معايد القريتين

ايه راجـع مـثل ماقالوا مـعايد قريتين =اتفق همّـه مـع عاثر حـظـوظـه واخـذلوه

والا اناماساقني لك كود شوقي والحنين =مثل من ساقوه ربعه للمنايا واتركوه

عذري اني ماني أول من رجـع صفـر اليدين= ولاني آخـر خل.خـلانه على الزلّه حدوه

لاني بعابر سبيل .. ولاني بطلاب ديـن =شــاعر خاوى هجـوسه للنشايب وانشبوه

والله اني كنت ناوي قطع شكي باليقين =لـكن جروحي تخاوت كـل جرح باثر اخوه

وانت تحسب ساعة تمحي تجاعيد السنين =او توفي حـق من صـحـى بعمره كل ابوه

تدري ان العشق ما يمرح ديار العاذلـين =والهوى ماله وطن بقلـوب ناس عذربوه

وياوجودي وجد من وقفت بعينه عبرتين =بين ناس لو يباع الضيم بالمال اشتروه

وجد من كله تنثّر مـن شمال ومن يمين =والعـواذل كلما لملم شتاتـه بعثروه

بيننا صار الهوى .. طفل يتيم الوالدين= لاتهنا من حليب امه .. ولا من وجه ابوه