قـصـة مــراهــق

يكثر في فياض الصمان الابل لكبر المساحه وحسن المرعى وكثرة الربيع وقت الامطار(الله يجيب السيل) وايضاً وجود الدحول التي تختزن الماء في الصيف (الدحول : جمع دحل وهي الحفر العميقة الملتوية في الأرض وتكون في اماكن منخفضة من الأرض تنحدر السيول فيها اثناء موسم الامطار)

من هذه الابل حاشي مراهق ممشوق القوام ابيض اللون كثيف الشعر على الرقبة والحلق والرأس وذروة السنام يمشي متبختراً بجماله (ولا رامي عيّاش) كل همه يتندح بين هالنياق الصغار خاصة (البكار) ويضمنها لا هيئة ولا شرطة ، المهم مرّت الايام وهو على هالحال همه أكل وشرب وغزل في هالنياق

يوم جا ذاك اليوم على عادته الى هاك الناقه واردة الماء وتبي تشرب وماقدرت قال هذي فرصتك وقم وافتح لها حنفية الوايت كلها قال: اشربي لعن ابو الفقر لا تروحين للدحل وانا فيه على غير اهلها ماتجيب راس مالها. شربت لين رويت ومسحت شفايفها بمنديل عشان مايتلعوط او ينملط اويسيح ويخرب الروج وقالت الله يعطيك الف عافيه توني زملة من نزلة هالدحل وعلي هالخف الكعب يزلّّق

قال الحاشي

على شانك تحملت الصعايب ** اذوق المر لأجل رضاك حالي

ابتسمت الناقه وصكّته بذيك النظره اللي بغت تجيب اجله

تنهّد وقال

الله اكـبـر كـيف يجـرحن الـعيـون *** كيف مايبرى صويب العين ابد

احسب أن الرمش لا سلهم حنون *** واثر رمش العين ماياوي لاحد

يوم روّح لي نظــر عينـه بـهـون *** فـزّ لـه قـلـبي وصـفّق وارتعـد

ضحكت الناقه ودرت انها لعبت في سستمه عطته وراها ومشت على هونها وهي تومي بذيلها يمنة ويسره وقلبه يروح يمين ويسار قال

آآآآآآه وانعطف هاك الشعر فوق المتون ** وانثنى عوده وقفى وابتعد

طال الليل على خوينا الحاشي متى يجي الصبح؟ كل شوي يطالع في ساعته الريموندويل ماصدق اانه يسمع صوت الراعي يذّن طمر من محلّه وراح يدور عند الشبك وهو يطقق خفوفه طبعاً ماله أصابع ويروح ويجي لين طلع النور وجاالراعي وفتح لهم هو يقاله صغير والا الأبل مايصّك عليها ماصدق خبر وراح عند الوايت يحتريها تشرب جا الراعي قال : خير انشاالله وش جايبك انت وخشّتك كل ذا ضما؟؟ تلعثم الحاشي

قال : هاه لااا أبد مافيه شي بس طاح كبكي امس هنا وجيت ادوره

قال الراعي : اقول بلا استهبال كبك وانت عليك ثوب ساده يالله ظف وجهك مع البعارين لا ألكمك

لٌقّط وجهه خوينا وراح قال: خيره انها ماسمعت وش قال لي الراعي كان طحت من عينها ولا عطتني وجه المهم وهو يكلم نفسه الا هذي رفيقته تقابله يوم شهق من الفرح ( أمّا بعير يشهق كثّر منها) وقال

كفاني عذاب الله يجازيك بافعالك ** جرحت الضمير ولا طرالك تداويني

ضحكت الناقه ذيك الضحكة اللي شلعت قلبه وقالت

ياعل قلب ماشكـا الـحب والتـاع ** تنهار من فوقه محاني ضلوعه

يـامـا نهيت القلب لا شك ماطاع ** مــاطـاع يـدلـه والليالي تـلوعـه

أثـر الموّلع دمعته تجـرح القـاع ** والى ذكر مافات هلت دمـوعـه

الحين تاكد الحاشي انها تبادله نفس الشعورارتاح خاطره واسفهلّ وماعاد خذته الدنيا. مرّت الايام وكبروا وكبر حبهم معهم ،يلتقون كل يوم ويتبادلون المشاعر والاحاسيس

وفي يوم من الايام وهم قاعدين على ذاك الطعس الا يوم مرت ذيك الناقه العفراء طيّّر عيونه رفيقنا مشبّّه عليها مهوب قصده شي! انتبهت له الناقه خويته وطمرت من محلها قالت خلها تنفعك الله يمّليك بركتها انتبه خوينا انه اخطأ ولحقها وقال: وّقفي اشرح لك الموضوع التفتت عليه وقالت

مــــدام قـلـبي لـكــ شفوق وميلاف *** وراك ياخلي قــليـل الــمــروفــه

قلّي عسى مابه على الخاطر خلاف *** عسى حبيبي ماقصر دون شوفه

لا لا تعسر الـقـلـب في كـل محراف *** واحذر يجي عقب الموده حسوفه

دوك الدمـوع بحـاجـرالـعـين وقّـاف *** لاانت بماسكـهـا ولاهـي ذروفـــه

تحسّف ابو الشباب ودرى انه غلطان وانه حسّها رد عليها وقال

لك حـق تزعل ثم لك حــق نرضـيـك *** مااقوى زعل حبيب قلبي وعيني

مدام قـلـبي يـاريـش الـعـين مغـليـك *** اطلب ولك روحـي ومافي يـدينـي

يوم الله احسن صورتك خصّني فيك*** فـيك الجمال وصادق الحـب فـيني

وقفت وتبسمت وارتاح خاطرها وهو تنهد قال هاه طاح الحطب ؟ قالت اه ياااني لو كنت آأدر اسيبك (شويكار مهيب ناقه) وعاشوا في سبات وتبات وخلفوا حواشي وناقات