هيلة تحب العروس

هيلة تحب العروس ما تسمع عن عرس الا وتلقاها اول من يجي حتى لو انها ماتعرفهم .. و حتى لو انهم مايبونها ..لكنها لزقه وجاهله .

ترتز في حدا القرن وتقعد تفرج ثمّن تقوم تهزّع وترقص .. والى طقوا في شوط آل فلان اللى تعرف ناسن يعرفونهم قامت وشقّت درّاعتها على وحدتن من الحريم اللي يرقصن .. وهذي معناها انها تحبها وتغليها وهي عادة كانت موجوده بين الحريم ولافيها شي .

ورجلها ضايقن صدره منها كل دراريعها مشققه تخيط الشق عقب العصر وتشقه في العرس لكن الامور ماتبتل على ما هى عليه ..

هذاك اليوم سمعت من الدلاّله (( سارة)) ان آل فلان اللى بيتهم في قفا ((القليب)) بنتهم بتعرس عقب اسبوع ....

قالت هيلة : ماشا الله ومن بتاخذ .

ــ يقولون واحدن يقال له ((رشيد ))

ــ وعسى اموره زينه.

ــ ماعليه يبيع ويشترى في (( سوق شعبي ))

ثمّن رفعت سارة راسها وقالت هيلةهاه منتيب رايحه .

ــ هوه من صدقك .. ما اروح .. كان يجيني ابو الهدبدب ..الابروح ومبكّر بعد .

ــ فصّلتي درّاعه .. والاترا معي طاقتن وش زين دقّتها ...

ــ اشوف ورّيني.

وطلّعت ساره من بقشتها ذيك الطاقه اللي خرقتها دعما ومشجّرتن اخضر واصفر..

يوم شافتها هيلة وتنهبل عليها .. قالت للدلاله: شقّي لي منها سبعة اذرع .

ــ مهيب واجد ..

ــ باقيها بفصّل منها صروال ..الاماعندك بطانتن لها؟

واظهرت ساره خرقن مصفطه وقالت هالسودا تصلح لها بطانه شوفي وش زينها .

وان بغيتيها شلحه تراها تصلح .

شرت هيله الخرق من الدلاله وقالت لها مرّي بها على اختى في بيتها خليها تقصها لي وتخيطها .. انا مكينتي مدري وش بلاها صايرتن تعلك الخرق.

ربطت الدلاله بقشتها وخذت بعض دراهمها والباقي بعدين .

عقب اسبوع حفلت هيله بذيك الدرّاعة الزينه وراسها فارقته والديرمه في يدها وعيونها مكحله وكنادر الباغه الجديده على شراب ابو ديك والصروال المشرّف حدر الدراعه باين من عند عراكيبها كنها هي اللي بتعرس..

رجلها يوم شافها ظاهرتن مع الباب قعد يتحيسب عليها ويقول : ايه خلاخل والبلا من داخل الزين للناس والشين لنا

قصده انها مهملتن بيتها ورجلها وهمها تزيّن للعرس.

حفلت هيله واستانست وما خلت شوط ما رقصت فيه وترد ورا الطقاقات : كل آل فلان خيّاله‍‍‍‍‍‍

وحدتن من الحريم قامت تلاغي الطقاقه: هالحين ورا ما تطقين شوطنا.. انا ما عطيتك قروش .

والطقاقه سافهتها .

مير وتقوم الحرمه وتاخذ الطار منها وتشقه ويقومن باقي الطقاقات يحامون عن خويتهن وما تشوف الا شعورن تنفشت وهدومن تشققت وصياحن على صياح وانعفس العرس ولاعاد ندري من الطاق ومن المطقوق ..

خويتنا هيله لاهيب مع ذولي ولا ذولي ..لكن جاها حقها طاحت عليها حرمتن متعافيه وغفصتها .. وبغت تموت .. انتبهت لها وحدتن من الحريم جزاها الله خير وجرّتها بكراعها واظهرتها ...

ودوها لبيتها وهي تعكز وتون... دخلت بيتها وقام رجلها يحسبها طايحه .

وسالها : وش فيك ..

قالت : ودني لفراشي.

وانسدحت هيله ... لكنها تالي الليل زادت عليها الصخونه وقامت تنافض .. وتحن وتون.

ورجلها يقول: خلّك .. عساك تتوبين

قالت له: ودنى الصحّيه ..مانيب قادرتن اتنفس..

طلع رجلها يطق على جاره الكدّاد (شبيب) وذاك يطل من (الطرمه) ويصيح : من هو

ــ انا سحيم .. سحيم حوّل... ابيك

ــ وما لقيت غير هالوقت ..

- ــ يارجال حوّل ..ويصير خير

- وحوّل (شبيب) من سطحه .. ما عليه الا فنيله ام عسكرى وسوجري ( صروال السنّه) ربقته (حزام) تومى بين رجليه نايمين بالسطح يدور البراد ..

- فتح الباب وظهر بيده مهفته ..

- ــ هاه خير عسى ماشر .

- ــ مايخالف ياشبيب الحرمه مدري وش اللي فيها ولاقدامى غيرك .. وابي ناخذها في موترك نوديها للصحيه .

- ــ اصبر خل البس ثوبي ..

- ودخل شبيب وهو يقول : الله يشق بك انت ومرتك ..انا قايل لك طلقها وافتك ..

- ودّاهم شبيب للمستشفى .. وكشفو ا عليها لقوا ساقها فيه كسر بسيط وحوظها فيه رضّه وقعدت في المستشفى عشرة ايام

- ظهرت عقبها وجت تزورها رفيقتها الدلاّله (( ساره)) جايبتن لها شيالن توها جايه نوعن جديد..

- قالت لها هيله :خلاص يختي اللي عندى مكفيني ورجلى ماعاد هوب معطيني قروش..

- ــ هوه.. وراه ..عسى ما فيكم شي يا وخيتي .

- ــ لأ ... بس هو حلف على مار وح للعروس

- والبس اللي عندى من الهدوم ..وحتى انا كرهت الروحات ماجانى من وراها الا الصخاين ..وبغيت اموت ..

- وفعلا .. ماعاد راحت هيله ..

- واذا جت وحدتن تبيها تروح معها للعرس .

- تقول لها : خلاص يا خيتي هوّنت وان سأل عنى احد قوليله هيله ما ودها تروح .

ياحليلهاا هيله ودي اشوفهاااااا

اهم شيء شق الدراريع ورا تسذا الله يصلحهاا

ويعين رجلها الفقير صابرن عليهاااا

بسسسسسسسسسس حركه تسلم المحتري الله يعطيك العافيه

مراحب

حلوووووووه منك >>> المحتري !!!

بالمرررررره ناجحه >>> هيلهههههههه !!!!

اهنيك !!!!

بعد قلبي >>> الحريم القبليين !!!

يذكرون هيله بالخير >>>> يقولون عليها >>> دق رقبه << انما ايه !!!

وبس هذي شغلتهن >>> هالحريّم >>> اعروس << وتهزهز !!!

بس قالها >>> رجله الله يذكره بالخير >> حين قال :

(( ايه خلاخل والبلا من داخل الزين للناس والشين لنا )) !!!

تخلخلت >>> رجوووول العدووووو !!!

كل الود >>> احلى (( هيلهههههه )) بالدنيا !!!

تحياتي

انتهت فتره التثبيت

نبي موضوع اخر مثله .. لاتبطي