المصرقع قام بنشر June 7, 2003 ارسل تقرير Share قام بنشر June 7, 2003 سعيدان والعنود وحب لن يعود -------------------------------------------------------------------------------- هذا صوت اميمتي الله لا يخليني منها وهي تقومني الصبح وتقول يا سعيدان قم يا وليدي والحق على مدرستك <-- الله من الصدز لو يشوفونك بيغنون (عيرتني عيرتني بالشيب وهو وقار فياليتها عيرتني بما هو عار) الوكاد قمت من النوم وانا لامني قمت من النوم علوم وعلوم لاني عيوني ما افككها الا بزيت فرامل من الغمص واقوم واروح للحمام عاد القعدة بالحمام توسع الصدر الواحد وده يحطون له بطانيه اسبانيه ولا كمبل بالحمام ويستقر فيه من زود الراحه انا عن نفسي ما احس اني فنان الا لامني صرت بالحمام وقعدت اغني (طائرات الميج بازورك حبيبي...في ظلام الليل من بعد العشيه) قسم ساعات احس اني احسن من ابو نوره لان الصوت يطلع له صدى وما يخرب هالصوت الا رجفت الباب لامن اخوانك قالوا اطلع من الحمام طلعت روحك الوكاد لما قومتني امي من النوم قمت وسحبت الكمبل اللي فوقي وشوي الا اشوف برصي نايم على المخده اللي بجنبي وكاتب ورقه بجنبه يقول (الاخ سعيدان الرجاء عدم الازعاج عندما تقوم من النوم ولا تتبيثر وتفتح النور وتسحب الكمبل مع تحيات اخوك برصي ) وش اسوي لهالبرصي متقاط معي بالغرفه رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 رحت واخذت ثوب قديم عندي مشقق وكنت استغله في بعض النوبات باني اقطع منه واكتب بهالقطع براشيم وخليته في الوقت الراهن فوطه ودخلت لبيت الراحه وناظرت لوجهي بالمراه والمراه انا معلق عليها صورة باسكال المشعلاني ويوم ناظرت لبسكال وناظرت لخشتي قلت يالله يا ربي بالهااليوم الكريم انك تعوضني بالجنه وناظرت لمعجون الاسنان وناظرت لااسناني قلت وشوله انظفها الشين شين ولو يغسل بمعجون واروح وافتح الدش وانسدح بالمغطس واخذ لي غفوه ما دريت الا ابوي يرجف علي الباب ويقول سعيدان اطلع يا ما للطواليع وللطواعين اللي تطعنك ولا تخلص الماء علينا وش عليك ماهو انت اللي بتدفع الفاتوره دفعوك للفقر يا وجه الفقر ( دايم ابوي يعاملني بقسوه ساعات احس ان ماني ولده وانه لا قيني عند باب مسجد تهي تهي تهي ) طلعت من الحمام ونظرت الى ابي وفي عيوني دمعه تكاد ان تفر ومرقت من امامه والدموع تتسربل من عيوني (على بالي ابكسر خاطره) ما دريت الا هو راجفني بشوته من خارج ال 18 وهو يقولي عجل على مدرستك لا بارك الله فيك من ولد دخلت للغرفه ولبست ثوبي طبعا تحت الثوب ما يحتاج التطقيمه المعتاده فنيلة علاقي تدرون وش السر في ان العرابجه يلبسون فنيلة علاقي علشان النفر اللي بالصدر يعيش قصة حب مع النفر اللي بالجبهه والشخص لابد وما يكون واسطة خير بينهم وما يقعد يستخدم سياسة الحرمان بين الحبايب ولبست الطاقيه (طاقيتي من القديمات اللي فيهم عشر وردات حمر على الجوانب) ولبست عقبها شماغي ويا عيني على الشماغ تحسه سماط مقطوط في عزبة زيود ما يتغدون الا على بخاري ما اكويه الا كل عيد ضحيه واخذ كتبي وطبعا كتبي مشقق والدينها لاني استخدم الاغلفة في عملية نقش السنون بعد الفسح وتحس ان دفاتري جدار قاعدين يكتبون عليها عرابجه ذكرياتهم والان عزيزي القاري هل تحس ان هالشخصيه شخصية طالب دافور رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 عقب ما تسكبت وقفت قدام المراه وانا انظر الى نفسي فخرجت كلمة ابوك يالطخوميه من بين اشداقي ورحت ابفطر الى اميمتي الله يطول بعمرها اول ما شافتني دائم تخدعني وتقول ( ياارض احفظي ما عليك وش هالزين يا وليدي ) وما دريت الا طوفرية الشاهي تمشي مليون وصوت ابوي وراها الى متى يالسمرمدي وانت تتوخر عن مدرستك قمت والدموع تكاد تنفجر من الاحداق وانا انظر الى ابوي وقلت له طلقني طلقني وخذيت كتبي وهجيت طبعا دائما امر على صديقي ابو راسين قبل ما اروح للمدرسه علشان نمر اطرف بقاله ونتقاط انا واياه في بكت زقاير الوكاد رحت لبيتهم يوم جيت ابطق جرسهم الا المفأجأة اللي لخبطت حياتي كلها لقيت بابهم مفتوح والعنود اخت ابو راسين تنتظر الباص وما بعد تغطت يوم شافتني قالت يووووه قلت انا يا ولد يا اهل البيت وانا عيوني مزغلله فيها وهي متلخبطه رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 عاد انا عقب هالموقف اطرقت براسي خجلا وقلت لها وين صديقي ابو راسين وانا مستحي قالت يا سعيدان يا ولد جيراننا سلم اول وقل صباح الخير قلت صباح الخير يا مشمش طري مبلول قالت يووووه هي قالت يووووه من هي وانا رحت للبرحه اللي ورى بيتهم وانا طاق اللطمه واقلد حركة بيبيتو يوم جاه ولد في كاس العالم 94 وشوي الا ابو راسين جاي وقال هلا صديقي سعيدان قلت هلا والله بحشاشة جوفي وباخو حبيبتي قال وشو قلت يالله يا صديقي تأخرنا على المدرسه انا كنت اسمع عن الحب من اول فشقه بس ما كنت اصدق فيه الين ما صابتني سهام العنود في المدرسه المدرسين يشرحون وانا قلبي ينزف وقاعد افكر بالعنود وهي تقول يووووه وتعدل غطوتها وقاعد اشخبط بالورق واكتب ( وان مت فبجنب العنود ادفنوني...واكتبوا على القبرين بيضاء صحيفه) خلالالالاص حبيتها يا عالم رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 جاء اليوم الثاني وانا من صباح الله خير قايم ومتجهز وقلت يا ولد افطر مبكر وتلاحق وكحل عيونك بشوفة العنود وانا متربع ابفطر الا امييمتي تقولي ماهي بالعاده يا وليدي قايم بدري قلت خلاص من اليوم ورايح بتشوفيني مثل هالدياتسه اللي تعوي بهالفجوريات وشوي الا الطوفريه تمشي مليون ووراها صوت ابوي وهو يقول اللي يعوي الذيابه يا القرد وهو يوجه كلامه الى اميمتي ويقولها اكيد قايم بدري علشان يمر على هالصايع ولد جيراننا ويروحون ويتتنون وخذتني الفزعه بغيت ارسله الطوفريه سفري لانه يتكلم على نسيبي ابو راسين اخو العنود بس استخرت وطلعت ابروح اشوف العنود الا هي بتركب الباص وتطالع فيني وتخيلت انها تقولي ( يا ابظااااااااااي ) يا حياة الشقاء يالعنود نعنبوا ابوتس ذبحني حبك بظرف يومين واقعد افكر وانا انتظر ابو راسين وقررت اني اصارحه يوم شفته اقبل وحنا نتسحب للمدرسه قلت يا ابو راسين انت صديق عمري وانا في نفسي شئ لابد اني اصارحك فيه قال لا تقول ما معي قطية الدخان قلت لا قال لا تقول اني مانيب شارد معك من المدرسة قلت لا ابوك يالداشر هذا اللي هامك قسم لو تدري وش اللي بنفسي يا ابو راسين ان تنغز وتجيب لي كرز دخان قال وش القصه يا سعيدان قلت يا ابو راسين انا طحت بالحب قال وش الحب الحب الحساوي ولا حب القرع ولا حب الجح ولا حب عباد الشمس عندها اضطريت اني اغني له (يا ناس حبيت واحد...واثر المحبه صعيبه...واثر المحبه تبكي..والقلب محدن دري به) قال افااااا هذه نهايتك يا سعيدان تحب لك واحد قلت له ووجع نعنبو حيك يا ابو راسين انا احب اختك العنود قلتها من هنا وانحشت من هنا وهو يطرد وراي ويقول وقف يا سعيدان اذا ما العن سلسفيل جدودك وانا اركض قلت له يا ابو راسين انا احب اختك حب شريف وابتزوجها على سنة الله ورسوله الا يوم وقف وقال اشوى قلت له انا خلاص بدون اختك ما اسوى شئ قال لي يا رجال انت خلقه ما تسوى شئ قلت وشو قال احلىىىىىىىى يا سعيدان تحب اختي وبتتزوجها وابقول صديقي نسيبي الله من الخبال بها البني ادم قال بس اسمع يا سعيدان نبي المهر سيكل صتي 24 ونبيك تشتري لنا مليون كرز دخان <---- سفيه وش نسوي به رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 وهو يخطرف بالكلام قلت له وش السواة يا ابو راسين قال تعال انت وامك وابوك واخطبوها وقالي تصدق يا سعيدان لو تتزوج اختي ابسكن معكم بالبيت <--- ابوك يا البثاره الوكاد اني قررت اني اتوكل على الله واكلم اميمتي وابوي علشان يروحون يخطبون لي العنود حبي الابدي رحت للبيت ودخلت على اميمتي وقلت يمه قالت سم يا ولدي قلت يمه ابي اتزوج قالت ووجعن يوجعك انت وابوك متى تزوج هالشايب المخطرف (عاد هالمقطع انا حاطه علشان انتقم من ابوي ) قلت لا يا اميمتي انا ودي اتزوج قعدة تضحك واطالع فيها وانا اكلم نفسي قلت عسى ما مليت عينها بس وراتس يا اميمتي قالت يا ولدي وينك ووين الزواج توك تدرس والمستقبل قدامك طويل(الله من زين المستقبل عاد ) قلت يا يمه اخاف ان البنت اللي احبها تطير وتروح من بين يدي اقل ما فيها اخطبوها لي تكفين يا اميمتي وكانت يداي ترتجفان ودموعي تنهمر مدرارا مدرارا ونخاريري تتسربل من فتحات خشمي واختلطت بالدموع من اجل العنود يوم شافتني امي على هالحاله قالت بس يا ولدي بس منهي هالبنيه قلت يمه بنت جيراننا العنود تكفين يمه قالت ابكلم ابوك ويجيب الله مطر <--- ويقولون من وين تعلمنا للعربجه رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 رحت لغرفتي وقعدت انتظر امي تجيب الخبر من ابوي ويوم قعدت شوي الا واسمع رجفة ابوي للباب وهو اللي يجي ويعلقني مع ثوبي ويرفعني الى مستوى وجهه ويعطيني هذيك الخضراء اللي ناشبه بحلقه وهو يقول نعنبوا حيك يالداشر وين انت ووين الزواج (انا نفسي افهم هو ليه يكرهني ) قسم يا سعيدان يا لو ما عقلت وما شلت هالامور عن راسك وما انتبهت لدراستك اني لا اخلي وجهك ملاهي يلعبون فيها اخوانك <--- بيفتح فرع لملاهي الحكير بوجهي وهو اللي يطلقني وهو اللي يطلع ويقفل الباب بقوه ويقفل وراها احلامي مع العنود واقعد اصيح واصيح واصيح وجت امي تواسيني قلت يا يمه شكلي مانيب ولدكم <-- يمكن انك اخو ابو راسين ليه هالمعامله وليه هالظلم في حق مراهق كل ذنبه انه حب بعنف وحب حب شريف حرام عليكم يا ويلكم من الله وهي اللي تبكي وتطلع من الغرفه تصدقون حتى البرصي اللي ساكن معي لقيته يبكي ويقول مالهم حق اهلك عندها قررت قرار خطير قررت اني انتحر واضع حد لمعاناتي والمي وتعاستي وحبي للعنود رابط هذا التعليق شارك More sharing options...
المصرقع قام بنشر June 7, 2003 الكاتب ارسل تقرير Share قام بنشر June 7, 2003 يوم جاء يوم الخميس وانا اللي ارقى للسطح والبيت ما فيه احد اميمتي مسيره وابوي ماهو في البيت واخواني ما عندك احد واقفل باب السطح وارقى على الجدار وااشر بيدي للعالم اللي تحت ويتجمهرون العالم ويكلمون الشرطه ويكلمون الدفاع المدني واشرت لهم بيدي وقلت وداعا قالو وش بتسوي قلت ابنتحر قالو لالالا لا تسويها ويجي ابو راسين ويقول يا صديقي لا تسويها من يقط معي بالدخان من بعدك ويجيبون اميمتي وتقعد تبكي وتقول لي تهون عليك اميمتك تخليها بلحالها من بعدك يا جنيني قلت ايه انا هنت عليكم ورفضتم تزوجوني حبيبتي العنود ويروحون الشرطه ويجيبون ابو العنود ويفهمونه الوضع ويجيب معه العنود ويقولي يا سعيدان تعوذ من ابليس يا ولدي وانزل وازوجك العنود قلت تهك علي ما انا بنازل وتقعد تبكي العنود وتقول انزل يا سعيدان بابي انت وامي انزل يا حبيبي من لي غيرك بهالدنيا قلت لها (خلالالاص من حبكم يا زين عزلنا...ما عاد لي في هواكم شف اوراقه...اللي شبكنا معك يا حلو يخلصنا....يكفيني اللي حصل باستحمل زياده) ااااااااااااه ويلالالالالاه تررررم اااه ويلالالاه تررررم وتقعد تبكي العنود وتبكي امي ويبكون رجال الدفاع المدني الا على جيت ابوي يوم شافوه العالم جاي وهم اللي يكلمونه ويقولون له ولدك راقي للسطح بينتحر زوجه العنود واخلص وامام هالموقف الدرامي قال ابوي تدرون وش قال انزلوا تحت اعلمكم وش قال - - - - - - - - - - - - - - - - - - - - - - - - - - - - - - - - - - يا سعيدان يا ولدي لا بغيت تطمر من السطح اطمر على راسك وانتبه تطمر على رجولك اخاف لامنك طمرت على رجولك تتكسر ونبلش فيك لكن لامنك طمرت على راسك بتموت على طول .. ................. ............... ............. ........... ......... ....... ..... ... . المصرقع.نت رابط هذا التعليق شارك More sharing options...
ابو صــويـر قام بنشر June 7, 2003 ارسل تقرير Share قام بنشر June 7, 2003 هههههههههههههههههههههههههههه والله انها خبال مسيكين سعيدان ماتهنى بحبه لكن الله يعوض عليه كل التشكرات للمبدع المصرقع رابط هذا التعليق شارك More sharing options...
الزير قام بنشر June 7, 2003 ارسل تقرير Share قام بنشر June 7, 2003 هههههههههههههههههههههههه .. الله يقطع شيطانك يالمصرقع .. الظاهر أنك منتب عاقل أبد .. لكن والله موضوع مجنون .. حرام مايصير في بوابة المواضيع المتميزة .. رابط هذا التعليق شارك More sharing options...
الجريح قام بنشر June 8, 2003 ارسل تقرير Share قام بنشر June 8, 2003 لووووووووووووووووووووووووووول الله من الخبال في راسك يالمصرقع بس والله ان الموضوع مهبوووووووووووول رابط هذا التعليق شارك More sharing options...
.. متكيّه عند بقاله التركي .. قام بنشر June 8, 2003 ارسل تقرير Share قام بنشر June 8, 2003 موضوعك راااااااااااااائع رااااااااااااااااايق خفيف ظل بلا تكلف يجنن من جد .. تسلم يمينك مصرقع .. انت فنان لا تحرمنا من ابداعاتك تحياتي لك ،،، اختك / متكيــــــــــه رابط هذا التعليق شارك More sharing options...
المصرقع قام بنشر June 8, 2003 الكاتب ارسل تقرير Share قام بنشر June 8, 2003 ابو صوير الزير الجريح متكية مشكوووووووووووووورين على الردود الحلوووووووووووووة رابط هذا التعليق شارك More sharing options...
ودوود (مغاسل سدير) .. قام بنشر June 9, 2003 ارسل تقرير Share قام بنشر June 9, 2003 صديق أنا موصرقأ شوكرن كتيييييييييييييييييييييييييييييييييييييييييييييييييييييييييييير رابط هذا التعليق شارك More sharing options...
Recommended Posts
من فضلك سجل دخول لتتمكن من التعليق
ستتمكن من اضافه تعليقات بعد التسجيل
سجل دخولك الان