التعداد السكاني

==================

يالله حي هالوجيه الطيبه وحي كلن بإسمه

نخش عالموضوع دغري ..

------------------------------

* التعداد مطلب حضاري لبناء الأمه

* ساهم معنا في حملة التعداد

* التعداد لك وللأجيال القادمة

* التعداد اساس نجاح الخطط التنموية

* كن حضاريا واعط موظف التعداد معلومات صحيحه

* جاكم التعداد ما شين يعيقه = على وزن الصفر الله يذكره بالخير .. " وجه فيه الصيحه "

كل هذي شعارات الحملة الترويجية للتعداد - حفظناها عن ظهر قلب - جمعت الاهل وقعدت اعلمهم عن أهمية التعداد والهدف من التعداد وانه يساعد الدولة في توفر المعلومات الدقيقه اللي تخدم خطط التنميه ( ايه طيب )

.. نطت الوالده وقالت : هم يبي يعطوننا اراضي ؟ قلت : ياويلليه ماهمكم يهالمواطنين الا الاراضي مايسدكم بلع .. الا على طاري الاراضي .. يبه يسلم عليك ابو صالح راعي البيت ويقول : سلم لنا على الوالد وقل له مبطين ماشفنا خشته شكله يلمح على الايجار .. قعد الوالد يحك رقبته تسن وجهه تغير وضاق صدره ( وجه مستحي تقل مكبوب عليه مرقه )

ماعلينا .. بعد ماانتهت المحاضره قلت لهم : هاه فيه اسئله ؟ خلاص ؟ فهمتوا وش اهمية التعداد ؟ مهوب باتسر يطق موظف التعداد وتلطعونه عند الباب ساعتين كعادتكم الكريمه اذا رن الجرس كلن يطالع الثاني يحتريه يقوم يفتح (وجه ميت ضحك )

وفي يوم من الايام دخلت انام العصر - نومتي اللي لو يجي ابوي ما قطعته - ما دريت الا اختي تطق الباب وتقول : قم جاء موظف التعداد قلت : فارقينا انتي واياه .. قولوا له ما فيه رجاال بالبيت يجي وقت ثاني ( وجه حمقااان بقوه ) .. بعد ماصحيت من النوم قالوا : ان موظف التعداد يقول خلاص ابي اجي مره ثانية.. ( وجه يقول الماريه الغفله )

نحتري الرجال يجي . بكرا .. بعد بكرا .. اللي بعده .. والى يومكم ماشفنا أحد

ذكرني بام كلثوم :

وبكره يفوت وبعده يفوت ولا كلمه ولا مرسال ... وهو العمر فيه كم يوم ( وانا حاطن يدي على خدي استناك )

لا وازيدكم من الشعر بيت ... اعرف واحد ولد جيرانهم قد شاف واحد له ولد عم مدرس ويشتغل بالتعداد وعرفني عليه .... المهم انا خشيت معه عرض و قلت له : تعال ياخوي سجلنا بالتعداد .. قال : وش دخلني بكم ؟ انا مسؤول عن تعداد سكان جنوب الرياض .. يالله ان الشكوى لك .. طيب وش نسوي حنا ؟؟ نضيع ؟؟ يعني ما ندخل بالحسبه ؟؟ يعني الجماعه مهوب ضاربين حسابنا بخطط التنميه ؟؟ قال : شف ابعطيك نموذج صغير فيه كل البيانات المطلوبه ، تعبيه وتعطيه ( انت او اي واحد بالبيت ) لموظف التعداد إذا جاكم .... أخذت النموذج وقعدت اعبيه

اسمائنا واعمارنا ووين مولودين ومتى وتعليمنا ووين نشتغل والمواليد والوفيات .. كل هذا معقول ..

بس كم عدد غرفكم وحماماتكم وعندكم فديو والا بلاي ستيشن دش والا بانيو .. الصحيح ن مالهن سنع

كم دخلكم المادي وكم مره رحتوا سياحه وهل البيت ايجار او ملك وكم عدد السيارات اللي عندكم .. هذي معقوله... بس .. ..

بس يعني لو فيه اسئلة ودي انهم حاطينها علشان المعلومات تصير دقيقه مرره .. مثل / هل عليك ديون ؟؟ كم المبلغ اللي تسدده لشركة الكهرباء وشركة الاتصالات شهريا ؟؟ كم مره تعبي سيارتك بنزين وكم المبلغ اللي تدفعه شهريا ؟؟ وراتبك يناسب مصروفاتك ... عموما .. هم ابخص .( والا وش رايكم )

.. خلصت من البيانات .. وهذا النموذج جاهز و الى اليوم ما احد طق علينا ..ويدي تبنجت على خدي

فرجاء .. رجاء ..لكل من يقرأ هالسالفه

الموظف يعلم زملاؤه ... والطالب يعلم اصدقائه .. والمدرس يعلم طلابه .. والعاطل يعلم شلته

إذا طلعت نتيجة التعداد وقالوا عدد مواطنين المملكة العربيه السعوديه يبلغ مثلا / اربعطعش مليون وميتين واثنين وعشرين الف وخمسميه وسبعين ..

زيدو عليهم احدعش

مع تحياتي للجميع

الاخت شنطة فسحه

شكراً على المرور والدوريات .... الامن مستتب ما دامك هنا

بس لي عتب عليك ودي اقوله منووول بس مستحي

ما تلاحظين انك مخسره مقصف المدرسه ، انتي و هالشنطه .. لا وسمعنا انك تحرضين الطالبات انهم يجيبون فسحتهم معهم ... المهم لا تعودينها لاخلي اذاني واذانك اربع ... (( ترانا مساهمين في المقصف ))

السلام عليكم

القروووووي .... هلا برفيق الدرب .

جعل العافية ما تشتاقلك

الله يرفع مقدارك .... بس عسى سطحكم مضلل لا تحترق ورقة التعداد ( وجه مهوب صاحي )

فيه موظف تعداد مسوي فيها يمون ... سأل الشايب عندكم دش .. قال ايه شرينا حق المجد ... قال الموظف : عساه يجيب قنوات اباحيه ....... قال له الشايب الله لا يحللك ولا يبيحك الا يجيب مصارعه ... ودخل عليه عياله .. (( ما يحتاج نكمل ))

( بس خذ معك ..... وجه وده يضحك بس متكسره ضروسه )

الله يخس عدوك مسكنا خط

المهم شكرا على المشاركه وسلمني على نفسك