حميان و أول يوم من المدرسة - 2

السلام عليكم

حيــــــــا الله ربعنا ... هلا بشلة بوابة الساخر

حياهم الله أقـــلـــطــــــوووو

نبي نكمل لكم موضوع : حميان و أول يوم من المدرسة .. في الجزء الثاني.. وعساه يجوز لكم ... واشوف ردودكم اللي ترفع المعنويات وحتى لو ان الوقت غير مناسب لانزال هذا الموضوع ..بسبب الاجازات والسفريات بس نبي ننزله اليوم وابي اعيده بعد الاجازه في صفحه وحده مع الجزء الاول ان شاء الله ان كانا من الحيين .. ما اطول عليكم الله يعينكم على طول القصه ... يالله

حميان و أول يوم من الدراسة

الفصــل الثالث

مع إطلالة أول يوم دراسي من العـــام ( آلف وثلاثميه وحطبه / آلف وثلاثميه وحطبه و واحد ) كان موعد وزارة المعارف ( سابقاً) مع إطلاله خطيرة وإضافة سلبية لهذا الكيان .. فقد كان موعد انتماء عضو جديد بقراطيسه لمسيرة التعليم آلا وهو الطفل المهستر والنابغة في إحلال المشاكل في مكان الأمن و الإزعاج مكان الهدوء ،حميان وما أدراك ما حميان .. نبدأ معكم الآن في الفصل الثالث والمشهد الأول منه :-

المـشـهد الأول :-

(( اللحظات الأولى من خروج حميان للمدرسة ))

في فجر يوم السبت الموافق العاشر من شهر شوال سنة آلف وثلاثميه وحطبه كانت فرحة أم حميان لا توصف لدخول حميان المدرسة إلى حد أنها ما نامت الليل ( من القارص أو النامس) مولمتن مقطع العيد مغسل وش نظفه بس بدون كوي ( تقل عالكته بقرة) وكذلك شماغ العقل .. وبعد ما جاء حميان هو و أبوه و إخوانه من المسجد كانت أمه في استقباله ولبس ثوبه ولفت على راسه الشماغ و ربطته بأحكام من فوق و مضغوط على حنكه ( ما يقدر يفق خشته ) وعلقت المنديل على كتفه الأيمن وشبكته بالمشبك ( أمه متمدنة) وقالت ياحميان لياك تفشلنا وتمش نخرورك على تسمك ( كالعادة) ولا إياك تنشق عند الناس وخذ هذي سندوستين لك وللقروي وهذي أربع قروش (( وشددت علي في المحافظه على الاربع قروش .. شكلها تبيني ارجعها معي !! )) .. وفي أثناء ذلك كان القروي جاي بسيكله الأربع وعشرين وجالس يضرب بواري هواء ..

المشهد الثاني :-

(( أول لـقاء بين حميان و القروي ))

أول مرة أشوف القروي كان شــاب في مقبل العمر وسيع البال خـاط شنـبه وفيه بعج في جبهته اقرع ولابس طاقية زري اخضر واحمر .. ومشخص بسيكله الأربع وعشرين وسيقانة تسحب في الأرض .. ((يتم الاستفادة منها للفرامل)) ..

سيكل القروي : أربع وعشرين مزبرق نسافات قدام و وراء و مركب عليها اسطبات و ريش نعام على الدركسون وشطرطون اسود على الهــيكل ... والجنزيرما خذ راحته كل شوي منفرط ويزينه .

مع طلعتي من بيتنا بدا يزاعاق الـقروي ويقول : وينك يا لشين لي ساعة وأنا منطق عند عتبة بابكم اضرب بواري جعلك للصـمـخ .

حـمـيان : ( وأنا فاقن خشتي .. طالعة تقل مسرح ذبان ) .. لا تعليق ..

القروي : أقول يالصتيمة هـات سندوستي واركب تأخرنا

عطيتـه السندوسة... وخشتي لا زالت على فقتها .. وعيوني طايرة وما اقدر احتسي من ربطة الشماغ المحكمه ..

استلم القروي السندوسة وفكها وقلبها فوق تحت وتأكد من وجود الطحينية وحطها في مخباته ... وقال بصوت خافت : ( نعنبو هالبخل ) .

المهم ردفـني القروي على الجلاسه اللي وراء واشتغلت اللقافه عندي وبديت اطقطق برجلي على الكفر الين نشبت رجلي بين الكفر والجنزير مما عطل الرحله واضطررنا للتوقف وطلعنا رجلي واصبعي الصغير مهوب معهم ..بس مشيناها باربع اصابع ( عادي شباب في رحله) واثناء توقف الرحله لمحتلي مسمار على الارض وخذته يكمل العدة اللي في مخباتي ( لزوم الشغل) كان لي فيه مئارب اخرى بس فـك الله كفر السيكل منها ..

ما قصر القروي ووصلنا للمدرسة وطول الطريق وهو يهددني باستاد أبو كلبشه ... وانه متين وشديد وفيه نعره ويطق فلكه ويمصع الاذان ( اشوف اذن القروي تقل سماعات استريو ) .و..و .. ويوم وصلنا المدرسة من محاسن الصدف كان في استقبالنا عند الباب ( استاد ابوكلبشه) وشلة من الأساتذة ( تكلم في الأُط يجيك ينُط ).. وعرفت استاد أبو كلبشه سبحان الله من توصيف القروي له في الطريق ...

المشهد الثالث : -

( فصل أولى ب )

دخلت الفصل على أصوات الونانات تنطلق من كل جانب .. واللي ساكت تلقاه متوسد الماصه و يشخر .. لبدت في واحد من الكراسي واللي جنبي مشغل مضخم الصوت وهو متوسد الماصه وأنواع الشخير ( اطقع ما عنده الدراسة )

وعلى هاللخبطه تفاجئنا بدخلت الأستاذ الكبير والعريض ( مستر ابوكلبشه ) داخل ومعه قطعة خبز تميس يعرم منها وطاقن بنت البكار والطاقيه محليه .. ونظرات حادة تبحث عن ملاحظة في وسط هالفصل اللي كله ملاحظات ..

وبدأ يدندن علينا بالحتسي اللي يخوف و أنواع التهديد ( خوش استقبال ) :

يـــا عــيلان ركزوا معي بلا صياح ولا نياح .. وينطل ابو كلبشه صاروخ ارض جو ( من الطباشير) على واحد راقد وراء فزوا كل الفصل اللي يصيح هجد واللي نايم قام وما بقى الا اللي جنبي .. ومير اقبصه قبصه (( ذكرتني بعضابة الدختور - جعله للماحي )) قحص المسكين وهو يصايح ما سكته الا طراق ابو كلبشه (اللي خلق له عاهه دائمه تسببت انعدام الوزنيه و حذفه الدائم لجهة اليسار ) وقال له خلك واقف مكانك وارفع يدينك فوق .. المهم كمل ابوكلبشه تهديده واصدر لائحة العقوبات :

1- اللي يجيني متأخر ابلزقه في اخر الفصل وهو رافعن يدينه لفوق و وحده من رجلينه طووول الحصه .

2- اللي يفق خشته والا يتحرك والا ينفس وقت الحصه ابمصع اذانه واحطها في فسحة اللي جنبه .

3- اللي يجيني ما حل الواجب ولا هوب حافظ ابدخله غرفة الفيران يصبح ويمسي فيها .

4- واللي ما فهم كلامي هذا يرفع يده علشان اطقه بكره فلكه قدام العيلان في الطابور الصباحي .

ســــــــــــــامعين ... وكلنا بصوت واحد ايه ( مع هزة الراس ) .

(( ياحليل عيال هاليومين شهر كامل سعة صدر ولعب وما دين لهم السفرة كلها حلويات ( بوفيه مفتوح ) وينفخون على المدرسين .. مابقى الا انهم يحفظونهم !! ))

انا بعد الحصه بغيت اقدم الاستقالة لولا توسط لهم القروي وسمحت لهم بس هالنوبه ..

المهم بعد محاضرة الدكتور ابو كلبشه .. قال للي موقفه جنبي اجلس .. وانا عاد دغدغني ابليس واشتغلت الخباثه وسحبت الكرسي على قعدته والمسكين طاح و تكرفس وصكت خشته على الماصه مما ادى لانكسار ضرسين .. ومع اصطدامه بالارض صدر منه أصوات غريبة مع رائحة كريهة ..ما قدرت استحمل ( اخس يالنظيف ) رفعت معها مصبعي ..يا استاد ابو كلبشه يا استاد ابوكلبشه .. وما دريت الا وهو ناقز جنبي ورافعني فوق مع هامتي وصاكني في اخر الفصل تقل كرة سله ونشب ثوبي في احد المسامير وتعلقت تقل لوحة ..(مابقى الا يكتبون تحتي اعداد ابوكلبشه )..ويجي لمي ويصارخ وهو يقول من هو ابو كلبشه .. هاه .. منهو .؟ ويسطرني طراق ويطيح اللوح ((اللي هو من غير فخر انا )).. اثرها عيارته وانا رحت فيها .. الله ينتقم منك يا قروي.. المهم صار اللي صار ..و ... مانيب مكمل

بس الريحه انتشرت مما أدى الى حمل المتسبب ( من علباه ) لخارج الفصل وإصدار قانون جديد وخاص بالسماح له بلبس حفاظه( خرقه) قبل الشروع للدخول للمدرسه .

تكملة المشهد حذفت لضيق وقت البرنامج ... ( عذر )

المشهد الرابع :-

( المقصف )

رن الجرس وقبل ما نطلع من الفصل لاحظنا تجمهر بعض الشباب حول الفصل و جالسين يهيجنون ( اولى بليدة شبت حريقة قي بيت امريكة ... الخ ) ..و تأكدنا من مصادرنا الموثوقه ان طلاب السنه الثانية هم المتسببين في هذا التجمهر ... وانهم من اللي لهم باع طويل في اولى وما طلعوا منها الا بالدف .

المهم اننا اتجهنا للـــمــقصف .. وكانت زحمة ما يعلم بها ألا الله ..وكان فيه بعض الشباب المماليح جالسين على جنب ( مالهم نيه يدخلون في المعمعه ) بس خويكم حميان ( شديد والهواء ضده ) على طوول بدأ يبرز قواه ويستخدم الكتف القانوني يمين ويسار .. بس كانت الحيطه كبيره وصعبه..

لذا تم استخدام الخطه البديله وهي محاولة ربط طرف كل شماغ من شمغ الشباب اللي حول دريشة المقصف مع اللي جنبه و اللي جنبه مع اللي جنبه .. وهكذا..الى مــا جاء يطلع اللي قدام ولاه يجر شماغ واحد جنبه والثاني مع الثالث ..الى ماصارت حوسه حول المقصف واختبصوا الشباب وانفردت بدريشة المقصف واطلع الاربع قروش اللي حافظها حفظاً سنعاً ( حسب توصيات الوالده سلمها الله ) وامدها لــعــبده اليماني .. واقول ابي اثنين كراش ( ميرندا) .. ورجع الباقي .. تروع عبده وقال : وش انت معطيني !! هذا ريال بدوي اربع قروش ماتجيبلك حبة كراش رح يا شاطر وكملها .. ومن محاسن الصدف كان داخل المقصف حبيب قلبي ( القروي ) الله من الواسطه ( الخبره تلعب دور) .. طلعت الحميه.. وقال القروي عطه يارجال وخلها على حسابي .. قال عبده ياقروي تراك من قبل العام وانت ما سددت وصلتها (45ريال ) سدد اللي عليك بعدين باشر على العيال .. قال القروي انت شكلك ياعبده راسب في الحساب ..قال عبده انا ما اعرف الا الحساب وبس .. قال القروي طيب لو ضربنا ( 45 )في ( صفر ) كم يطلع .هاه يا عبده .. ان كانك جيد قلها .قال عبده الذهين ..اكيد بيكون ( صفر) قال القروي ماشاء الله عليك يا عبده منتب سهل .. اجل الان انت ما تطلبني شيء ..صح ..قال ايوه صح ..بس حق الكراش هذا برا الحسبه .. ( ذكي عم عبده) ... وبعد تميلح من القروي ..وافق .

المهم خذت حقي .. ومن العجله ابي اخلص هالقصه ( طولت عليكم ).. وأنا طالع من زحمة المقصف تكب كب كب كب الكراش وسرقوا سندوستي الخبيثين

وطلعنا من المولد بلا حمص ولا تبوله .. والسلام عليكم ...والله تعبت عاد عطونا الرضاوه .

هلا بالحبايب ..

ومتأسف جودن جودن على التأخير

معليش مفركين من الديرة منذو مبطي .. ولا هقيت احد يبي يفطن للسالفه قبل ما تنخلص الاجازه بس اخواني الغالين :-

مرتــــــــــاح ( اقطلعك منها قنمه )

هوواووي ( الناس في اجازه يا ضب الديره .... مزحه لا تزعل

والمدير (( مسفهل )) اللي فاهمني

((( بس بيني وبينك .. وش ذي برستيج )))

اشكركم على الحظور و التعقيب

و الباقين معذووورين في الاجازة

. ان شاء الله يشرفونا اذا رجعوا

مُبــــــــــــدع

المبدع حميان

انا اشهد انك منسم وبقوه بعد

أول مرة أشوف القروي كان شــاب في مقبل العمر وسيع البال خـاط شنـبه وفيه بعج في جبهته اقرع ولابس طاقية زري اخضر واحمر .. ومشخص بسيكله الأربع وعشرين وسيقانة تسحب في الأرض .. ((يتم الاستفادة منها للفرامل)) ..

^

^

^

هع هع هع هع هع هع والله التوصيف السيقان شي

( مستر ابوكلبشه <<<<< ودي اشوف شكله ياخوي ماصورتوه

احس انه يشبه يو سف الجراح في طاش ماطاش اذا سوا نفسه مدرس وانت والقروي ناصر وعبدالله

ككككككككككككككككككككككككككاي

الكراش<<< وش طعمه احس انه ببسي مزيود معه مويه وطالع طعمتها ماااصل وعاااااااااا

تحياتي لك يالمشرف يامبدع حميان بيتش

وننتظر المواضيع المقبله والمغامرات الزاهره بالشجاعه والتحمس والبطولات <<< حشى صرت فريق

تحياتي

فتاة سوق السبت

أنتهت فترة نشر الموضوع .. والحين دور المشرفة الجديدة تسبعة