بعز الحر) ويطلع الشورت الاخضر ، ويطلع عبادي كبده نبيطته ويحط به ثلاث حصيان ويطلقهن جميع مرتن وحده ، وحده بنطت بمروحة الهيلوكبتر ، والثانيه شقت تانكي البنزين شق والثالثه جت براس السواق ، يوم طاحت الهيلوكبتر طب منه عشرين رجال قبل لا تنفجر وكل واحد منهم معووه مسدس ورشاش ومدفع زي حق العيد ، يوم قبس عبادي كبده وهو اللي يجدع النبيطه على جنب ويطب عليهم وهو يصرخ : والله لادعيكم كشنه اليوم ياهالدشير بأقلبه خبيتي عليكم اليوم وييين مزنه المنتفشه يالله اعترفوا ، ويمسك عبادي كبده اول واحد بهم ويعفطه هاك العفطه اللي يحبه قلبك لييين صار مدور تسنووه كوره ويدربيه على اخوياه ويصوب اربعطعش واحد مرتن وحده ، ولا بووه واحد مصوب عليه المدفع وبيطلق عليه بس اشوا شطفت الطلقه عبادي كبده وجت بالخمسه الباقيين اللي وراه ، ويجيك عبادي كبده ويمسك الضعيف منهم مع اذانه ( انا قايلن لكم انووه نجس ) ويرفعووه فوق ويقول لووه : ويييين مزنه ومن اللي اخذه ؟ رد عليه قال : المعلم بطاطس هو اللي قال جيبو مزنه المنتفشه وخوذو منه وصفة طورطة الفول ومحشي الفلافل ، بس حنا مالقينا الوصفه ونكسنا قلنا يمكن طاحت منا ولا منا خابر يعني والله وياخذ عبادي كبده وصف البيت اللي فيه مزنه المنتفشه ، ويحتري ليين مرت سياره تمشي مليون ومير يجدع الضعيف اللي كان ماسكه مع اذانووه ( نجس بس ما صدقتون ) وصل عبادي كبده للبيت اللي بووه مزنه وشاف بئاعلى البيت مزنه تراكض والمعلم بطاطس وراه بيذبحه ابن التسلب ومير تقبس مره ثانيه مع عبادي ويجيك مشوت لم الشجره ويطب عليه ويتشقلب ويوقع بالسطح ويتعلق بالحاجز ويطب بالبلكونه ويدخل عليهم ومير تشوفه مزنه ومير تصرخ هاك الصرخه المشهوره - وااااعباااادياااااه - مير يوخره عبادي ويخليه ورا ظهره وهو اللي يفصخ فنيلتووه ( طخ طع بوووووم طعععععععععععععععع .. اصوات اللي بالدرجه الثالثه تغمى عليهم وطاحو من فوق على حقين الدرجه الثانيه ) يوم فصخ عبادي كبده فنيلته ومير يبرمه يبرمه ويمحط به المعلم بطاطس وهو يقوله بتذبحه هاه ياليهودي انا اوريك الحين شغل الله يالتسلب ، شوي وينفتح الباب ويدخل من عنده ضابط مصري اد الدنيا ( بس قصم مدري وش اللي جابوه ذا ) ويقول : محدش يتحرك المكان كله محاصر اي حركه حضرب بالمليان سلم نفسك يامعلم بطاطس المكان كله محاصر اوعا تفكر بالعطه

وفي النهاية تم القبض على المعلم بطاطس وعصابته بعد محاولتهم الفاشله في اكتشاف سر خلطة طورطة الفول ومحشي الفلافل .

وقد تسلم عبادي وسام التبرع بالدم من الدرجه الاولى نتيجة لنجاحه في امتحانات الثانويه العامه قسم اساليب كميه تخصص زراعه

ههههههههههههههههههههههههههههههههههههههه

هههههههههههههههههههههههههههه

ههههههههههههههههه

الله يرجك بس يا ابو ناصر والله اني كنت متحمسه مع القصة بعد هالتحذير في اول القصة واخرتها يبون الوصفه !!

وش يبون بها يا مال الماحي ؟؟

بس والله القصة حلوووه ..

خصوصا اللهجة القصمنجيه التي تغلب على الحكايه >>> يقالك ناقده بنائه اقول على شحم

تسلم والله يا اخوي ابوناصر والله متعودين على ابداعاتك وننتظر المزيد ..

تحـــــــــــيتــــــــي

اوعا تفكر بالعطه

لوووووووووووووووووول

>>>قسم بالله تسدحت من الضحك

واللي محليها اللهجه القصمنجيه

تخبصااااتي بــ يعطيك العافيه ابو ناصر

محيوووسووو مرجووجووو