قصيدة استسقاء ومدح لأهلي سدير


Recommended Posts

هذه قصيده استسقاء ومدح في أهالي سدير اعتمدة اخفاء اسم الشاعر ومناسبة القصيده لعل احد القراء يبين ذلك.

يالله بنو للرعد به زلازيل=== ينشي من القبله صدوق خياله

ينشى الضحىوهواسود كأنه الليل===البرق به مثل الضوي اشتعاله

يحداردونه مثل زجر المحاحيل===وعايز مزنه مثل دامر حلاله

والينتهض ساق السد بالهماليل===مثل النعام اللي تزايد جفاله

من واحد ماهوب منان وبخيل=== رب كريم كل حي يساله

سيل يعم سدير من غير تفصيل===عقب اربعين الحول يذكر كماله

الغاط والزلفي يحده مشاميل===واباذريه والوطي من سهاله

ويضفي على المشقراذا هود الليل===يعم شعبانه يجي باحتماله

يأطا الرويضه والحريق مقابيل===وابا السروج ومن حدر من قباله

وراضي يحيى به حلال مهازيل=== حيثه هو اللي ينطح السيل جاله

والينحدر يضفي على العوده السيل===وتمير ومجزل تملى حجاله

ويثني شعيب الغاط سياله بتسهيل===مايتعب اللي غارس له سباله

يمطرعلى حرمه حقوق المخايل===يشبع بها الحرفي وراعي العماله

ويعلى وادي المجمعه للمطابيل=== وابا المياه علاوته واسفاله

يمطرعلى هدب الغروس المضاليل===يحير سياله في النخل والحياله

ووادي القفي زين البساتين ونخيل=== بالقيظ يسقى صافي من زلاله

كدادهم كأنه على ساحل النيل=== تسمن معوايده ويكثر رياله

يرجع سدير ويكثرا المحاصيل=== تلقى به التاجر ينمي حلاله

غرايس يزينها طلعة سهيل=== يفرح بها اللي جايعين عياله

للاجنبي والجار فيها مداهيل=== خسر ريال القيظ من له وماله

الاهالي يعطى الكسافه بلا كيل=== والاجنبي يعطى العلاف لزماله

هذا يبي حضره وهذاله الشيل===وراعي الحطب له حزمة في حباله

ومن جاء بارد الكف ومعيل=== يمشي على الرجلين ماله زماله

قليل شوف ويشتكي من ردا الحيل===ماله حلال ويستحي من ظلاله

دار لسمحين الوجيه المناويل=== اهل سدير اهل السخاء والجزاله

ربع يسلونه بزين التعاليل=== وكل يوسع خاطره بالنزاله

يروح وركابه تهد من الشيل=== من شاف حاله قال يكثر ماله

مع ذا وذاالخاطر تراهم بهاليل=== لاهل النضى واللي ذلوله نعاله

يلقى دلال باشقر البن والهيل=== تفوح مع طيب النباء والسهاله

يلزم مسويها بغسل الفناجيل===وتركى الين انه يجيب الفواله

ومن عقب هذا السمن ومفطح الحيل===كل يحشمونه على قدر حاله

رجالهم لو ماله الا المعاميل=== لابد مع ضيفه يسوي جماله

جدنهم جادوا وحنا مواصيل=== ومن مات يظهر من عياله بداله

ربعي وانا معهم كثير المداخيل===ومن لمني فيهم عسى السر فاله

يستاهلون المدح جيل بعد جيل=== واللي يماريهم فهو من هباله

ياكثر ما مدحوا ومابهم قيل=== للضيف راعي سدير خله لحاله

هشين بشين تعدال عن الميل=== سمحين بضده راعي الجهاله

اقول شوف العين ماهو دهاويل=== ما جيب لي نقل وخطو الرساله

وباقي العرب تلقى رجال مشاكيل=== لا بد للبارود يبقى حثاله

صلاة ربي عد رمل الغراميل===على النبي مبدا الكلام وكماله

اللهم صلي وسلم على النبي محمد.

رابط هذا التعليق
شارك

من فضلك سجل دخول لتتمكن من التعليق

ستتمكن من اضافه تعليقات بعد التسجيل



سجل دخولك الان