قديمك نديمك

السلام عليكم ورحمة الله

هلا بحبايبنا و ربعنا الاولين والتالين ... بوابتنا يالاخوان كـــانت مهيب صاحيه وكل عضو يتحدى الثاني بقصه احلى و فيه تنافس وفيه مواضيع هادفه ودايم نلقى المشرفين متواجدين ( الله يخلف على محاستيكم ) .. يعني وصلت القمة ودحدرت هالبوابه وعلشان نذكر بعض الناس بمواضيعهم .. ونخلي اللي ما شاف يشوف قلت ابعيد طباعة بعض المواضيع ونسندها لراعيها لا احد يقدم علينا شكوى ... ما صدقنا نصير مشرفين بكره لا يسحبون منا الجنسيه ويحطوني عند البوابه فارش شليل و احتري رزقي

فيه موضوعين مميزيزين لعضوين في الساخر حبيت اعيد كتابة مواضيعهم علشان تحن قلوبهم على البوابه ونشوف جديدهم ..... واللي مشغووول نبي نعذره بس متى يخلص شغله ؟؟

الموضوع الاول لـــعــــاقلنا المربط (( القروووي )) وهو : - (( امي وابي في الطايه ))

كتبت هذا الموضوع وبسبب خلل فني انمسح وأعيد لكم كتابته وأعتذر لو صار فيه تغيير عن الأول لأني مانسخته عندي ولكن الفكرة وحدة !!!

الموضوع

أولاً أحب أعرف لكم الطاية .. هي مكان نرقى له بالدرج ونصير قريبين من السماء ونقدر نعد النجوم فيها لين يطلع ثواليل في يدينا .. والا تدرون الطاية مكان عالي نقدر نويز منه على الجيران << وش هالتعريف !!

وبتعريف دقيق << ( دقيق والا طحين ههههه ) .. الطاية هي السطح حق بيوت الطين بس مايكون فيها دش زي سطوح هالحين <<< الله من زين التعريف !!

ثانياً المقدمة حقت القصة ... بيت الدرجة .. أسم يطلق عادة على المكان الموجود تحت الدرجة << ( لا يااشيخ ) وعادة مايكون مظلم وفيه براصي وخنفسان وفي الربيع قد تختبيء فيه الذرانيح .

في عصرية يوم الخميس قال ابوي لأمي .. وين شراباتي ؟ .. ورانا اليوم عرس فهيدان ورجليني كلها شقوق ومشق ودي أدهنها بوازلين والبس شراب !!

قالت أمي .. والله هقوتي يابوسليمان أن شراريبك << ( جمع شراب ) في بيت الدرجة .. وانا بروح ادورهن لك هالحين ..

ذهبت أمي إلى بيت الدرجة لتبحث هنا وهناك عن شراب العائلة حق أبوي ( شراب العائلة شراب اسود ممكن نلبسة كلنا في وقت واحد ويتمطط اذا صارت اصابع رجلينك متتفخة ) .. وأنا كالعادة أتبع أمي وأمشي وراها وأجلس عندها ثم أنبطح حولها على السميت ( السميت عبارة عن تراب قاسي لونه رصاصي غامق ) وأمارس هوايتي المحببة وهي متابعة الذر وكل مامرت ذرة أرعصها بأصبعي ( الذرة نقطة سوداء تمشي في الارض ) وكذلك أمارس هواية تنبيط القعاسي بأصبعي ( القعسي هو عبارة عن نملة بس حجم عائلي ) واذا مرت من عندي جعابة أكون محترم نفسي ومعطيها معاهدة الأرض مقابل السلام ههههه و الجعابة عبارة عن قعسي سمين ولكنها قشراء ماتنتحارش تعض على طول ) ..

وبينما كنت ألهو في البراحة صرخة أمي فجأة .. وهي في بيت الدرجة والسبب مرور برصي من قدامها ( ونقطة ضعف أمي البراصي ماتدانيهن ) .. وبأعلى صوتها قالت أمي : وجعة .. بلش يبلش البني ماكنسنها زين ( تقصد مانظفوا بيت الدرجة بأتقان ) . فذهبت أمي لوالدي طالبة منه الفزعة لأنها خافت ودخلها الماء ( يعني خايفة مرررة وجتها أم الركب ) .

راح أبوي معها لبيت الدرجة وكان المكان ضيق مرة ويالله ان الواحد يفترك فيه فما بالك اذا دخلوا اثنين ... ومن هنا بدأت القفشات والمزحات بين الوالد والوالدة خصوصاً الوالد وأنواع المصالة السديراوية .. كل ما هزعت امي تدور الشرابات نغزها مع جنبها وقال : عععووووووو << مصاااالة .. تقوم أمي وتفز وتقول : هااو .. انهبلت يا بو سليمان ؟ ( هااو = كلمة تعجب تطلقها الحريم السديراويات بكثرة أيام الصيف لكثرة السواليف اما الشتاء فيكونن قافصات من البرد )

ويكرر أبوي هالحركة .. وأمي ترد بنفس الجملة وعلامات التعجب بادية على محياها ( بادية والا تبسي كه كه كه ) بعد هالمصالة من ابوي طلعت أمي من بيت الدرجة وهي زعلانه وفي رواية أنها تتغلى .. فقامت بحركة سريعة بنسف شعرها من فوق جبهتها على وراء وبنظرة سريعة لأبوي وابتسامة جعلت ضروس العقل حقت ابوي تطلع من مكانها .. فقال أبوي .. يووووه يالعروس يااهي تذكرني بمنول وليلة دخلتنا .. تذكرين ؟

قالت أمي وهي تمس في ثوبها من فوق لتحت ( مدري هالحركة أغراء والا تكوي فيها الثوب ههههه ) ورفعت يدينها ورعصت شعرها علشان تبين الفرقة اللي في النص لين طلع حد شعرها النازل جنب عيونها تقل حرف ثمانية بالزبط .. عندها أصدر أبوي آآآهات متقطعة كنه مكينة قامت تنتع خلص ديزلها ههههه . . وقال بلهجة مرتبكة وحروف مبعثرة : قووه نروح ننام في الطاية .. الليلة براد يالله لك الحمد !!!! <<< هذي كلمة السر ههههه بينهم علشان ما أفهم !!!

رقت أمي للطاية بتفرش المطرحة ( المطرحة شي فيه قطن منتفخ ولونها خضراء وفيها ورد أحمر صغير ومع الاستعمال المستمر يطلع فيها خرايط مدورة من سوء الاستعمال .. والدوائر اللي يسببها الولد تصير عادة فوق .. ودويرة البنت تصير تحت هههههه ) .. يوم شفت أمي في الطاية رقيت ودي أساعدها وهي تصرفني وأبوي كل شوي ينادي ويقولها : هاااه أنجزي خليني انهج واروح للزواج وانا شاتر .. وهي ترد بصوت منخفض على غير العادة : وه .. وه .. يابوسليمان .. أبتلشت بهالمقرود عندي ( اللي هو أنا ولا فخر ) بعدها صرخ أبوي بقوة وقال : يا ولد أنزل تعال يالهيس الاربد .. أنزل ورح جب لامك واخوانك خبز من المجمعة على رجلينك ( قمة الظلم ) بس برضة كان عندي أصرار بالجلوس ومساعدة أمي ... قالت أمي : أبيك يالقروي تسد فتحة المثعب ( المرزام ) بقطعة القماش لايجلسون هالشياب يطلطلون علينا ( المثعب = هو خشمي هههه أبوي دايم يقولي انت وخشمك هاللي غادي كنه مثعب قبلة يصب ههههه فتخيلت ان المثعب هو خشمي هههههه .. عاد الصدق المثعب = او المرزام وهو خشبة أو حديدة ملصوقة في الجدار علشان تصرف موية السيل من الطاية .. ) وسبحان الله من سديت فتحة المثعب ( المرزام ) أسمع صوت الشياب في السكة ( يعني شارع ترابي مابعد زفلت عرضه مترين ونص ) وكل ما مر شايب قام يتنحنح : أحم .. أحم .. أنهج علينا يابوسليمان لاتصيف على العرس << كنهم دارين وش بيصير .. وكل شايب اذا شاف فتحة المثعب منسدة بقطعة قماش عرفوا أن الدعوة فيها إناااا .....وجلسوا يتنحتون وينظلون ( ماتشوفون اشباهنا مغلفصة كله من العجلة ههههه ) ..

وأمي كل ما مر شايب وتنحنح وقال أنهج علينا يا بوسليمان .. قالت : وجعه !! لو عطس الواحد كان سمعوه .. بلشة تبلش هالمشافيح !!!

رقى أبوي للطاية أخيراً ... وقال لي : يا وليدي رح الله يصلحك جب لنا خبز .. قلت طيب !! وسويت نفسي أنزل مع الدرجة بس جلست وتوزيت أبشوف وش عندهم يصرفوني !!!!!!

قال أبوي لآمي : وش هالزين ماشاء الله .. يازينتس يام سليمان حاطة حنا وديرمة وكحل يخلي قلب الواحد يرتجف تقل مكينة فورد هههه .

ردت أمي وهي ترفع شعرها وتحط جديلتها على كتفها كحركة إثارة : وه .. يازين حتسيك بعض النوبات !!

أبوي : يازين السماء صافية والنجوم كثيرة والقمر قمرين فيذا واحد وفي السماء واحد .. وين المطرحة خلينا نرقد قبل لا يجي هالمقرود ( اللي هو أنا )

أمي : ترا الشياب أبحلونا بالتنحنح .. وكل شوي يقولون أنهج يابوسليمان لاتصيف على الصلاة ..

تنكد أبوي .. وقال هذولي بينكدون علينا ويبي ينظلونا .. مشافيح ماهمهم الا متابعة خلق الله ..

وبينما كان أبي وأمي يتبادلون أطراف الحديث ... مر شايب وتنحنح وقال بصوت عااااالي مسموع : لاتنس الدعاء .. اللهم جنبنا الشيطان وجنب الشيطان مارزقتنا ..

بعدها تنرفز أبوي .. وغلدم .. وعصب .. والظاهر أنه سوى كل شي بعجلة ونرفزة .. وكل شوي يقول لآمي : لاتعدين النجوم غمضي .. تجلسين تعدين النجوم ويجي ولدنا ثواليل في يدينه ...

وبعد فترة هدوء لم أسمع أي صوت ولا حركة .. قلت وين راحوا ؟

وناديت بصوت عالي : يباااااااااااه .. يمااااااااااه .. وينكم ؟ وأطل عليهم وحصلتهم متلحفين وطالع طرف راسهم وهم يناظروني وقال أبوي أنزل يالوح رح خذ من مخباتي خمس تريل ( 5 ريال ) ورح لدكان الترتسي واشتر لك ببسي وحلاو وفصفص .. قلت وش عندكم متوزين عسى مافيه عقرب ؟ أجي أشوف ؟ قال أبوي : والله لالوحك بهالعصا يالهيس الاربد .. رح طس من قدامي .. قلت : طيب تعال .. تقدر تقوم هههههه !! بعدها ذب علي المثعوبة وصحكتني مع جبهتي وأنحشت !!! ( المثعوبة عبارة عن جيك بس معدن ... يستخدم للوضوء ) !!

بعدها نزلت ... وخذت من مخبات أبوي خمس تريل ... وطلعت للدكان ...

والآن .. وبعد هذه السنين .. كبرت وعرفت كم كنت بثر مع أبوي وأمي .. وكنت سبب رئيسي في أشباه أخوي الصغير ( ثمرة ذيك الليلة ) حيث أثرت نفسيت أبوي على الانتاج وكنت انا والشياب سبب في أشباه أخوي اللي كل من شاف وجهه قال ( وجهك وراه تقل عصر الجمعة ) ..

مايستفاد من هذه القصة :

التروي .. والروقان .. وسعة الصدر .. أسباب رئيسية لتحسين الإنتاج !! والدليل شوفوا الفرق بين أشباه عيال منول ( وانا منهم ) وشوفوا أشباه عيال هالوقت ( تقل دوافير ) !!

تحياااتي لكم ... وأسف على الإطالـــــــــة !!

وش رايكم بالتسطير والتلوين ذكرتوني بالمطالعة منول

----------------------------------------------------------------------------------------------

الموضوع الثاني : هو للشيخه اللي مزاعلتنا الاخت (( فتاة السوق )) وعنوانه (( جهير ام برقع مشقوق والرز الهديه ))

.....جهيـــر ام برقع مشقوق والرز ابو هديه .....

احبائي اعضاء وزوار بوابه الساخر.. سوف اسدح بين ايديكم قصيصه وليست قصه عن صديقتي وغاليتي وشقيقتي في سوق

السبت (جهير ام برقع مشقوق )

طبعا القصه مفروض تعرض في رمضان .. فنظرا لخراب جهازي وكانت هي مكتوبه عليها فما قدرت انزلها .. يوم عاد زان <<< قصه الحياه

قلت خلنا نزلها معن هالحزه امتحانات بس ياله اعذرونــــــــا ...

طبعا هذه الفتاه ليست بغريبه عليكم فلقد سبق ان عرفت بها في موضوعين سابقين ايام الشباب وايام الطفوله (رحلتي الى الخنافريه _ وطفولتي وعشقي لحضورالعروس)

والان اترككم تسبحون مع دعاسيق القصيصه ( رجاء اللي مامعه لاستك لا يقرى اخاف يغرق ونبحل به لان هنا مافيه خفر سواحل اسفه قصدي سيــــول )

كاعادتها جهير المطفوقه تقهوى الضحيوه وتقدع من هالتميرات ومعه سحله دخن ماتاكل التمر الابدخن تقول اطعم...

وطبعا بجانبها بنتها اللي اظاهر مهيب عاقله ابد حتى لو كبرت(شكل امها وهي حامل فيها شايفتني وتوحمت فيني ) طالعه علي واسمها (سوزي ) <<< مدري وشلون سموها

ماعلينا .. واثناء ماهي تتقوى وبنتها تحوق القهوه معها .. ترن ترن ترن ترن <<< هذا صوت التلفون

ترد سوزي <<< الله يعين اللي ترد عليه قسمن بالله ان يطلع في راسه عبــــــــريه ماعطتها علم صاحي..

وتقعد سنه وتحتسي حتسي مهوب لم سنع واشوى ان جهير جنبها وتقوم وتاخذ السماعه منها وترد....

ولاها اخت جهير ... نوير : الو وجعه تمصع سووزي ياختي بنـتس ذي لاعاد تقضب السماعه وه منها.

جهير : امم امم (تاكل تمر ) ياختي بزر وانتي بسم الله علي سلمي قبل مهب مطلعتن بلاعيمتس علي .. وجعه توجع جدي ديفيــد.

نوير : اقول بس اسمعي ترى اليوم جايتني دعايه بنده يقولون عندهم تخفيضات تهول وتفتسر بمناسبه حلول رمضان..

جهير : صدز ياحليلهم .. اجل خلينا نروح اليوم لا ياقضي عنا الزين..

نوير : اجل انا وشوله محاتسيتس يالخبله الا ابي امرتس عقب المغرب تزهبي وهماه بنت سوزي لاتروح خابرتها بثره وكلشن تحوقه وتفسده.

جهير :ياوياتس من حسيبتس في بنتي والله ان كل الملح والقبله فيها ( اكيد هماه طالعتن علي ) خلاص .. بعد المغرب بعد المغرب.

نوير : ياله نشوفتس على خااار

جهير : مع السلامه

نوير : طلرااااااخ <<< صكت السماعه

جهير : طراخ طراخ طراخ طراخ <<< تبي تصك السماعه وسوزي بنت تبي تكلم وطلعت هوشه وصار فيها معط شوش

بس الاصابات بسيطه 150 شعره من جهير سقطت

اما سوزي يقولون ماطاح الا شعره وحده منها طبعا الابقى للاقوى.

بعد المغـــــرب .......... الساعه 7 مســــــــــــــــاء تقريبا قبل التراويح...

بيـــــــــب بيـــــــــــب بيب بيب ططاط طططططططاط طططططططططططططططططططاط <<< معصب ولد اختها نوير

وتطلع جهير وهي موزيه بنتها سوزي في عباتها.... ويوم ركبت السياره وتطلع سوزي من تحت عباه امها ... وهي فاقه الخشــــــــــه.

نوير: ياجعل هالخشه تنصك ولاعاد تفتح ... الحين ذي وش مركبها ووجع

جهير : وش اسوي نشبت فيني .. ورحمتها .. تبيني اخليها لحالها ياويلاه .

نوير : شوفي اجل حطي يد بنتتس في يديتس ترى ماعلي منها وان خربت ولافسدت انتي المسؤوله.

جهير : طيب ولايهمتس اصلا هي عاقله ومؤدبه وشاطره بنيتي ماتخرب صح سوزي

سوزي : لايكثر يا دهــــــيــر (جهير ) يقولون ابو طبيع مايغير طبــــــعه <<< والله الملسونه خخخخخ

لبقوا عند بنده ودحــــــدروا .. طبعا بنــــــده ملياااااااااانه عالم اكيد .. تخفيضات واعلانات..

طبعا كل وحده في جهه تعبي القش اللي تبيه...واثناء ماجهير تدور وتلقى خيش رز وحاطين اعلان فوقها ...

))))))انه في الكيس دراهم تصل الى 500 ريال في الكيس الواحد((((((

وهي اللي تطير عيونها ... وتشر لاختها نوير

نوير نوير (تشر بصبعها على الرز ) فيذااا دراهم

وتلمس جهير الخيشه من فوق ولا فيها شين يخررررررررررررررررررفش قالت بس هذي الفلوس

وتقوم نوير وتقولها اقول امعطي لنا خيشتين بسرررررررررعه.

ويوم جت تاخذ جهير الخيش ....... وتجي جنبها حرمه تناظر الرز..

يقالك عاد جهير من زود الذهانه ماتبي تفشل روحها عند الحرمه انهم شارين الرز عشان الفلوس وهي اللي تقوم انتي ياجهير وتلتفت على اختها نوير وتقول:

اخــــــتي .اخـــــــتي. مايصلحن ذولا فطـــــــــــــر .. الا بلى هقوتي يصلحن ( ياشين التصريف )

وتحط جهير الخيشه اللي فيها شين يخرفش في سلتها وتعطي اختها الخيشه الثانيه وتفحط بسلتهااااااااا للكاشير واختها وراها ....

وتحاااشب بسرعه وتـلقط خيشه الرز وتخلي باقي الاغراض يجيبهن ولد اختهااااااااااااا...

مستعجله تبي تفتح الخيشه كود يصير فيها فلوس ترجع لبنده وتشتري زود اغراض <<< حريم اهب عليهن

وتركب السيااااااااره وتحاول تفتح في الخيشه مافيه فايده... وتقوم وتقرض الخيط بسنونه وتفتح وتمعط بها الضروس عجزت وتاخذ المفتاح حق السياره وتحااااااول

قال ولد اختها : اقول لاينكسر بس المفتاح خليها اذا رحتي للبيت افتقيهاااا واذا طلع فلوس رجعناك تشترين ..

وهي اللي ترجهن ... ويروحن للبيت ومن يوم مادخلت مع الباب وهي اللي تصوت للشغاله بسرررررررررعه جيبي قدر كبير وسكين بسرررررررررعه

وتجي الضعيفه ماااااااااااااغطه من المطبخ وتعطي جهير القدر والسكين ( من الطفاقه حتى العباه مافصخت )

وتمعط الخيشه وتفتقها وتكب الرز كله في القدر وتحوق تدور اللي يخرفش على اساس انه فلوس وتدور وتدور وهاليدين مدخله في القدر وتدوووووووور

واخرتها وش طلع اللي يخرفـــــــــــــــــــــش...؟؟

طلـــــــــــع كتاب وصفات (طبخ ) جاي مع الرز

هههههههههههههههههههههههههههههههههههههههههههههههههههههههههههههههههههههههههههههههههههههههه

وهي اللي تتحطم ... وتطير كل افكاره اللي مخططها لها اذا طلعت الفلوس .. وتحسفت على ضروسه اللي تخلخلن من مكانهن بسسب الخيشه وتقريمها لسلوتسها

بضروسها..

طبعا هذا دوى اللي يتابع الدعايات والله ان ماورهم الا الخنبــــــــــــــــــــقه .....القصه من الواقع وترها مسحبوه من مجالس الحريم وسواليفهم

بس طبعا السناريو والحوار : فتاة سوق السبت

تحياتي لكم

اختكم فتاة سوق السبت

هههههههههههههههههههههههههههههههههههههههههههههههههههههههههههههه

ابداع ما فيه شك

وكتاب رائعين

تراني منت عليكم ميانه في موضوعي

العذر والسموحه

والي ما يزعلون لاحقهم الدور

ربص بن جمش

أرحبوا .. هلا والله

مشاء الله عليك ياحميان وراك ناثــلن ً الحجرة اللي في الطايه مطلعن ً هالمواضيع ...

الله يذكر جهير بالخير .. والله أني ولهتن ً عليها وعلى مسلهمه جعلهنً للصلاح والرجل العجل

.. ههههههههههههههههههههههههههااي الله يرجك يالقروي لا ابشرك هجوا الباب لي وانفتح

والله ودنا ترجع ذيك الايام يوم كلاً يمحط موضوعه وهو بازن ً به .. ونلقى ردود ونلقى ناس تعلق وتسب وتمدح .. تكفون رجعوا هالايام .. خلونا ندهر مثل منول<<< فيها الصيحه

جزاك الله خير اخوي حميان

اخيتكم فتاة

السلام عليكم




الحمد الله على السلامه
@@@ فتاة سوق السبت @@@

شفتي من رجعتك زرعو الصفحه .... ما تشوفين خضارها

اما الادهاااااار فالحمدالله الاعضاء ما قصروووا كل يوم يجي واحد احسن من الثاني

وننتظر منك الجديد ..... وش اخبار البسطه

هلا بنـــــــــوووووير

مساها الله بالرضا والعافيه ومسيار فيه العافيه
والله يسلمك ويسلم اصحاب المواضيع

يالله عاااااااااااااد ابمشي