الواقع المرّ (قصة خيالية باللهجه الحرماويه)

يا هلا وغلا فيكم .. وش اخباركم ياأهل منتديات حرمه ..

هذي قصة كتبتها من خيالي المتواضع !!

وارجوا انكم تتفاعلون معي علشان انزل القصة كاملة

وسلامتكم ..

====================

====================

قصة عائلة خيالية تسكن في حرمه .. وإليكم شخصيات القصة : ــ

*محمد : (الاب) متقاعد .. وكان يشتغل في إدارة التعليم بالمجمعة .

* شيخة: (الام) .. {لابسة حنكة}

الأبنـــــــاء :

*فهد: عمره 35 سنة مدرّس في إبتدائية حرمه ،، متزوج من حنان {من أهل شقراء} ولا رزقهم الله بعيال . وهو صابر عليها بسبب

العشرة اللي دامت سبع سنين ولا يبي عيال الا منها وأمه تاركته على راحته مع انها ودها تشوف ذريته ..

*حصة: عمرها 29 سنة متزوجه واحد من أهل المجمعة اسمه عبدالله "32سنة" يشتغل أمين مكتبه في ثانوية . وترك التدريس لانه

عصبي ولا يتحمل استهتار الطلاب . وعندهم ولدين يزيد "5سنوات" .. وأسامة "سنتين" ..

*سلمان : عمره 21 سنة يدرس في جامعة الإمام المستوى الثالث "كليه اللغه العربيه" يجي لحرمه كل اربعاء ويروح للرياض يوم الجمعة

كل اسبوع

* هديل : 19 سنة تدرس في كلية التربية بالمجمعة قسم دراسات اسلامية ..

وباقي الشخصيات تعرفونهم من الاحداث ..

-----------------------------------------------------

&& الجزء الأول&& :

هديل : إيه اجل يا منى عطيني عباتي شوفيها وارتس .. فهد جاي من زماان يحتريني << في الكليه

منى {صديقتها} : خذيها يالله . مخليتن أخوها في ذا الشمووس .

وتلبس هديل عباتها وهي تضحك على منى اللي من أيام متوسط وهي صديقتها على خفة دمها .

في بيت ابو فهد : **مع العلم ان فهد ساكن معهم في نفس البيت **

ابو فهد : والله ياام فهد مرقوقتس ماادري وش بلاه من تالي ماعاد هو مثل منول ...

أم فهد: هو !! ورااه ؟

ابو فهد : انا ادري عنتس ؟ انتسبيه بس .

أم فهد : لا لا ألين يجون فهد وهديل عشان نتغدى جميع .

وفي هاللحظة تدخل حنان ...

حنان : ماشاء الله . وشذا الريحة الزينة ياخاله ؟

أم فهد : ايه وش يدريتس قاعدتن فووق متدودلتن في ذا التلفون من الصبح .. من تكلمين في ذا الضحوة ؟؟؟

حنان: هههههههه .. اكلم ايمان << اختها ،

أم فهد : ........

حنان : إلا مادريتي ياخاله تراهم عجلوا بملكة ايمان يبي يخلونها الاسبوع الجاي .

أم فهد : ايه اشووى . مابغوا .. من العام وهي مخطوبه ، الله يوفقها مار .

أبو فهد : آمين ..

حنان : ايه عاد ياخاله .. ابيتس تروحين معي لشقراء نحضر الملتسه !! انتي وخالي .

أم فهد : ايه نشووف

ابو فهد : الله يوفقها انشاء الله ويرزقها ويرزقتس بالذرية الصالحه !

حنان وهي دموعها تغورق : آمين ......... وتطلع

يدخل فهد وهديل ويتغدون ..

بعد اسبوع يوم الاربعاء الساعه 4 العصر ..

ام فهد قاعده في الصاله تزيّن وتحط ديرمه وتعدل حنكتها . ويجي فهد وهو متكشخ ويقول ..

فهد: وينها حنان صيفت ؟؟ وراها ماتجي ؟؟ ورانا طريقن طويل .

حنان وهي تنزل بسرعه : ايه هذاني جيت .

هديل وهي تووها تقوم من النوم : ماشاء الله يمه تتروحين ؟؟ وانا اقعد لحالي ؟؟

حنان : قايله لتس تعالي معنا وشوله تعيين ..

هديل : طيب متى بيجي سلمان وراه ابطى ذا السبوع !

أم فهد وهي تلبس عباتها : ماادري عنه . ازهمي عليه اخاف انه نايم .

وفي مكان ثاني .. في الطريق السريع ..

كان سلمان راجع لحرمه .. وفجأة يرن جواله ، شاف من اللي زاهم ..

------

هدهد

يتصل بك ..

-----

ويرد عليها : ألوووو ..

هديل : الو . هلا .. وينك وراك ماجيتا ؟؟

سلمان : ايه . نمت الظهر وتوني قايم .. الحين انا في الطريق .. وش تبين ؟

هديل : ايه الله يخليك تعال امي راحت مع فهد وحرمته وابوي لشقراء وانا لحالي في البيت

سلمان : وش عندهم ؟

هديل : تعال انت واعلمك .

سلمان : ايه تساد انا اقول وش الطاري زاهمتن علي .. يالله مع السلامة .

هديل : مع السلامة

وتحط هديل السماعه من اخوها .. وزهمت على منى .. وتقعد تسولف معها مغير حش باللي في الكلية،،

سلمان يمشي بالطريق وهو حول محطة العتش . ويهوجس ومشغلن الرادو ويتوحى فيه ..... وفجأة !!

طرووووووووووووووووووووم

والساعة 6 حول المغرب ...

حطت هديل السماعه .. واستاحشت البيت لحالها وقالت ابزهم على سلمان اشوف وين هو ؟

وتزهم عليه ... وتلقاه مقفووول !! وتزهم على حنان ماترد عليها .

مرت الساعه والساعتين الين صارت الساعه 8 ونص .. زاد خوفها على اخوها .. كان يقول لها العصر انه بالطريق والحين بيأذن العشاء

وهو ما جاء ..

وفي شقراء ... وبالتحديد في بيت أهل حنان ..

كانت حنان مع اخواتها وحريم اخوانها يولمن اختهن ويزيننها علشانها تبي تنزل للحريم عقب شوي ثمين تروح يشبكها رجلها ..

وحاطه جوالها في الصالة اللي فوق وكانت هي ياتحت ياعند اختها تزينها وترتبها ..

راحت لعند الجوال لقت .. 5 مكالمات لم يرد عليها .. كلهن من هديل ، وقالت اكيد تبي خالتي << لان ام فهد ماعندها جوال

أم حنان : هذي والله الساعة المباركة تزورينا يا ام فهد .مرة ماقد شفناتس ابد ..

أم فهد : والله تدرين بعيدين وماألقى أحد يوديني . كلن لاهين في شغله ...

أم حنان : الله يعين ..

تجي حنان عند خالتها وتقول

حنان: خاله .. هديل متصله علي تبيتس !!

ام فهد : ايه ضاق صدرها لحالها .. ايه ساد خل ينفعها التوزوز في البيت

حنان : بس .. بس تراها زاهمه خمس مرات ......... وتعطي الجوال لخالتها .

في حرمه ...

هديل تقول في نفسها : وش بلاه اخوي ماجاء ؟؟ أخاف انه نسى شئ في الرياض وراح يجيبه !! طيب وراه قافل جواله ؟؟

يمكن خلص شحنه !! طيب وراها حنان ماترد علي ؟؟ اكيد لاهية مع اخواتها . ازهم على منى توسع صدري؟ لالا أخاف تقول

وش جاها ووش تبي ؟؟!! وقعدت تسكت روحها بهالاجوبة عشان ترتاح ..

وفي هاللحظة رن جوالها .. نقزت من الفرحه راحت ترد لقت ..

----------------

حنان

يتصل بك ..

-------------

هديل : ألووو ..

ام فهد : الوو .. هاه وش تبين ؟

هديل : اهاا .. وش اخباركم ؟ وش اخبار عرسهم ؟؟ زين ؟ اها شفتي العاروس ؟؟ عساها زينه ..

ام فهد : صدز عاد .. زاهمتن علشان تسذا ؟؟ مالت عليتس . مخليتن الحريم الحين انا . يالله مع السلامة ..

هديل : اصبري يمه !!!

وتصك السماعة في وجهها ..

ضااااقت الدنيا بهديل ... تحس كل هموم الدنيا على راسها ماتدري وش تسوي .. زهمت على حنان مرة ثانية .. ماردت ..

بغت تزهم على فهد ..بس تخاف انها تقوله سلمان ماجاء وبعدين يرجع فهد لحرمه وهمين يرجع سلمان ويقول وش فيها اذا تاخرت شوي

ويزعل فهد ويحنق بلاه رجع بدون سبب .. ومايجيبهم وينام وتصير مشكلة كبييييرة .. حصة .. صح حصة ليش ماازهم عليها ؟؟

وفي مكان ثاني .. في المجمعه ..

يزيد وهو يصيح: يمه ! شوفي أسامه خذ هديتي اللي عطوني اياها في الروضة .

حصة : ميخالف .. اسامه توه صغير مايفهم شئ ..

يزيد: لااااا يماااه

حصة : طيب ..

وتاخذ اللعبه من اسامه , ويقعد يصيح هو الثاني .. فجأة ..

....... : وجعن بلى !! وشذا الصجه الله يصجتس انتي وعيالتس ..

التفتت حصة شافت عبد الله واقف معصب والشر طالع من عيونه ..

حصة : وش اسوي بهم ؟؟ أسامه يبي لعبة يزيد ويوم اني .... ويقاطعها عبد الله ..

عبدالله وهو يزاعق: ماعلي منهم .. الواحد مايعرف ينام في ذا الدار .. اوووف ..

وياخذ شماغه وعقاله ويطلع من البيت .. وحصه شافت عيالها واقفين خايفين ساكتين ودموعهم على خدودهم .. ونزلت راسها ..

ويرن جوالها ..

----------

أهلي

يتصل بك ..

----------

ترد ... حصة وكل هموم الدنيا على راسها : ألوو .

هديل : حصة وشلونتس ؟ ؟ وشلون يزود واسامه ؟

حصة : آه . طيبين .. وشلونكم انتم ؟؟ اها متى راحت امي ؟

هديل : من العصر رايحه ..

حصة : وش اخبار سلمان ؟؟

هديل : ماادري عنه ؟؟

حصة وهي متفاجأه : وشو ؟؟؟ وشلون ماتدرين عنه ؟

وتقعد هديل تقوول لحصة وش صار لها ..

في المجمعة .. وتحديدا بمستشفى الملك خالد..

في الإسعاف ...

كان سلمان مسدوح على السرير .. وحوالينه اجهزة غريبة والاطباء من حوالينه يتكلمون ..

راح واحد من الممرضين وخذ بطاقته الشخصية وشاف اسم الابو وخذ رقمهم من الاستعلامات المهم انه زهم على بيت ابو فهد ..

في طريق شقراء لحرمه ..

أم فهد : ايه و حنان شايشتن مررة .. ماقعدت مع الحريم ابد .

فهد : اييييه .. ايه بصرها خلها تمرح عند اهلها مبطيتن عنهم ..

أم فهد : اها متى نبي نوصل ؟؟ جاني النوم . ما قد سهرت مثل اليوم ابد ..

فهد : مابقي شي ........ ويرن جواله .

------------

أم يزيد

يتصل بك ..

----------

فهد : وش تبي حصه زاهمه هالحزة ؟

ام فهد : ماادري عنها

يرد فهد : ألوووو.

حصة : فهد وشلونك وش اخبارك ؟؟

فهد : طيب ولله الحمد

حصة واللي حبت تدخل بالموضوع مباشره : سلمان مابعد جاء الى الحين ..

فهد : وراه ؟ قطه مهوب جاي هالسبوع .

حصة : الا ماشي العصر ولا بعد جاء .. واذا زهمنا عليه جواله مقفول !!

فهد : هه ؟؟ طيب طيب الحين نبي نجيكم

أبو فهد واللي كان نايم طول الطريق : وش فيك يا فهد ؟

فهد : سلمان ما وصل لحرمه !!

هديل كانت تتلقى خبر حادث اخوها من الممرض مثل الصاعقة اللي نزلت على راسها ...

تحس ان منكب عليها ماء بارد ولا ردت عليه وسكرت السماعه .. ودقت على حصه .

هديل وهي بين دموعها : ألوووو ... حصـ ـهه .. سلمــا مـــا ن ... سووى حاااادث يا حصة ..

حصة : وشوووووو ؟؟ من قالتس .؟

هديل : تو زهمو االمستشفى وقالوا لي .... وتحط السماعه وهي تصيح صياح ما عمرها صاحته تحس ان اخووها مات او صار له شئ خطير ..

حصة بهاللحظة ماعرفت وش تسوي .. تبغى تروح لاهلها توقف معهم .. تشوف وش اخبار سلمان .. بس عبدالله طالع ولا تقدر تزهم عليه لانه طلع وهو معصب .. وتخاف تقول لفهد يمرّ عليها.. يرجع رجلها الحين ومايلقاها .. ويعصب زيادة ..

وقعدت تصييح الين تشووف الاقدار وش تسوي بها !!

وقفت سيارة فهد عند بيتهم .. نزلوا كلهم .. راح فهد يركض للبيت ويوم انه دخل لقى هديل عند التلفون .. وتصييح

راح عندها وقال لها : وش فيتس ؟؟ احتسي .!!

هديل : سلمااان مسوي حااااادث ..

وبهاللحظة كان ابو فهد وام فهد توهم داخلين .. سمعوا الخبر .. وقفوا أماكنهم متصنمين ..

أم فهد نزلت دمعة حارة من عينها بدون ماتحس .. ولدها حبيبها يصير فيه حادث .. ولدها شعرت قلبها اللي دايم معهم يسولف وينكت ويضحك معهم يسوي حادث وهي ما درت ..

فهد ركب السيارة وراح طيراااااان للمستشفى ..

في المجمعة ..

حصة تصيح وتشهق .. على حالها .. وحال اخوها اللي بين الموت والحياة , وحال اختها اللي بلحالها في البيت تواجه الموقف, وحال امها اذا عرفت وش راح يصير فيها لان ام فهد مدلعه سلمان ولدها وماتسميه الا شعرة قلبي .. وعلى حال اولادها اللي ماتدري وش يكون مصيرهم ..

ويدخل عبد الله .. ويشوفها تصيح ولا عبرها , ولا سلم ولا حتى سألها وش فيها تصيح ...

ويروح لغرفته .. وراحت وراه .

حصة : عبد الله .. ميــ ميخالف توديني لبيت أهلي علشان أخوويـ ....

عبد الله وهو مقرب منها : ماصارت عيشه هذي !! سواقن عندتس أنا ؟؟ الحين تبين تروحين لهم في ذا الليول ؟؟ وشوله ؟ او تبين تعانديني وبس ؟؟

...... وراح للسرير ..

حصة : لا ..لا بس علشان سلمان مسووي حادث وأبغى اروح اشوفه !! ونزلت من عينها الحزينة دمعة ..

عبد الله وهو يتلحف : واذا اخوتس سوى حادث لازم تحسريني يعني

ويناااام ..

وتطلع من الغرفة و تصك الباب و تتسند عليه وترجع لصياحها !!

في المستشفى ...

واقف فهد ينتظر الدكاتره يطلعون من غرفة سلمان يشوف وش فيه .. ويجي صوت من وراه ..

........... : فـــــهـــــــد !!

===================

===================

وهذا الجزء الأول واتمنى انه يعجبكم .. وابي توقعاتكم لهالقصة

وشكرا ..

يسلمووووو راعية جبل عسرررررره

بدايه موووفقه صرااااحه

بس ليتس قلتي لي اقطع الاتصال واقعد ابحلدز في القصه

<<<<< اعجبه بعض الكلمات ههههههههه مثل :

متدودلتن

مثل منول = اللي يشوفها يقول مثل منول تصغير منال خخخخخ

وينك وراك ماجيتا ؟؟

مشكورررررره راعية جبل عسره وننتظر الجزء الثاني

.

:

الاخت راعية جبل عسيره ,,,,,,,,,,,,اعرف العائلة الي تكتبين عنهم (((((((((وابخليهم يرفعون عليك شكوى ويطلبونك في المحكمة بموضوع التشهير ياسم عائلة ,,,,,,,,,,,,,,,,,,,,,,,,,ويمكن يسجنونك ,,,,,,,,,,,,

المهم بصراحة القصة حلوة ,,, ,,,,ووووواكثر من حلوة تشد الواحد ,,,,,كانه رواية من رواية المشهورين ,,,,,,رائع سرد الاحداث وتفاعلات الاشخاص مسرودة بشكل اكثر من رائع قصة تحكى واقع

من مجتمعات المحلية ((((((اكيد لو واحد غير سعودي ولا سعودي بس مو نجدي يقراء القصة ,,,,,,,,,يبغله مترجم يعلمه وش السالفة))))))))))))))))))))))))))ارجع واقوال قصة جدا جدا حلوة ونتظر الجزء الثاني

مشكوووورين على المرور :

واحشنا : وراك ما قطتا الاتصال ؟؟ كود بعلم يعني المهم مشكوور على ا لرد

الحرماوي : اقوول تراي مااقصد أحد في القصة وان تسانك تعرف احد تسذا قصتهم أجل هذي صدفة .. واكرر هذي من نسج الخيال ... ومشكوور على مروورك

ابو حسن : مشكوور على مروورك وانشاء الله بكملها باسرع وقت ممكن ..

على مروركم

تحيااااااااتي

يعطيك الف مليون عافيه

قصه رووووووووووووووووووووعه

اتمنى من المشرفين يثبتونها

انا اتوقع ان عبدالله يطلق حصه والله اعلم

ننتظر الجزء الثاني بفارغ الصبر

تحيتي لك راعية جبل عسره

حلوووووووووووووووووووووة مشكورة على القصة وصراحة حمستيني مررررررررة

شعرة قلبي<<<<<<<<<<<<<

تسلمييييييييييييييين

الللللللللللللللللللللللللللللللللللله ثبت الموضووووع

شكرا للي ثبته

سماء النسيان مشكوووره على تفاعلتس معي .. يا حبني لتس تكفين

طفلة حرمه ... هلااااا وحياتس الله في منتديات حرمه ومشكوره على مروورتس

===== ملاحظة ====

بنزل الجزء الثاني يوم الاربعاء انشاء الله تعالى

تحيااااااتي

مشكووووووووووووووووووووور على القصه

(( راعية جبل عسره ))

تسلمين على هالقصه

وفعلا تستاهلين الطايه

نوير بنت عبيد ... مشكوورة على مرورتس واتمنى انها تعجبتس ..

حميان بيتش ... مشرفنا على التثبيت ... ويعطيك العافيه على مرورك

ربص جمش ... تسلم على المرووور ..

واليكم الجزء الثاني ...

&& الجزء الثاني &&

فهد وهو يلتفت : نــعــم ؟؟

الدكتور : انتا اخ سلمان ؟؟ مش كده ؟

فهد : الا

الدكتور : تعال معايا بعد ازن حزرتك !!

فهد : طيب

راح فهد معه وفي مكتبه ..

الدكتور : بصراحه يا اخ فهد .. الحادث كان خطير أوي ... بس الحمدلله استطعنا انقاز سلمان بشكل كبير بس هوا دلوئتي عنده كسر بسيط في رقله اليسار . عشان كده حيعّد عندنا لمده 24 ساعه تحت الملاحظة .. وتنويم لمدة اسبوع ..

فهد : لالا اسبوع كثير .. ليه مايطلع بعد الـ24 الساعه هذي ؟

الدكتور : خلاص .. بس على مسؤوليتكو .. ما تتعبوه ولا حاقه وما يسووئ(مايسوق) الا بعد شهرين

فهد : انشاء الله يا دكتور .. اقدر ادخل عليه الحين

الدكتور : اتفضل !!

وفي بيت ابو فهد ..

ابو فهد : وشبلاتس يا ام فهد ما يكون إلا الخير .. الحين فهد ييجي ويطمنا انشاء الله

هديل : ياربيييه الله يستر بس ،انا كنت حاسة إنـ ... يقاطعها ابو فهد ..

ابو فهد : ايه خلاص اسكتي بس . لا تزيدين امتس ،، لحوول ولا قوة

ويدخل فهد في هاللحظة وكلهم تجمعوا حوله .. كلهم خايفين من رد فهد .. وقال ..

فهد وهو مبتسم : ابشركم ما فيه الا العافية باتسر يبي يطلع بحيل اللي ما تنام عينه ..

ام فهد : الله يبشرك بالخير .. يالله يا ربي لك الحمد والشكر يالله !!

هديل وهي فرحانه : الحمد لله .. طيب وش فيه ؟؟

فهد : كسر في ساقه

ام فهد واللي تحولت فرحتها لحزن : وشلون ؟؟ مايقوى يمشي يعني ؟؟

فهد : لالا .. يمشي . بس ما يتعب نفسه ولا يبذل اي مجهود

هديل : الحمد لله على سلامته

ام فهد وهي ترد لها الروح : الحمد لله !!

ابو فهد :الله يجزاك خير ياوليدي .. تبي تلقاه انشاء الله .. كلشن باجره

فهد ابتسم لكلام ابوه .. وهديل راحت غرفتها بعد هاليوم اللي كان عندها اطول من السنه كله افكار وهواجيس وصياح .. ونامت وهي مرتااحه .. وابو فهد نايم وهي مريح وفهد بعد ... اما ام فهد مانامت كل الليل تفكر بسلمان متى بيطلع ؟؟ واذا رجع يبي يصير مثل منول او اردئ ؟؟ طيب الكسر اللي في ساقه بيطول معه ولا لا ؟؟ وقاعده تهوجس بهالاشياء الين اذن الفجر وقامت تعوذت من بليس وتوضت وصلت..

حـــــصـــــــة ... الكل كان ناسي حصة نسوا انها عارفه بحادث سلمان .. ولا زهموا عليها ولا طمنوها .. كانت قاعد بالصالة ورجلها وعيلانها نايمين وهي تفكر وش فيه سلمان ؟؟ وراهم ما زهموا علي ؟؟ اكيد فيه شئ خطير علشان كذا ماعلموني !! ياربيييه .ودي ازهم عليهم بس جوالي مقطوع ولا عندنا صفر ،، وفي بيتهم يا مشغول يا مايردون.... وهي الثانية ماانمت كل الليل ....

يوم الخميس الساعه 6 المغرب ..

كانت ام فهد وابو فهد وهديل وفهد قاعدين في الصالة ... وفهد يسولف عليهم وعن الملتسة امس على ان سلمان بخير ..كانوا توهم جايين من سلمان .. كانت حالته تماام التماام وبيطلع بعد العشاء انشاءلله

واثناء ما فهد يسولف قاطعته امه وقالت ..

ام فهد : يا خزياااه بس ياهديل !! كل الحريم امس ينشدون عنتس !!

فهد : وش قلتي لهم

ام فهد : وش اقولهم يعني

ابو فهد : ان تسان قلتي لهم توها بزر ماتعودت على الروحات والجيات ..

ام فهد : حتى البزارين جايين امس

فهد وابو فهد : ههههههههههههههههههههههه

ابو فهد : اجل صرتي اردئ من البزر ياهديل !! فشلتينا

هديل : اقول الشرهه مهيب عليكم الشرهه على اللي يقعد معكم , اروح اكلم حصة اصرف لي ...

وفي هاللحظة تذكرت هديل انها اخر مره كلمت حصة : يوم تعلمها بالحادث . وبعدها مالها حس .. ياربييه ليش ماعلمتها انه بخير وبيطلع اليوم ..او بس اعلمها بالاخبار الشينة .. يابعد عيني يا حصيصة ..

وزهمت عليها ...

هديل : ألوووو..

حصة : هلا

هديل : السلام علــ.... وقاطعتها حصة ..

حصة : وش اخبار سلمان ؟؟

هديل : طيب الحمدلله واليوم يبي يطلع

حصة بفرح : قولي والله

هديل : والله

حصة : متاكم دارين ؟

هديل بانوااع التصريف : اليوم

حصة : طيب بجيكم اليوم مع السلامة

وتحط السماعه ..

حصة راحت لعبدالله اللي كان منسدح في الصالة ويكلم بالتفلون وفااطس من الضحك .. قالت في نفسها زين انه اليوم رايق ..

ويوم سكر السماعه ..

جت حصة عنده وهي تبتسم : من اللي كان يكلمك على هالضحك؟

عبدالله : وش دخلتس انتي؟ ماتبيني اضحك يعني ؟؟ طيب وشفيها اذا ضحكت شوي مع صديقي ؟؟ والله العظيم حاله !!

حصة : لا عادي خذ راحتك بس كنت بقولك اني بروح لاهلي ..

عبد الله واللي تغيرت ملامح وجهه : انتي ليش كذا ؟؟ كل مااستانست شووي رجّعتيلي النكد مرة ثانية .. كل شوي جايبه طاري اهلتس ؟

حصة : اسمعني طيب .. سلمان بيطلع وبروح اشوفه !!

عبد الله : طيب انا بروح لناصر اتعشى عنده وشلون اوديتس ؟

حصة واللي عرفت انه راضي : خلاص اروح مع اخوي .. بس اروح ؟؟

عبد الله طلع ولا رد على سؤالها .. بس هي تعودت انه اذا سكت معناه موافق ..راحت وتولمت وولمت بزرانها وزهمت على فهد ياخذها ..

وعند باب بيتها ..

وقفت سيارة فهد وطلعت حصة مع عيالها وشافت سلمان في السيارة وجات عنده

حصة من دريشة السيارة : حمدلله على سلامتك .. غدا الشر ياخيي ..

سلمان : هلا والله . الله يسلمتس

حصة وهي تركب في المرتبه اللي ورا : الله يعافيك يا فهد تعبتك ياخزياه فيك بس

فهد : لالا .. عادي

في حرمه وفي بيت ابو فهد ...

ابو فهد وام فهد وهديل ينتظرون فهد يجيب سلمان .. وهديل بلغتهم ان حصة بتجي ..

دخل فهد وحصة وماسكين سلمان ومعه عكازة .. وام فهد ضاق صدرها على حاله لكن حمدت الله على انها جت على كذا .. وهديل في قمة الوناسة .. وصار يوم الاربعاء اللي راح كابوس وقامت منه .. وسلمان حب راس امه وابوه وسلم عليهم وعلى هديل ..

ويزيد واسامة مايدرون وش السالفه ..

ودخلوا المقلط اللي كانوا حاطين فيه سرير سلمان عى اساس انه مايقوى يرقى فوق

وينسدح سلمان وهو متبسم ويقعدون كلهم حوله ..

جاء يزيد عند خاله وقال ...

يزيد : خالي سلمان وراك نايم هنا ؟؟ انتا ولدتا ؟؟

سلمان واللي ميت من الضحك على يزيد وبرائته لانه ماعمره شاف السرير منزل تحت الا يوم امه ولدت اسامه قال: ايه.. وجبت وليد

يزيد : وينه وليدك ؟؟

سلمان طلع العكازة وقال : هذا هو وليدي . اطول منك صح ؟

يزيد وهو منقهر : بس انا احسن منه هو ما عنده عيون

الكل : ههههههههههههههههههههههه

حصة : ياويلاه وليدي ... تراه يصدق

سلمان : ايه بلاه خبل .. ماادري من طالع عليه ؟؟ .... ويناظر حصة ويضحك

هديل : تعال يا يزوودي .. ماعليك منه يلعب عليك ..

وكان فهد يكلم حنان بالجوال ..

فهد : ايه وتوه طالع من المستشفى

حنان : ايه حمد لله على سلامته

فهد : الحمد لله .. وش اسمه .. تبيني اجيتس باتسر

حنان : لالا بكرة يبي يجي صالح (اخوها) للمجمعه عنده شغل ويبي يجيبني

فهد : ايه خلاص مع السلامة

حنان : مع السلامة

وقعدوا كلهم ساعه صدر ووناسه وطلبوا من تشكن بلس عشاء.. بهالمناسبه السعيده ..

وبعد كم يوم ... في الكلية ..

سارة (وحده من زميلاتها): اقول منى ..

منى : هلا .

سارة : تدرين امس طلعت مبكرة ونسيت زمزمية القهوة .. ماتدرين وينها

منى : والله ماادري .. شفت بنت خالتس خذتها .. روحي اساليها شوفي

سارة : ايه خلاص الله يعافيتس ..

وتجيهم هديل : هااه بنات وش تسولفون عنه ؟؟

منى : الله جابتس .. بقولتس بكرة تجين عندنا

هديل : وين ؟؟ ........ ــ وهنا تروح سارة ــ .......

منى : وين يعني في بيتنا تبي تجي غاده وتبي تجي خالتي بعد

هديل : اي وحده من خالاتتس ؟؟

منى : خالتي امل اصغرهم

هديل : ايييه عرفتها .. ايه بشوف

منى : تعالي من عصر .. موب مثل ذاك اليوم ماجيتي الا العشاء .. زين

هديل : انشاااء الله تامرين امر ..كم منى عندي هههههههههه

ورجعت للبيت تعبانه .. دخلت وشافت سلمان في المطبخ مع امها يسولف وهي تسوي الغداء ..

ويدخل معها فهد ..

فهد : أفأ .. سلمان وراك قايم من سريرك ؟؟

سلمان : حامت تسبدي منه .. كم هذالي وانا منسدح فيه

هديل : فهد !! عازمتني منى اليوم توديني ؟

سلمان يقاطع هديل: الا على طاري السيارات ماتدري وش اخبار سيارتي ؟

فهد : سيارتك تصلح هالحين .. هديل متى تتروحين لها؟؟

هديل : العصر تسان انك فاضي

فهد : لا مانيب فاضي .. بوديتس المغرب خلاص

هديل : خلاص

وتروح هديل لبيت منى وشافت ام وخالة منى وصديقتها غاده وسلمت عليهم ..<< مع العلم ان اصغر خالات منى امل هذي بس انها متزوجه وعندها عيال .. واصغر اخوال منى حمد اللي متوظف صار له سنتين >>

وقعدوا البنات يسولفون لحالهم .. وتدخل عليهم امل خالة منى ...

امل : منى .. ما عرفتينا على زميلاتتس !!

منى : ايه هذي خالتي امل اللي قلت لكم عنها .. خاله هذي هديل وهذي غاده

امل وهي تسلم عليهم ومانزلت عينها من هديل: ماشاء الله .. اييه وشلونكم ؟؟ طيبين ؟؟

هديل وغاده : الحمد لله

وبعد ما قعدوا وتقهووا راحت غاده .. وبعد نص ساعه راحت هديل .. وجت أمل لمنى وسألتها ...

أمل : منى كم عمرها هديل صديقتتس؟

منى : كبري !! وشوله تسألين؟

أمل : والله افكر إني اخطبها لحمد اخوي .. وش فيها؟؟ زينة وحسب ونسب واخلاق وبنت ناس معروفين ..

منى : أحلى .. اشوفتس مغير تناظرين فيها !! فشلتيها

أمل : ايه عاد نبي نفكر بالموضوع وبستشير اخواتي واخواني ..

ويعد يومين ..

في بيت حصة ...

كانت حصة في المطبخ تغسل مواعين الغداء .. وتسمع زعااق عبد الله وصياح يزيد .. وقالت في نفسها اعوذ بالله ذا الرجال مايخاف الله في عياله وراحت الصالة .... شافت عبدالله يعفج يزيد عفج ويطقه طق و ماسك اذنه ويهاوشه .. ويزيد يصييييييييح ...

حصة جت على طول وانقذت ولدها منه ..

حصة : وش بلاك عليه ؟؟

عبدالله وهو يزاعق : لا والله ؟؟ شاقن الفاتورة .. هالحمار هذا ..

حصة قعدت على الارض ولمت يزيد وقعدت تسكته ...

عبد الله : حــــــصـــــــه !! ضفي هدومتس .... وروحي بيت اهلتس ....

حصة وهي خايفة : لـــــيــــــــش ؟؟؟ طردتني يا عبد الله ؟؟؟

========================

=======================

انتهى الجزء ..

تحـــــيـــــتي ...

عد اسمعي ياراعية جبل عسره

هالمرة مو سمحين لتس ,,,,,,,,,,,,,,,,,,,,,,,,,,,,,,,,,,,,,,,,,,,,,الجزء الثالث لالالا يتتاخر فيه

يعني تشديني ثمين تخليني نتظر اسبوع

بس ارجع واقوال ابداع ونهاية لجزء الثانى حلوة تخلي الواحد وده يعرف وش صاررررررررررررررررر

يالله لالالالالالالالالالاتتاخر بالتكلمة انحن بانتظرالجزء 3

شكرا شكرا على القصة رائعة وبعدين هالعائلة قدمو ا شكوا عليك شكوة تشهير وتفضيح ,,,,,,,,,,,,,,,,,,,,,

طبعا ترىىىىىىىىىىىىىىىىى امزح المرة الاولي وهالمرة ما اعرف عائلة يحاملون نفس الاسماء والقصة ,,,,,,,,,,,,,,,كنت مزحة

الى الامام وبالتوفيق من ابداع الى اخر

السلام عليكم ورحمة الله وبركاته

راعية جبل عسره تسلميييييييييييييييين القصه حلوه وربيي اني انبسطت

شكرا

هلا راعيه

وش اخبارك ...........

مشكوره على هالجزء الحلووووووووووووووو.....

وتسلمين..

مشكورين على مروركم ...

الحرماوي ... هلا .. شكلك متابع جيد ماشاء الله عليك .. مشكور على مرورك

ربص جمش .. شكرا على مرورك .. ومشكور على المداخله بس قلت مادام انه ثبت الموضوع حسافه

مقرودة ... تسلمين على مرورتس اخيتي .. وانشاء تعجبكم الاجزاء الباقية ..

سماء النسيان ... مشكووورة على مرورتس واتمنى انها تجوز لتس تسلمين

فتاة سوق السبت .. ~{ مشــــــــــــــ المحتــــ ــــرمة ـــــــــرفتنا }~ ... حياتس الله ومشكورة على رفع المعنويات

ورفع الموضوع بعد ..

القروي ... حيــــــــ الله ــــــ مشرفنا ــــــــا .. تشكراتي على الرد .. ولا تسبق الاحداث .. خلك مع الاحداث ..وعبد الله اوريه انا

الله ياعفيكم يا اهالي منتديات حرمه وخصوصا (الساخر) بصراحه افشلتموني

واليكم الجزء الثالث ... واسفه على التأخير ..

&& الجزء الثالث &&

وقفت حصة وعيونها تغورق من الدموع ...

عبد الله : والله ما عرفنالتس !! كل شوي تقولين لي ابي اروح لاهلي وصااااجتني .. ويوم اني قلت لتس روحي .قعدتي تصيحين وتقولين ليش وماليش ..

حصة : طيب .. وانت ؟؟

عبد الله : أنا .. وش فيني ؟؟

حصة : بتقعد لحالك يعني ولا ....

عبد الله : لالا .. لا تخافين علي . انا بروح للدمام مع كم واحد بكره الضحى .. ولّمي خلاقيني . وحطيهن في الشنطة السوداء هذي ..... (ويأشر فوق الدالوب ) خلاص ؟؟

حصة وهي ترد لها الروح : خلاص

في حرمه ... الساعة 11 بالليل ..

هديل وحنان قاعدين في الصالة يسولفون .. شوي ويرن جوال هديل ... شافت اللي زاهم .

--------------

قليبي

يتصل بك ..

------------

ابتسمت هديل وردت ..

هديل : ألوو

.... : الوو . اهلين ..

هديل : هلا فيتس والله ..

منى : وش اخبارتس ؟

هديل : طيبه الحمدلله ... وش عندتس زاهمه هالحزة ؟؟

منى : زهمت يوم نامت امي ..لان عندي لتس خبر مهم وعاجل .. ولا يحتمل التأجيل ..

هديل : طيب طيب لحظة ..

وقامت هديل من الصاله واستأذنت حنان وراحت طيرااااان لغرفتها وصكت الباب ..

هديل : هااااه ..

منى : وشو

هديل : اها وش تبي تقولين لي ..

منى : اقوول خالتي امل تقوول .. انها بتخطبتس لخالي حمد ..

هديل واللي ما استوعبت الموضوع : خير ؟؟

منى : خير بوجهتس انشاء الله .. يا سلاااااام بتصيرين مرت خالي ..

هديل : ...........

منى : شوفي عاد تراني ما تأكدت من السالفة لا تفرحين ..

هديل وطاقتها البوهه : ايه

منى : لوشوفي لا تعلمين احد ابد . خلاص ؟

هديل : طيب

منى : بااااااااااي

هديل سكرت الخط ولا قالت لها شئ .. ونزلت تحت وهي تهوووجس. ودخلت المقلط .. وكان هناك سلمان وامها وفهد وحنان{لابسه جلال } ..

أم فهد : هااو ؟؟ هديل وشفي زناهيرتس طايره ؟؟

سلمان : ههههههههههههههههه .. وشبلاها صدز ؟؟

هديل تقعد وهي ساكته .. ولا قالت لاحد لان منى محذرتها ..

من بكرة الساعه 10 ضحائاً..

ام فهد تقووم سلمان ..

ام فهد : قم !! قااامة ..

سلمان وهو يتلحف : ماابي

ام فهد : وجعتن توجعك .. وشوله السهر كل امس ؟؟

وبهاللحظة يرن الجرس ــ

أم فهد : بسم الله علي عظايم الاسم .. من ذا اللي جا ؟؟

وتلتفت على سلمان

ام فهد : قم يالله شف من جاء ؟؟ يالله انهج !! افف منك بس .. وتروح تفتح الباب ... ولاها حصة !!

في الكلية ...

منى تمسك يد هديل وتروح بها في مكان بعيد عن البنات وصجتهن ...

هديل : نعم وش تبين

منى : تعاااااالي ...عسى ماعلمتي احد عن اللي امس قلت لتس ايااه ؟؟

هديل : لا

منى : اشوووووى ... اها وش رايتس ؟؟ وافقتي ؟؟

هديل : ههههههه وشلون اوافق ماصار شئ .

منى : تصدقين .. ازين يوم في حياتي ... اللي بتصيرين فيه مرت خالي ..

هديل وهي تتصدد : الله يسلمتس ..

في حرمه ...

ام فهد : وكم يبي يقعد في الدمام ؟؟

حصة : يمكن اسبوع اسبوعين .. بالكثير شهر ..

ام فهد : الللله !!! شهر

حصة : ايه شهر .. ولا ماتبوني اقعد عندكم ؟؟

ام فهد : الله يحييتس انتي وعييلتس ..

حصة : اجل وين حنان .؟؟

ام فهد : فيذاك .. في الصالة تكلم ..

سلمان وهو توه يقوم من النوم : حصة جيتي ؟؟ ماشاء الله

حصة : صباح الظهر ـــ وتلتفت على امها ـــ الا متى تجي هديل ؟؟

ام فهد وهي تشوف الساعه : هالحين هقوتي

وفي الصالة ....

حنان تكلم : ايه مغير أتردد بذا الجلال ..

ايمان : ايه .. ابد الاسبوع الجاي تعالي ولا عاد ترجعين لبيتس اليين يطيب سلمان.

حنان : ماادري ؟

ايمان : الا بس تعالي اقعدي عند امي تبي تقعد لحالها .. مار جسريها ذا الاسبوع ..

حنان : وبس ؟؟ طيب بكلم فهد واشووف .. مع السلامة

ايمان : مع السلامة

وتحط حنان السمااعه .. وتزهم على فهد ...

حنا ن : الووو

فهد : الوو .. نعم

حنان : متى تتجي ؟؟

فهد : الحين . هذا انحن في الطريدز(الطريق)

حنان : ايه نحتريك مع السلامة

فهد : مع السلامة

.....

وبعد اسبوع وثلاث ايام , بدت عطلة الربيع , كانت حنان بتروح اليوم لشقراء علشان عرس اختها بكره ..

حنان وهي تلبس عباتها : يالله اجل مع السلامة .. لاتخلونا كلكم تعالوا باتسر ..

ام فهد : انشاء الله .. وسلمي على امتس

حنان : انشاء الله وانتي يا هديل وانتي ياحصة .. كلكم تعالوا

هديل وحصة : انشاء الله

ويسمعووون بوري سيارة ..

حنان : هذا صالح جاء . يالله مع السلامة

الكل : مع السلامة ..

وقعدوا هديل وحصة وسلمان وام فهد .. وام فهد تصدرت المجلس بسواليفها عن العرس اللي بكره ..وهديل تذكرت على طاري العروس حمد خال منى .. وحبت تشوف وجهت نظر اخوها فيه ,,

حصة التفتت على هديل : اها يا هديل وش اخبارتس مع ذا الكلية ؟؟

هديل استغلت الفرصة وقالت

هديل: ابد ... منى ماغير تسولف عن خالها وانا ساكته ..

وشافت كل اهلها سكتوا ولا علقوا .. وكملت وقالت ..

هديل : مغير ذا الحمد اعوذ بالله سالفتنا بالكلية ,,

سلمان : حمد .. حمد الأيش ؟؟

هديل وهي فرحانه : حمد سالم الـ........ ..

سلمان : ايييه عرفته ..

هديل : تعرفه ؟؟ ليش صديقك هو ؟؟

سلمان : لا لا مهوب صديقي .. بس ذاك اليوم قال سعد (صديقه) انه يبينا نروح معه للبر .. ويوم رحنا ولاه جايبن معه ناسن واجد .. ومعهم حمد ذا .. أعوووذ بالله يافيه ثقل طينه .. كريهن الله لا يبلانا ..

هديل وهي عاقده حواجبها : وراه ؟

سلمان : بس ..كل مااستانسنا شوي . جاء ينكد علينا .. مبلشنا .. ماغير يهوش وشذا الشين وشذا المكان ؟؟ وراه كذا ؟ وشذا الرز ؟؟

هديل نزلت راسها وقعدت افكار كثيرة تدور في راسها ...

ام فهد : بس عاد لا تقعد تحش في خلق الله .. استغفر !!

سلمان : استغفر الله بس استاثمنا فيه ..

حصة طول هالمدة تشوف هديل وطريقتها في الكلام ,, وحست ان عندها شئ ..قامت ونغزت هديل علشان تطلع معها ..

ورقوا في غرفة هديل ...

حصة وهي تمسك هديل مع كتوفها : وشفيتس ؟؟

هديل وهي تحاول تضحك : ما فيني شئ ..

حصة : وش قصة حمد هذا ؟؟

هديل تغيرت كل ملامح وجهها ...

حصة : هديل .. انتي تعرفين اني ما اغبي عنتس شئ .. وانتي بعد ما اخبرتس تغبين علي .. و لا لا ؟؟

هديل دمعت عينها .. لكنها مسحتها بسرعه ..

حصة : اذا كان عندتس مشكلة ولا تبين تعلمينياها .. اجل من تعلمين ؟؟

قعدت هديل وقالت ..

هديل : بس ماتقولين لاحد !!

حصة : وش عندتس ؟؟

هديل : منى تقول ان خالتها تبي تخطبني لخالها .. اللي هو حمد .. وكلام سلمان خوفني ..

حصة : اهااااه .. طيب ليه ماتبغيني اقول لامي ؟؟

هديل : منى ماتأكدت .. تقول يمكن ..

حصة : الحين مضيقتن صدرتس علشان شئ ماصار .. اقول بس تعالي خلي يودينا فهد للكوافيره تحسحس روسنا (تستشور شعورنا ) هههههههههه .. يالله

هديل : طيب

وجاء من بكره والكل راح للعرس الا سلمان .. لانه الى الحين وهو تعبان ما تعافى مرة يعني ..

وكان سلمان قاعد يشوف الفيديو مع عيال اخته يزيد واسامه فيه كراتين ..

ويرن التلفون ....يرد سلمان ...

سلمان : الووو

...... : الووو .. هلا والله وغلا

سلمان : هلا فيك ..

..... : كيف الحال وش اخباركم ؟؟

سلمان : بخير .. طيبين ولله الحمد !!

......: عرفتني ؟؟؟

سلمان : لا والله .. من معي ؟؟

...... : أفااا بس افاااا .. انا منصور ولد عمك ..

سلمان : هلااااا والله ومرحبااااااااا وشلونك وش لون عمي يا الله ان تحييه .. وينكم مبطينن عنكم ؟؟

منصور : طيبين .. وش اخبارك وش اخبار عمي وفهد واخواتك وامك ..؟؟

سلمان : كلهم بخير يسلمون عليك .. وش اخبار عبد الرحمن ؟؟

منصور : الحمد لله .. اقوول الوالد يقول اننا نبي نجي لحرمه بكره انشاء الله .. ونبي نسير عليكم الظهر .. علّم عمي

سلمان : الله يحييكم ..

منصور : يالله اجل فمان الله

سلمان : مع السلامة ..

(( منصور ولد سعود .. سعود هذا عمهم اصغر من ابو فهد حرمته متوفيه صار لها ثلاث سنين .. وعنده منها ولدين وبنت .. عبد الرحمن عمره 37 سنه ومتزوج من بدرية وله بنت .. ومنصور عمره 22 سنه يدرس في جامعة الامام كلية الهندسة .. و مها في ثاني ثانوي واغلب الاوقات تصير عند خالاتها ... المهم هذي العائلة تسكن في الرياض .. وسلمان في فترة الدراسة يقعد عندهم ..))

في شقراء ....في العرس

حنان في طرف بعيد عن الحريم .. تكلم فهد ..

حنان : فهد .. امي تقول اقعدي عندي هالاسبوعين ..

فهد : الله !! اسبوعين ؟؟

حنان : ميخالف .. بلاها ما تعودت تقعد في البيت لحالها .. هاه اقعد ؟؟

فهد : مدري

حنان : وسلمان بعد ..

فهد : وش فيه سلمان ؟؟

حنان : ما فيه شئ بس يعني .. قاعد في نفس البيت مااعرف اطلع ولا ادخل ..

فهد : ايه

حنان : وشو ايه ؟؟؟ حرام عليك امي ياويلاه قاعده لحالها وهــــ .... ويقاطعها ..

فهد وهو يصارخ : ايه خلاص ..

ويصك السماعه .. حنان بينها وبين روحها : وش فيه عصب هذا ؟؟ المهم اني بقعد ..

ويرجعون لحرمه وحنان موب معهم ...

جاء من بكره الساعه 1:00 الظهر وكانوا على الغداء ...

سلمان : ايه صح يبه نسيت اقولك .. عمي وعيلانه يبي يجون اليوم ..

ابو فهد : من يقوله ؟؟

سلمان : منصور امس زاهم وقال لي ..

ابو فهد : وراك ما علمتني من الصبح ؟؟

ام فهد : هو يقوم الصبح علشان يعلمك ؟؟

ابو فهد : متى قال يبي يجون ؟؟

سلمان : يقول الضحى ..

ويقوم ابو فهد ..

حصة : متاك قايم اليوم يا سلمان ؟؟

سلمان : وشبلاكم عليّ انتم ؟ كلن يسهر في العطلة ..

هديل : ايه عاد انت معطل قبلنا

حصة توكل اسامه : لا لا .. خل المويه بعد الغداء .. ـــ وفي هاللحظة يرن الجرس ـــ

سلمان : هذوليهم جو

ام فهد : هاوو ؟؟ وراك ما قلتا لنا انهم يبي يمرون علينا الحين ؟؟

سلمان : الواحد ماينسى يعني .. قم يزيد افتح الباب ..

وتقوم ام فهد وحصة يزهبون القهوة والشاهي والبخور .. اما هديل راحت للمجلس تعدله وترتبه .. ويدخل عليها فهد ...

فهد : اطلعي يبي يدخلون الحين ..

هديل : طيب طيب ..... وتروح .

يدخل العم مع عبدالرحمن ومنصور .. ويقعدون يسلمون على فهد .. ويجي ابو فهد لابس ومتزين ويسلم عليهم وقعدوا ..

سعود (ابو عبدالرحمن) : وينكم ماتنشافون ولاشئ ..

فهد : ياخزياه ياعمي لك الحق والله

منصور : الا وين سلمان ؟؟

سعود : ايه منحب نشوف الا هو ...

عبد الرحمن : وينه ولدينا هذا عاد

فهد : هههههههه .. الحين يبي يجي .. ــ ويطلع ــ

في المطبخ ...

ام فهد وحصة وهديل يصنهجن في المطبخ .. يدخل فهد ويقول

فهد : وين سلمان يمه ؟

ام فهد : انا ادري عنه ؟؟

ويطلع فهد للصاله ويشوف سلمان منسدح ..

فهد : ماشااااء الله عليك .. الحين انت اللي مكلمهم على انهم يبي يجون ولا تسلم عليهم ..

سلمان ببروود : جو ؟؟

فهد : اجل من اللي رانن الجرس قبل شوي ؟؟

سلمان : مدري احسب انه البقالة ...ـــ ويقوم ويمد يده لفهد ـــ امسكني علشان نروح فيذاك ,,

ويطلع هو وياه للمجلس ..

ابو فهد : وش اخبارها مها ماتنشاف

سعود : عند خالاتها

ابو فهد : عاد ماتجي تسلم على عمها ولا شئ ..

عبدالرحمن : ياخزياه فيك ياعمي .. لك مني المرة الجايه نجي وهي معنا انشاء الله ..

ابو فهد : انشاء الله

ويدخل سلمان مع فهد ...

سلمان : يا هلاااااااا باهلي اللي في الرياض .. هههههههه وش لونكم ؟؟

ويسلم عليهم ويقعدون الى المغرب سواليف وضحك ... ويوم صلوا المغرب راح العم وعياله لبيتهم اللي مستأجرينه في المجمعة ...

وبعد يومين ...

تنزل هديل من فوق تشوف من اللي يرن الجرس ...

هديل : من جاي ياحصة ؟؟

حصة وهي خايفه : هديل .. هديل .. جت خالة منى ..

--------------------------

------------------------

انتهى الجزء ...

المبدعه : راعية جبل عسره

فقط .. أسجل إعجابي بماكتبتيه ..

وأنتظرر الاجزاء الباقيه ..

راعية جبل عسره ,,,,,,,,,,,,,,,,,,,,,,,,من ابداع الى ابداعأ اخرأ ,,,ما شاء الله عليك

شكلك بتطلعي كاتبة رواية ,,,,,,,,,,,,,,,,,,,,,,,,او يمكن انك كاتبة وحنا ماندرى عنتس

,,,,,,,,,,,,,,,,,,,,,,,,,,,,,,,,,تعليقات طريفة ولكن تدل على متابعة والقراءة بتركيز

ما اخبر فيه قسم هندسة بجامعة الامام ((الا اذا توهم فتحينه ونا ما ادرى بس ما أظنه)

كلمة ياخزياه ,,,,,,,,,,,,,,,,,مو متدولة بين الرجل ((اكثر شيء بين الحريم))))))) غالبا نقول

العذر والسموحة ,,,,,,,,,,,والله مقصرين معك,,,,,,,,,,,,,,,,,,,,,,والخ

بس ارجع واقوال كتبتي فأبدعتي

الله يسلمتس يا راعية ويسلم ادياتتس.....

والله ما تقصرين وسعتي صدورنا..... بس انهجي علينا با الجزء الرابع

تحياتي العطره لمبدعتنا...

مشكوورين على ردودكم ....

مرتاح ... هلا والله بالمشرف ومشكور على مرورك ..

الحرماوي ... مشكور على الرد .. ومشكور ايضا على النقد البناء ..

شنطة فسحه ... مشكووره على المرور وابحول الجزء الرابع عن قريب يالحبيبة ...

تحيتي ....