الــتــتــن

السلام عليكم ... و أسعد الله أوقاتكم ..

ذاك الواحد والواحد الله وكل إبليس مخزية الله .....

يا شلة المنتدى نبي نسبحن لكم سبحونة عساها ترضيكم عن هالقطعة .

في يوم من الايومين ( جمع مذكر سالم مخرع آخر الليل وهو نايم ) وأنا طالع من المدرسة وكالعادة حاطن الكتب في شليلي وعاضن ثوبي نتسابق مع عيال الجيران من ياصل لبيته أول .. وأنا دايم اصير الاخير لان بيتنا ابعدهم وصلت وعلى طول اجدع دروسي في الحجرة ابطلع الحق على الشلة في الحارة ، ويوم جيت ابطلع من الحجرة ولا الوالدة الله يحفظها مسويتن علامة (x ) على الباب فاحجتن رجليها ورافعتن يدينها على فوق .. انا ما استوعبت الحركة وحسبت الباب مسكر جيت ابفتح الباب ولاي ماسكن شيء مدري وشو ؟؟ يتمطط معي قعدت اناظره ( التسذب خيبه) ما عرفته بس مشبه عليه قد مر علي بس ما جبت خبرة الا يوم تراجعت ذكريات أيام الطفولة .. ركزت زين على الباب ولا الوالدة سادته عرفت انها ماتبيني اروح للحارة ..بس بحكم خبرتي الكروية قلت ما يبيلها ندخل كبري تسحبت احبي وبسرعه دخلت كبري ما دريت عن نفسي الا وأنا مبنط في الجدار اثر الوالدة ما خذه احتياطات ولبستن مقطع مطاط .

قالت الوالدة : يا حمار القايلة( اللي هو انا ولا فخر ) قلب وجهك ما عاد نميزك في الليل اليوم أبوك رايحن للرياض يجيب الخدامة ونبي نتغداء بدري .. يالله تعال تغـد .. رحت اطق في هالكبسه واطق واطق الى ما توسدت البلام ..شـــالتني الوالدة وجدعتني في الغرفه اكمل المقيال ( نوم القوايل ) وبدأ تأثير الكبسه وياشين حـــلـوم القوايل .

حـلـمـت اني كبرت وصكيت العشرين سنه وبدت ملامح الرجوله علي والدليل اني صرت اجمع قطوف الزقاير واتتن في السطح ... وبالصدفه وأنا في السطح اتتن حسيت كن الدنيا تمطر استغربت ارفع راسي ولا االسما صحو .. قلت يمكني دخت مع هالتتن بعد شوي بدى يزداد المطر وتربصت ورفعت راسي ولا هذا عزيز ولد جيراننا توه مخلص من السباحه في خزان بيتهم وطالع من الخزان بثوبه وحتى الطاقيه ما فصخها ، وهو يناظرني والزقارة في خشتي (وبكل سعة وجه) قـال : افا يا حميان جالسن تتن ... انا يومني سمعت السؤال طاحت قاعتي وجتني النفاضه .. واجدع الزقارة واعض شليلي وانزل مع الدرج وأنا امشي الف .

.ولا هذا ابوي هو و الخدمة داخلين مع الباب .. رحت ناصي ابوي سلمت عليه وحبيت راسه وخشمه ( ويليتني ما قربت من خشمه ) لانه سدحني بطراق على كيف كيفكم ما دريت الا وانا متوسدن الارض وهو يكمل على بشوته بوز ولاي في الثمنيات .. بس الحق يقال كانت امي في المرصاد وطمره ولا طمرات الدعيع وتمسكني قبل ما ادخل قووول ..

وتصرخ وهي تقول وشفيك على الولد وجع كسرته .. قال هذا كله منتس ومن تربيتس هالتيس الاجرب ( اللي هو محاتسيكم ) . . ولدتس تتن . .تتن .. تتن .. قالت امي وشو تتنه ؟؟ قال الوالد ( الله يسامحه ) ولدتس ريحته تتن.. تتن . قالت اعوذ بالله عظايم اسمه ( وانا لا ازال في قبضتها ) قربت خشمها من خشتي المملوحه ..... وبدون أي تعليق رفعتني بيديها على فوق وقبل ما اصل الارض تشوتني مشط ومير اسطح على الجيران ويجي ابوعزيز جارنا يمشي الف وهو شايلني ويطق على بيتنا وهو معصب ويطلع الوالد ويعطيه ابوعزيز الامانه ( اللي هو برضه انا ) ويقول والله لو تسطحونه علينا مرتن ثانيه لاشقه نصين ..

وخذني الوالد وهو شاك في شخصيتي خشتن وارمه وعينن مفضوخه ومافيه شيء في جسمي الا يوجعني .. المهم خذني الوالد وجا عند الوالده للتأكد من شخصيتي وبعد ما تأكد وارتاح جدعوني في الحجرة..

سألت امي الوالد وين الخدامه اللي رايحن تجيبها ؟ قال الوالد الله العالم انها منداخل هذي من شفتها وانا اقول شكلها ظفرة تلقينها داخلتن المطبخ تشتغل ..راحت الوالدة للمطبخ ما لقت احد فتشت في حجرة الارزاق وفتشت في الحجر كلهن بس ما فيه احد نادت ابوي قالت : ماشفت احد في البيت وينها ؟؟ فز ابوي وقال : وين ذلفت هالسعلوه وراح للسطح وشاف بقايا القطوف ( بس طنش ) وقلبوا هو والوالده البيت فوق تحت ما لها اثر .

اشتغلت الطواري في بيتنا وفي بيوت جيراننا ومالها اثر وقلبنا الحارة قرنه قرنه .. ويوم جا الليل وانقطع الامل في هالخدامه دخل الوالد البيت منقطع حيله نفسه في طرف خشمه .. استقبلته انا ووجهي منعفط . يـبـه يبه هاه عساكم لقيتوها ؟ قال اقول .. تعال يالسرسري وهو يمسكني مع علباي وعلى دخلت الوالده قال مهوب هذا هو هالسرسري هو سبب روحت هالخدامه ويعطيني اطراق ويلزقني في صدر امي وهي تعطيني طراق والف على ابوي واحد من هنا وواحد من هناك ..وياقلب لا تحزن .................. مـــــادريت الا وأمي تقومني من النوووم وتقول ياللي ما تخاف الله من نومتك على الغداء الى هالحين لا صلاة ولا عبادة ؟ وانا اصحصح ويوم دريت ان الدعوى كلها حلم بحلم و اتحمد الله واصلي وادعي ربي واحلف ان ما يطب خشتي هالتتن .

لـــدينــك و صحــتك ننصحك بالامتناع عنه

ويقولون الاولين (( أوله دلـع .. وأخرة ولـع ))

يــــــــــعلق وينشر في السطح

واخيـــــــــرا عادات سباحين بوابه الساخر الاوليه برجوع الاخ المشرف المبجل حميان

انا اشــــهد خبــــال يرزح خبـــــــــــــال <<<< تراها مدحه

الله يوسع صدرك على هالسبحونه

بس والله العظيم حركه امك حقت × موتتني ضحكككككككككككك

تذكرت منول افضل لعبه عندنا لعبه التحدي لا تنشبنا في هالبيبان اللي تويز على الصاله

اللي ماسكن باب المقلط واللي حجره الحريم واللي باب المطبخ وسباق من يصقع راسه الاول في سقف الباب تقـــــل شبث ولاعناكب كن من خبر ..

ههههههههههههههههههههههههههههههههههه

بس بجد الحلم والله شـــــي خاصه القايله ... ياهو افلام بوليسه تطلع

<<<< منول قبل حلومها في اسرائيل كنهم طابين على حرمه خخخخخخ

الله يحفظنا يالله ويلهيهم في نفسهم يالله

والله اني اتخيل شكلك بين امك وبوك كل واحد ثبت وشوت خخخخخخخخخخ

واخرتها عند ابو الجيران لوووووووووووووووووووووووووووووووول

تسلم يا حميان والله سبحونه ولاسبحاين امي هيله الله يزديلها

الف الف شكر ... رجعه قويه بسبحونه قويه ...

هذا ماعهدناك منك يامشرف الساخر

تحياتي

اختكم فتاة

والله يرفع مقدارتس

ذرب

... وش حشيشه روعتني

ايو الله اذكر يوم ابوصالح يقول ل قحطه ( حسينوه حسينوه ... تتن ... تتن )

تسلم على التعقيب

منتصه عن النصله

مدري وش اقول .. ما فهمت شيء

بس تشكرين على المرور والشرطه وترانا تقبلنا التحيات

مــــرتـــــــاح

الله يرجك انت

خويك صاقط في الاملاء والخط بس مشي حالك

شكرا على المسيار

مقرودة

الوالدة اعتزلت ما يمديكم عليها

صحيح ان خشتي انتفخت وعيني انخفضت

بس برضه مملوح الله لا يخليني

والله يجمعنا في جنات النعيم وياتس والمسلمين اجمعين

^

^

^

^

أسمع نصيحة هاللي فوقي وغيرك خطك

والله موضوع رااايق تسنة نومتك الراايقة وشكلك ناايم نايم وانت منبطح

والله اني أكتشفت من هالموضوع اوصافك الجسدية ... كني أشوفك مدربح وقصير جايزن لأهلك

مرة ابوك يشوت ومرة أمك واذا تسطحت عند الجيران شالك أبو الجيران

مشكووورين ولا هوب غريب عليك هالخبال << أمدحك يا مدربح