الجزء الثاني - ذكريات الويك إند في حرمة

تطرقنا في الجزء الأول عن روحتنا لحرمة مع الوالد والوالدة لزيارة جدي وجدتي .... وما أجملها من ذكريات ولكن ودي أتكلم عن زيارة عيال عمي اللي ساكنين في حرمة للرياض في الويك أند وما أجملها من أيام ..

يبدأ عمي وعيال عمي في ضفضفة أغراضهم وعفشهم بيجون للرياض علشان يحضرون زواج أحد الأقارب ونكون أنا وأخواني في انتظار وصولهم لبيتنا ونجلس نفرش مراقدنا حنا وياهم في السطح ومن يذن العصر نجلس نرقي في هالفرش مع أمي ونواسيهن ونحجز الربع والأركان ( كل واحد يقول حلي بي بالربعة ) .

عند وصول السيارة ينزل عمي ويدخل البيت واول شي نسمعه منه (( لا إله إلا الله )) فيذااا أحد ؟

وتدخل وراه زوجته ولا نسمع منها إلا وصوصة وصصصص وسسسس بسسسس بصصصصصص تهمس للبنات وللعيال وشكلها تقول لهم : أها عاااد أعقلوا ولا تحوسون وتوصخون فرشتهم ... ويدخلون عيال عمي وهو عاقلين مرة ( يقالك مستحين ) ونسلم عليهم ونجلس نوريهم غرفنا وأنا يعنني متطور ومن أهل الرياض وإذا وريتهم مرقدي ( يعني فراشي ) أقول ترا هالمطرحة تنتفخ اذا بغيت .... وولد عمي فاكن خشته ويقول صدز ؟ خن نجرب يالقروي ؟ وأنا أتثيقل وعارف أني أتسذب ( أي أكذب ) وأقول بكرة نبي نتفخ هالمطرحة بس اذا زغلتوا عليها بتخرب ولا هيب منتفختن أبد ( أي طيرتوا الشراب على المطرحة ههههه ) .

المهم .. بعد ما ناخذ على الجو الأسري أقول للعيال ... ترااا بنروح لحديقة الحيوانات بكرة وبوديكم لمحل الامريكان ( أقصد محل هرفي أول فرع يفتح في الرياض في شارع الاحساء يوم يصلحون كبري الخليج .. أيام التحويلات ما كنا نعرف مثل هالمحلات ) اللي يبيع سندويشات مدورة توه فاتح في الرياض يحطون سندويشتين كل وحدة تسنها طاقية ويطبقونهن على طماطة وخس وفي النص لحمة مدورة و العيال مفتحين عيونهم ويقولون : وشلون يالقروي تعرف تحاتسيهم ( أي تتحدث معهم ) فقلت : عااادي أنا متعود أشتري منهم دايم بس مشكلت اللي يبيعون فلبينيين ولا يعرفون انقلينزي زين <<< قل قسم ؟ بيصرف هالضعوف ..

المهم قال ولد عمي تكف ودنا بكرة نتغدى ونذوقه ونشوف الامريكان ... وقاطعت حديثة وقلت له : تراا عادي يجيبون معهم زوجاتهم وبناتهم وقسم بالله يفتشن ولا يتغطن ولازم الواحد ياكل بسكين وشوكه ... قال ولد عمي : وشلون سندويشة ناكلها بسكين وشوكة منحنب عارفين ؟ وبعد ما تورطت بسرعة بديهته قلت لا ... أنا أقصد ناكل بالسكين والشوكة الزلطة ( أي سلطة الخضار )

وفي صباح الخميس أخذ عيال عمي ونروح لحديقة الحيوانات ونشتري حب ونعطيه القرودة يقشمن ونجلس نرجمهن ونروح بعدهن للأسد والفيلة .. وأنا أدربي راسي على بالي أنا الدلولة ( يعني اللي أدل وأعرف المكان ) وكل شوي أقول كان الأسد فيذااك وش جابة هنا شكلهم غيروا << تقل من علم هالسواليف ..

وبعد ما نخلص نروح لمحل هرفي الوحيد اللي في الرياض توه فاتح وأنا على بالي أعرف أطلب بالانقلينزي ... وندخل في المحل وتطير فناخرهم وانا معهم بس يقالكم انا متعود هههه ( الله يرحم التطور ) ويقولون وااااااااوه ساقعة الأرض ( بعضهم حافي من الحماس ) والثاني يقول والله هالماصة تقل فلجة من البردة ( فلجة يعني ثلجة ههههه ) المهم نروح للكاونتر وهم يبحلقون فيني والمحل زحمة ناس ويجي دوري واقول : ااااااااااااي نيييييد .. خبز سيم سيم طاقية ( وأشر على طاقيتي ) وفيه ان سااايد هاروف ( يعني خروف ) وتطير عيون العيال ويقول واحد منهم : يلعن أم اللغة يا شيخ .. وشلون تعلمتها ؟ وأنا على بالي فاهم وأقول للفلبيني : اوووكي .. اوووكي كلوا أكل ان ساايد .. هير فوق تيبل ( يعني الاكل هنا على الطاولات ) ويقول الفلبيني : يو نيد وذ تشييييز أو وذاوت ؟ وأنا على بالي فهيم : نو نو .. سيم سيم خبز طاقية <<<< وشكل الفلبيني يقول ( كل تبن يا شيخ ) ..

المهم منا ومناك حسنا الدعوة وبالأخير عطانا طلبنا ...

وحنا نتوجه إلى الطاولة كان ولد عمي يتكلم ويقول ياااخي قسمن بالله أمنيت حياتي أني أعرف أنقلينزي زيك ... وأنا أقول : اللغة والله ما يبيلها شي أهم شي الاحتكاك <<< ضف وجهك واللي يرحم والديك .

بعد ما جلسنا على الطاولة وفتحنا الأكل حصلت الطلب خبز وكتشب وكم حبة ما يونيز هههههه ( الله يرحم الطلب ) ويقولون العيال وشو ذاااا ؟ نبي زي هاللي ياكلون العالم ؟ وأنا أقول : عاادي أنا طالب عصير بصل للي يبي ( على بالي المايونيز عصير بصل هههه ) جلسنا نعرم في هالخبز ونغطه على الكتشب ونحمد الله .

ثم نتجهز لحضور الزواج وبعد ما نرجع نتسدح في المطرحة اللي في السطح وكل ما صار المكان حار ننقلب على المكان الساقع .. وهكذا ليييين ننام ههههههه ..

ونقوم الصبح على هالصوت ززززززززز وننننننننن زززززززز نننننننننننننننننططططط <<< هذا صوت الذبان يحوم حول أذانا ومنتشر على براطمنا ..

وإذا تمغطنا كل واحد يحصل تحته دويرة تقل مرسومة بفرجار وتطلع هالمطرحة كنها خريطة العالم هههههه

ثم يضفون عفشهم ويركبون سيارتهم ويروحون لحرمة وربي يحفظهم

وسلامتكم

وشـــــــــــــذا ..... وشــــــــــــذا يثبـــــــــــــــــت لحين اشعـــــــار اخــــــــــــــر لانه موضوعن حانط <<< مهب مطعم اللي انتم خابرين

يه تميلح على عيال حرمه يالقروي.... اجــــل ماتنلام يوم بني حرمه يكشكشون عليك منول

والله مارحمت الا عيال عمك صدز ماخذين مقلب فيك ... بالله ذا حستي انقليزي والله هقوتي انك تنطق الاوردو ازين منه

ام سالفه تشبيهك للطاقيه بالهمبرقر ههههههههههههااي شي ثاني عاد

الله يفشلكم بس ..

ابدعت في تصوير ويك اند عمانك في الرياض

لاتحرمنا من هذه المذكرات اللي توسع الصدر وتصورلك الواقع وكننا نراه امامنا

بس لاتخلي المذكره قصيره نبي بالتفصيل الممل لاهنت

من ابداع الى ابداع

ودق فــــــــــليــــــفل ياكــــــــــــــمون <<<<< حلوهـــــــــا تراه لغز

اخيتكم فتاة العاقله

الــ ــقـ ـــروي .. كعادته يغيب ويظهر بأبداع جديد

عز الله انك جبتها ... الله من الفك اللي من ورا خط الثمانطعش .....وما حولك احد

هذي يبيلك تجمعها وتحطها في كتاب تسميه (( احلى مهاره في تسحيب القراوه )) .

سلام

مرتاح

تدعي علي بزيادة الهبال والرجه

يقالك تمدح هالحين

مشكور لمرورك وشرطتك ومدري أنت لاحق على اول فرع لهرفي في الرياض والا لا

فتاة سوق السبت

هلا بأخيتي

الله يثبتس بالايمان والطاعة

المواضيع الطويلة اخاف يملون منها والا لا توصين حريص بنرقيهم طويق

مشكور على التعليق

حميان بيتش

هلا والله ..... شكلك من حقين حديقة الحيوانات منول

مافيها الا قرود واسد ولحجيات يبيعن حب وفصفص

والله يا هو فك .. اااااييييه يا ذيك الايام وايام السياكل والتمشية ايام ما تنسى

ومغامرات وروايات بس خلها على ربك

مشكوووور لمرورك وتعليقك

أختي ليالي نجد

أسف على التأخر في الرد بس كنت مشخص بأسمك بصراحة

خصوصا كل ماشفت الصفحة ولقيت أخر رد ليالي نجد اقول حسافة اصبر بعد يوم

مشكور لردك اللبق والكلمات الرقيقة

تحياتي لك