<< ماعندك أحد >>

امريكا تكذب وتهلس على الناس .. وهم ماعندك احد يصدقونها

حتى صار شعارهم :

اذا قالت امريكا فصدقوها ............ فإن القول ماقالت امريكا

*

*

*

مافيه شك ان امريكا كذابة من يوم ان الله خلقها

لكن من تالي كاثرٍ كذبها .. وصايرةٍ تقط خيط وخيط

وصايرٍ كذبها مايمشي على الطفل .. لكن يمشي علينا لاننا

ماعندك احد

( معنى ماعندك احد لغير الناطقين بالامازيغية = يعني مااااااا هناش ) << عاد ترجموها

*

*

*

## ...... نماذج كذبية ...... ##

*

*

الخبر :

العثور على شريط فيديو / مستندات هامة للقاعدة في احد الكهوف

التعليق :

صرنا نتخيل القاعدة مثل بسطات الحريم .. يجمعون اغراضهم بقطعة قماش

وينحاشون من كهف لكهف .. مرة يطيح منهم شريط ومرة وثيقة

ومرة صورة .. ومرة رسالة ..

( اللي مايعرفون بسطات الحريم يتجاوزون هالنقطة الى غيرها

وشـكـراً )

*

*

*

تضع امريكا صورة لشبه مراهق .. البراءة تشع من عينيه العسليتين الواسعتين

ووجهه المشرب بحمرة العافية

وتحته هذا الخبر :

القبض على احد عناصر القاعدة

.. وبحوزته عشر قنابل نووية ..

وخمسين جرثومية .. و سبعين حزام ناسف .. ويمتلك معمل للاسلحة الكيميائية

والبيولوجية .. يشتبه في تخطيطه لهجوم كان سيقضي على نصف سكان الكرة الارضية .. ويهلك الحرث والنسل ..

التقى باسامة .. وصاهر عبدالله عزام .. وتتلمذ على يد ابن تيمية

كان من مؤسسي حركة حماس .. شارك حسن البنا في تكوين جماعة الاخوان المسلمين .. كان احد معاوني بيبرس .. والذراع الايمن لصلاح الدين

وامين سر قطز .. وفكره تكفيري اجرامي ارهابي

ومن اتباع مذهب المعتزلة والجهمية والقدرية والبرامكة

وبني هاشم .. وهاشم من قريش .. وقريش من العرب

والعرب من ولد اسماعيل بن ابراهيم عليهما السلام

وهو شين ويحوم الكبد ( تونا قايلين عيونه عسلية واسعه .. شفتوا وشلون امريكا تفتري على الناس )

اووووف تعبت من الوصف ..

اجل وش تقول امريكا اللي دايم تسرد هالاوصاف

وهو كل ذنبه .. انهم يمكن شافوه يحافظ على الصلاة

ويمكن سمعوه مرة يقول ( احب اسامة .. او شفت صورة اسامة .. او سمعت كلمة اسامة .. او صديقي اسمه اسامه .. او انفاذ حملة اسامة << بن زيد مهوب بن لادن

*

*

*

كل يوم والثاني ماسكين واحد ويقولون عنه :

القبض على احد زعماء القاعدة .. يكشف اسرار خطيرة

وعمليات تعتزم القاعدة تنفيذها .. وهو الذراع الايمن لاسامة

التعليق :

على هالحال كم لاسامة من ذراع ؟؟ صار اخطبوط !!

*

*

*

الجدير بالذكر .. ان امريكا جنودها مايموتون .. ولا ينجرحون

ولا يغلطون .. وطياراتها ماتطيح .. وصواريخها ماتخطي

واذا مات لهم ثلاثمية جندي .. قالوا : الخساير جندي واحد ( مامات لاتخافون )

بس فيه اصابة عبارة عن شطف على جفنه الايمن .. وبعض المخوش في وجهه

بس مااثرت على وسامته .. يعني يبي يتزوج ويجيه عيال .. تطمنوا

وبعد سقوط خمسين طيارة .. تعلن عن سقوط وحدة بسبب سوء الاحوال الجوية

.. يعني مهووووووووب من المجاهدين ابد ( والطيار طبعا نجى باعجوبة )

شكل امريكا متأثرة بافلامها .. اللي يقابل البطل جيش مدجج بالسلاح

ويحصدهم برشاشه .. ويتسلق الجبال الشاهقة .. ويتعلق بالهيلوكوبتر

ويقتل طاقمها ويقودها بأمان !!

ماش وين امريكا اللي منول كذبتها ماتخر الموية ؟

*

*

*

اسرى كوبا .. صوّرتهم وحوش كاسرة قادمة من الادغال

و خطر يهدد الانسانية جمعاء .. قدراتهم خارقة واسطورية ( قايلة لكم متأثرين بافلامهم )

وهم شباب عادي تشع البراءة من عيونهم ( عاد مدري هي عسلية او لا )

*

*

*

امريكا مثل المولينكس

المولينكس .. بضغطة زر تسوين اللي تبين

وامريكا .. بتغيير كلمة تسوي اللي تبيه

حرب الاسلام ----- >> خلتها حرب الارهاب

ودرعمنا وراها ولسان حالنا

( الله يجزاها خير .. تبي تخسر كل هالمخاسير

عشان نعيش بأمان )

حرب العراق ---- >> حرية = تحرير العراق

وحنا عاد تفشلنا من جمايلها اللي مغطيتنا ولسان حالنا :

( ياحليلها جايه من كل هالبعد ومكلفة نفسها عشان ينعم اهل العراق بالحرية )

وبيني وبينكم .. هي لو قالت ( حرب الاسلام - حرب العراق )..

ماحناب مسوين شي .. بس هي تراعي خاطرنا وماتبي تجرحنا ( بكلمة )

*

*

*

لكن الشرهة مهيب على امريكا ..

الشرهة على اللي يصدقونها ..

مااقول الا الله يخلف بس

اكذبي ياامريكا وخوذي راحتك ....

تـرى

مااااااااا عندك احد

[/align][/align]

نسيت لأقولكم أنه منقووووووووووول لا تورطوني

شكرا على مشاركتك ياليلك موضوع يطرح عدة تساؤلات عن حقيقة الاعلام الامريكي لانه لا يحتاج المرء الى الكثير من الفطنة ليعرف حقيقة الاعلام الامريكي الحقير ومدى دنائته، ولا يحتاج لمعرفة الاكثر للعلم بأن أمريكا تخطط طويلا قبل القيام بأي عمل عسكري او سياسي، وهذا بالواقع الفرق بين العرب والامريكان، هم يخططون طويلا وعلى مهل، ويدرسون كل ما ينوون الاقدام عليه، فهناك فريق تخطيط عسكري وهناك فريق سياسي وهناك فريق اعلامي وهناك فريق دعم لوجستي لتأمين الدعم الخارجي وهو مرتبط بوزير الخارجية وهناك فريق دعم استخباراتي لشراء الذمم والجواسيس والعملاء، ناهيك عن الفرق الامنية المتشعبة المرتبطة بمدير الاستخبارات المركزية ومستشار الامن القومي. وكل هذا التخطيط وكل هذه الفرق تبقى في جهوزية عالية حتى اذا تم العمل المدبر والمنوي القيام به، يتم على اكمل وجه وبنجاح يتوافق مع سمعة الولايات المتحدة العسكرية والسياسة والاقتصادية والعسكرية والتكنولوجية.

تحياتي : راعي النزية