قصائد في كيف النشاما

والله ما ستانس وينساح بالــــــــي=الا الى ما قام يزجر فـــــــــــــــــحلها

واشوف حيران النياق الغوالـــــــــي=تدرج ونار الربع يوضي شــــــــــــعلها

في مجلس والربع ربع رجالــــــــي=والسالفه ون جات ما حد شقلــــــها

ان جاك خطو السهدلي السـدالي=قله واجناسك بعد منك ولـــــــــــــها

تراه ما ينفعك في كل حالــــــــــي=ونفسه عسى ربي يعجل باجلــــها

ترى السوالف يا ذهان الرجالـــــي=تسمج الى عرضت على غير اهلها

[محمد بن مسعر العاصمي القحطاني]

--------------------------------------------

البن كيفته عند من يشــــــترونه=والمشكل اللي جابها من بلــدها

يا مسوي الفنجال لا تحر قــــونه=واحذر عن الشعله تعدي صمدها

حتى يجيك محمر كن لونـــــــــه=محة جراده طاير من جــــــسدها

عده على اللي ماضيات طعونــه=زبن اللدوح اللي تردا جـــــــهدها

وعده على اللي لابته يدهلونــه=في ربعة من راح منها حـــــمدها

وعده على اللي لابته يتــــبعونه=مع دربه الخلفه تفاخت ولـــــدها

وكفه عن اللي عند فرقه بشونه=يمسي ويصبح ظابط لك عــددها

وعلى ربوعه طايرات عــــــــيونه=ان باع شاته جاك حزه وعـــــدها

[مدوخ بن ظمنه المطيري]

--------------------------------------------

يا معذربين التتن لـــولاه لـــــــــــــولاه=لولا شرابه يا عرب وين أروحـــي

والله لولا العظم يوم اني أمــــــــــــلاه=وأكويه بالجمرة ويكوي جروحــي

مع دلة صفرا على النار مــــــــــــركاه=أقصر بصبتها على كيف روحـــي

فنجالها كنه خضاب الخــــــــــــــونداه=الجادل اللي عند أهلها طموحي

عده لمن يثني خلاف المـــــــــــخلاه=فكاك بالضيقات راعي اللدوحــي

وعده على اللي تدفق السمن يمناه=عيد لربعه بالزمان اللحوحـــــــي

وعده لغمر ما توني مــــــــــــــــطاياه=يضوي ولو صكت عليه انبوحـــي

وباقي الرجال افحول نــــسوان ورعاه=ضباط مال وحافظين السروحــي

[ ذعار بن ربيعان من شيوخ عتيبه]

--------------------------------------------

قم سو ما يجمد على الصـين يا ذياب=بدلال يشدن البطاط الــــــــمحاديب

احمس الى من العرق فوقــــــها ذاب=استدن ما يجذب عليك الشـــراريب

والى انطلق من ثعبته كنه إخــــضاب=ورس صبغ بكفوف بــــيض الرعابيب

عده لمن قاد الســــــــــرايا للأجـناب=له مفرس يشبع به الطيـــر والذيب

والثاني اللي ون لفا بيته ركــــــــــاب=قدام بيته مثل جزر القصاصــــــــيب

والثالث اللي ون غشا الزمل ضبضاب=يرخص بعمره دون زمل الرعــــابيب

وباقي العرب يكفيهم التول ون شاب=قضابة المجلس حمير المشــاعيب

اللي نهار الكون يفزع بمصـــــــــلاب =اكبار الأنفس ساهجدين المواجيب

[هايس بن مجلاد من شيوخ عنزه من الدهامشه]

--------------------------------------------

قم ياالمقهوي دن نجر ومحــــــــــماس=واحمس لنا من حب صـنعا نماها

وصب لمرور على الخيل مدبـــــــــــاس=تقفي عنه صم الرمك لانصــــاها

من فوق ما تاخذ علــــى الخيل مرواس=لا جدعت خبثات الانفس حـــذاها

واثنه لـــــــــمن حوله على الزبر جلاس = اهل السموت اللي بعـــيد مداها

ابن عـــبيكة هرجـته ما بهــــــــــــا باس=تطرب لها كرام اللحى من حلاها

طول الجدار وقصــــــــــرت الرجل نوماس = لا صار ما للــــــــــرجل داع دعاها

تصـير بعيون الرفــــــاقه معــــــــــك بأس=لا صـــار ماتدعي من عــــــــناها

يصــــير به قــــالات ويصـــــــــــير لولاس=ونــــوب من الادنين يأتي بـــــلاها

قلـــــــبك يصد ويضرب القلب عومـــــاس=والنفس تقدح عقب زايد غـــــلاها

خـــــلك على بابك تقـــــــل لون حراس =لا جوا عليها محـــــــترين عشاها

لا جن من الخــــــل الشمالي لها اضراس = والكل تشـــــكي رجلها من حفاها

نرحب بهم من قـــــــــــبل تجديع الالباس = نقلـــــــط لهم تمر الحلا من نماها

ونذبح لهم كبش مربع الاطـــــــــــــــعاس = نقــــــــلطه من قبل يقرب مساها

هذي سلــــــــــوم جدودنا قبل من راس = واللي بعدنا كان ربي هـــــــــداها

[مبارك بن عبيكة الشمري]